2 Samuel 24

¹Gape bogale jwa ga Jehofa jwa tukela Baiseraele, a ba a tlhotlheletsa Dafite a re: “Ya o bale Baiseraele le Bajuta.”

²Kgosi ya raya Joabe molaodi wa ntwa, yo o ne a nna nae, a re: “Yang lo ralale ditso tsotlhe tsa Iseraele go tswa Dane go ya fela kwa Beerešeba, lo bale batho, gore ke tle ke itse palo ya morafe.”

³Mme Joabe a raya kgosi a re: “A Jehofa Modimo wa gago a ntsifatse batho ka fa palo ya bone e tlaa nnang ka gone le fa e le galekgolo, mme a matlho a kgosi morena wa me a go bone; mme kgosi morena wa me e kgatlhwa ke selo se ka ntlha yang?”

⁴Mme le fa go ntse jalo lefoko la kgosi la kgona Joabe, la ba la kgona balaodi ba ntwa. Joabe le balaodi ba ntwa ba tswa fa pele ga kgosi, ba ya go bala batho ba Iseraele.

⁵Ba kgabaganya Joretane, ba thibelela mo Aroere, ka fa ntlheng ya letsogo le legolo ga motse o o fa gare ga molapo wa Gate, go ya Jasere.

⁶Foo ba tla mo Gileate, le mo lefatsheng la Tahatime-hodiši; ba tla mo Dane-jaane, ba potologa ba fitlha kwa Sitone,

⁷ba tla mo kagong e e thata ya Ture, le mo metseng yotlhe ya Bahife, le ya Bakanana; ba tswela ntlheng ya borwa ya Juta, kwa Beerešeba.

⁸E rile ba sena go ralala lefatshe lotlhe ka go le boaboela, ba tla Jerusalema kwa bokhutlong jwa dikgwedi tse di 9 le malatsi a le 20.

⁹Joabe a naya kgosi palo ya batho jaaka ba badilwe; mo go Baiseraele go ne go le banna ba ba pelokgale ba ba itseng go somola tšhaka ba le 800 000; banna ba Juta ba le 500 000.

¹⁰Pelo ya ga Dafite ya nongosela a sena go bala batho. Dafite a raya Jehofa a re: “Ke leofile thata ka se ke se dirileng; jaana, Jehofa, ke a go rapela, o tlose boikepo jwa motlhanka wa gago; gonne ke dirile ka boeleele jo bogolo.”

¹¹Ya re Dafite a tsoga ka moso, lefoko la ga Jehofa la tla mo go Gate moperofeti, molebedi wa ga Dafite a re:

¹²“Ya o bue le Dafite o re: ‘Jehofa o bua jaana a re: Ke baya dilo di le tharo fa pele ga gago; o itebalebele sengwe mo go tsone gore ke se go direle.’ ”

¹³Jalo Gate a tla mo go Dafite a mmolelela, a mo raya a re: “A go ka tla dinyaga di supa tsa leuba mo go wena mo lefatsheng la gaeno, kgotsa a o tlaa tshaba fa pele ga baba ba gago ka dikgwedi di le tharo ba ntse ba go konatelela, kgotsa a kgogodi e ka tla mo lefatsheng la gaeno ka malatsi a le mararo? Jaana o ikgakolole, o akanye phetolo e ke tlaa e busetsang kwa go ene yo o nthomileng.”

¹⁴Dafite a raya Gate a re: “Ke mo pitlaganong e kgolo; a re weleng jaana mo seatleng sa ga Jehofa; gonne mautlwelobotlhoko a gagwe a magolo; mme a ke se wele mo seatleng sa motho.”

¹⁵Jehofa a tsosetsa Iseraele kgogodi, go simolola mo mosong go ya fela mo lobakeng lo lo tlhomilweng; mme go tswa Dane go ya Beerešeba ga a swa banna ba le 70 000.

¹⁶Ya re moengele a otlololela Jerusalema letsogo la gagwe go o senya, Jehofa a ikwatlhaela bosula joo, a raya moengele yo o senyang batho a re: “Go lekanye; gona letsogo la gago.” Moengele wa ga Jehofa a bo a le fa seboping sa pholelo sa ga Arauna wa Mojebuse.

¹⁷Ya re Dafite a bona moengele yo o gailang batho, a bua le Jehofa a re: “Bona, ke leofile, ke dirile ka bokgopo; mme dinku tse, tsone di dirile eng? Ke a go rapela, a letsogo la gago le ke le nne mo go nna fela, le mo ntlong ya ga rre.”

¹⁸Gate a tla mo go Dafite ka tsatsi leo, a mo raya a re: “Tlhatloga, o ye go agela Jehofa sebeso mo seboping sa pholelo sa ga Arauna wa Mojebuse.”

¹⁹Dafite a tlhatloga ka fa puong ya ga Gate jaaka Jehofa a laotse.

²⁰Arauna a leba, a bona kgosi le batlhanka ba yone ba tla ba lebile kwa go ene; mme Arauna a tswa, a ikoba fa pele ga kgosi, sefatlhogo sa gagwe se le fa fatshe.

²¹Arauna a re: “Ana kgosi morena wa me e tletseng kwa motlhankeng wa yone?” Dafite a re: “Ke go reka sebopi sa pholelo mo go wena, go tla ke agela Jehofa sebeso, gore sebetso se se tle mo bathong, mme se emisiwe.”

²²Arauna a raya Dafite a re: “A kgosi morena wa me a tseye fela, a ise tshupelo ka sengwe fela se o se bonang se le molemo; bona, dikgomo tsa tshupelo e e fisiwang ke tse, le dilo tse go folwang ka tsone, le dijokwe e ka nna tsone dikgong.

²³Dilo tse tsotlhe, kgosi, Arauna o a di go naya kgosi.” Arauna a raya kgosi a re: “A Jehofa Modimo a go amogele.”

²⁴Mme kgosi ya raya Arauna ya re: “Nnyaa; ruri ke tlaa se reka mo go wena ka fa tlhwatlhweng ya sone; le gone ga nketla ke isa tshupelo tse di fisediwang Jehofa Modimo wa me, e le dilo tse ke di neilweng fela.” Dafite a reka sebopi sa pholelo le dikgomo ka dipapetla di le 50 tsa selefera.

²⁵Dafite a agela Jehofa sebeso gone, mme a isa ditshupelo tse di fisiwang le ditshupelo tsa kagiso. Mme Jehofa a rapelesega ka ga lefatshe, mme sebetso sa emisiwa mo Iseraele.