2 Samuel 8

¹Morago ga moo Dafite a kgemetha Bafilisitia, a ba fenya; Dafite a tlosa taolo ya motse o mogolo mo seatleng sa Bafilisitia.

²A kgemetha Bamoabe, a ba lekanya ka mogala a ba laditse fa fatshe; a lekanya selekanyo sa megala e le mebedi ya go bolaya, le ka mogala o le mongwe fela o o tletseng wa go phedisa. Mme Bamoabe ba nna batlhanka ba ga Dafite, ba lere dikabelo.

³Dafite a kgemetha le ene Hatatesere morwa Rehobe, kgosi ya Soba, ka a ya go ba a itseela puso ya gagwe kwa Nokeng.

⁴Dafite a gapa mo go ene bapalama dipitse ba le 1 700, le ba dinao ba le 20 000; dipitse tsotlhe tsa dikara tsa tlhabano Dafite a di kgaola mesifa, a sadisa mo go tsone tse di lekanyeng dikara di le lekgolo.

⁵E rile Basiria ba Damaseko ba tla go thusa Hatatesere kgosi ya Soba, Dafite a kgemetha Basiria, banna ba le 22 000.

⁶Foo Dafite a baya ditlhopha tsa masole mo Siria wa Damaseko; Basiria ba nna batlhanka ba ga Dafite, ba lere dikabelo. Jehofa a naya Dafite phenyo gongwe le gongwe kwa o yang gone.

⁷Dafite a tsaya dithebe tsa gouta tse di ne di le mo batlhankeng ba ga Hatatesere, a di isa kwa Jerusalema.

⁸Kwa Beta le kwa Berothai, metse ya ga Hatatesere, kgosi Dafite a tsaya kgotlho e le kgolo thata gone.

⁹E rile Toi kgosi ya Hamathe a utlwa fa Dafite a kgemethile ntwa yotlhe ya ga Hatatesere,

¹⁰foo Toi a roma Jorame morwawe kwa go kgosi Dafite, a ya go mo dumedisa le go mo segofatsa, ka a tlhabanye le Hatatesere a mo kgemethile; gonne Hatatesere o ne a ntse a tlhabana le Toi. Jorame a tla a tshotse dilwana tsa selefera, le dilwana tsa gouta, le dilwana tsa kgotlho;

¹¹le tsone dilo tseo Dafite a di tshwaela Jehofa, di na le selefera le gouta tse o di mo tshwaetseng tsa merafe yotlhe e o ntseng a e fenya;

¹²tsa Siria le tsa Moabe, le tsa bana ba Amone, le tsa Bafilisitia, le tsa Amaleke, le tsa kgapelo ya ga Hatatesere, morwa Rehobe, kgosi ya Soba.

¹³Dafite a inaya leina ka a bowa kwa go kgemetheng Basiria mo molapong wa Letswai, e bong batho ba le 18 000.

¹⁴A baya ditlhopha tsa masole mo Etome; mo lefatsheng lotlhe la Etome a baya ditlhopa tsa batlhabani, mme Baetome botlhe ba nna batlhanka ba ga Dafite. Jehofa a naya Dafite phenyo gongwe le gongwe kwa o yang gone.

¹⁵Dafite a busa Baiseraele botlhe; Dafite a direla batho botlhe ba gagwe katlholo le tshiamiso.

¹⁶Joabe morwa Seruja e ne e le molaodi wa ntwa; Jehošafate morwa Ahilute e le mokwadi wa ditiralo;

¹⁷Satoke morwa Ahitube, le Ahimeleke morwa Abiathare, e le baperesiti; le Seraia e ne e le mokwaledi;

¹⁸Benaia morwa Joiata, e le molaodi wa Bakerethe le Bapelethe; bomorwa Dafite e le dikala tse dikgolo.