1 Kings 10

¹E rile mohumagadi kgosi ya Sheba a utlwela tumedi ya ga Solomone ka ga leina la ga Jehofa, mohumagadi yoo a tla go mo lekisa ka dipotso tse di thata.

²A tla mo Jerusalema a le lekoko le legolo thata, a na le dikamela tse di belesitseng ditswaiso, le gouta e le kgolo, le majana a a thata go rekwa. Ya re a fitlha kwa go Solomone a bua nae ka ga dilo tsotlhe tse di mo pelong ya gagwe.

³Solomone a mmolelela dipotso tsotlhe tsa gagwe, go sa fitlhega sepe mo kgosing se o se kang a se mmolelela.

⁴E rile mohumagadi kgosi ya Sheba a sena go bona botlhale jotlhe jwa ga Solomone le ntlo e o e agileng,

⁵le dijo tsa lomati lwa gagwe lwa bojelo, le go dula ga batlhanka ba gagwe, le go ema ga badiredi ba gagwe, le diaparo tsa bone, le batsholela dinwelo ba gagwe, le botlhatlogo jo o tlhatlogelang kwa ntlong ya ga Jehofa ka jone; go bo go sa tlhole go le mowa ope mo go ene.

⁶A raya kgosi a re: “Poledi e ke e utlwileng kwa lefatsheng la gaetsho ka ga ditiro tsa gago, le botlhale jwa gago, e ne e le poledi ya mmaanete fela.

⁷Le fa go ntse jalo ga ke a ka ka dumela mafoko ao, go tsamaya ke tla, mme matlho a me a go bona. Bona, le fa e le bontlhanngwe ke ne ke sa bo bolelelwa: Botlhale jwa gago, le letlhogonolo la gago go feta tumedi e ke e utlwileng.

⁸A bo batho ba gago ba le sego; go sego batlhanka ba ba gago ba ba tlholang ba eme fa pele ga gago, ba utlwa botlhale jwa gago.

⁹A go bakwe Jehofa Modimo wa gago, yo o ne a itumela mo go wena, a go baya mo setulong sa bogosi sa Iseraele; e re ka Jehofa a ratile Baiseraele ka gale le ka gale, ke gone ka fa o ne a go dira kgosi ka gone, gore o tle o dire katlholo le tshiamiso.”

¹⁰Mohumagadi a naya kgosi dikilokerame tsa gouta di le 4 000, le ditswaiso di le ditona thata, le majana a a thata go rekwa, ga go a ka ga tlhola go tla ditswaiso tse di letlotlo le le kanang ka le mohumagadi kgosi ya Sheba o ne a le naya kgosi Solomone.

¹¹Le lone lesomo la dikepe tsa ga Hirame tse di lerileng gouta e e tswang kwa Ofire, tsa tlisa letlotlo le legolo la ditlhare tsa maalamuga, le majana a a thata go rekwa, di tswa gone kwa Ofire.

¹²Kgosi ya direla ntlo ya ga Jehofa, le ntlo ya kgosi maotwana ka ditlhare tsa maalamuga, le diharepe, le disaletare, a di direla baopedi; ga go a ka ga tlhola go tla ditlhare tsa maalamuga tse di ntseng jalo, le fa e le go bonwa, nako e sa le eno.

¹³Kgosi Solomone a naya mohumagadi kgosi ya Sheba keletso yotlhe ya gagwe, sengwe le sengwe se o ne a se lopa, kwa ntle ga tse Solomone o ne a di mo naya fela ka go rata ga gagwe ga segosi, mohumagadi a hulara, a ya lefatsheng la ga gabo, ene le batlhanka ba gagwe.

¹⁴Bokete jwa gouta e e neng e tla mo go Solomone ka ngwaga o le mongwe fela e ne e le dikilokerame tsa gouta di le 23 000,

¹⁵kwa ntle ga e babapatsi ba ne ba a tlisa, le ya papalano ya barekisi ba bagolo, le ya dikgosi tsotlhe tsa batho ba ba tlhakatlhakanyeng, le ya balaodi ba lefatshe.

¹⁶Kgosi Solomone a dira dithebe di le 200 tsa gouta e e papetlilweng ka noto; thebe nngwe le nngwe ya dirwa ka dikilokerame di supa tsa gouta e e papetlilweng ka noto.

¹⁷A dira dithejana di le 300 tsa gouta e e papetlilweng ka noto, thejana nngwe le nngwe ya dirwa ka dikilokerame di le pedi tsa gouta; mme kgosi ya di tsenya mo ntlong ya Sekgwa sa Lebanone.

¹⁸Gape kgosi ya dira setulo sa bogosi se segolo ka dinaka tsa tlou, a se manega gouta e e itshekileng thata.

¹⁹Direpudi tse di tlhatlogelang setulong sa bogosi di ne di le thataro, setlhoa sa setulo se bopegile kgogoropo ka kwa morago; mme ga bo go le mabogo ka fa lotlhakoreng longwe le longwe fa bodulong, go eme ditau di le pedi ka fa mabogong.

²⁰Ga bo go eme gone ditau di le 12 mo direpuding tse thataro tsa serepudi ntlheng e nngwe le e nngwe; go ne go sa dirwa mo go ntseng jalo mo bogosing bope bo sele.

²¹Le dinwelo tsotlhe tsa kgosi Solomone e ne e le tsa gouta, le dilwana tsa ntlo ya Sekgwa sa Lebanone e le tsa gouta e e sa pekwang; go se na dipe tsa selefera, selefera se ne se sa kaiwe sepe mo metlheng ya ga Solomone.

²²Gonne kgosi e ne e na le lesomo la dikepe tsa Tarešiše mo lewatleng di na le tsa ga Hirame. Dikepe tsa Tarešiše di ne di tle di tle gangwe fela mo dinyageng di le tharo, di tle le gouta, le selefera le dinaka tsa ditlou, le dikgabo, le diphikoko.

²³Kgosi Solomone a gaisa dikgosi tsotlhe tsa lefatshe ka dikhumo le ka botlhale.

²⁴Lefatshe lotlhe la rata go bona Solomone, go utlwa botlhale jwa gagwe jo Modimo o ne o bo tsentse mo pelong ya gagwe.

²⁵Motho mongwe le mongwe a tle le neo ya gagwe, dilwana tsa selefera, dilwana tsa gouta, diaparo, dibolao, ditswaiso, dipitse, bommoulo ka selekanyo ka ngwaga le ngwaga.

²⁶Solomone a phutha dikara le bapalama dipitse; o ne a na le dikara di le 1 400 le bapalama dipitse ba le 12 000, ba o ne a ba baya mo metseng ya dikara le mo Jerusalema, fa kgosing.

²⁷Mo Jerusalema kgosi ya tlisa selefera sa nna jaaka maje fela, le masetara a a tlatsa a nna jaaka ditlhare tsa masekamore tse di mo lefatsheng la melapo ka bontsi.

²⁸Dipitse tse Solomone o ne a na natso tsa tsewa kwa Egepeto; babapaledi ba kgosi ba di amogele di le makgathi, lekgathi lengwe le lengwe ka tlhatlhwa.

²⁹Kara e ne e tsewa e tswa kwa Egepeto ka dišekela tsa selefera di le 600, pitse e tsewa, e tswa ka 150; ga direlwa jalo dikgosi tsotlhe tsa Bahite, le dikgosi tsa Siria, tsa di tsaya gone ka bone e bong ka bapaledi.