1 Kings 4

¹Kgosi Solomone ya bo e le kgosi ya Baiseraele botlhe.

²Mme tse ke dikgosana tse o ne a na natso: Asaria morwa Satoke moperesiti;

³Elihorefe le Ahija, bomorwa Shiše, e le bakwaledi; Jehošafate morwa Ahilute, mokwadi wa ditiralo;

⁴Benaia Morwa Joiata e le molaodi wa ntwa; Satoke le Abiathare e le baperesiti;

⁵Asaria morwa Nathane e le molaodi wa maotlana; Sabute morwa Nathane e le moperesiti le kala ya kgosi;

⁶Ahišare e le molaodi wa ntlo; Atonirame morwa Abete e le molaodi wa lekgetho.

⁷Solomone o ne a na le maotlana a le 12 a Baiseraele botlhe, e le batho ba ba etleeletsang kgosi le ntlo ya yone ka dijo, mongwe le mongwe a na le go etleetsa ka kgwedi e le nngwe fela mo ngwageng.

⁸Mme a ke maina a bone: Benehure, mo lefatsheng la Eferaime la makgabana;

⁹Benetekere, mo Makasa, le Shaalabime, le Bethešemeše, Elone-bethehanane;

¹⁰Benehesete, mo Arubothe, ga gagwe e ne e le Soko, le lefatshe lotlhe la Hefere;

¹¹Bene-abinatabe, mo Nafathe-dore; ene o ne a tsere Tafathe morwadia Solomone.

¹²Baane morwa Ahilute, mo Taanake le Megido gotlhe, le mo lefatsheng lotlhe la Bethešeane, le le bapileng le Sarethane, fa tlase ga Jesereele, go tswa Bethešeane go ya Abelemehola, go ya go feta Jokeneame;

¹³Bene-gebere, mo Ramothe-gileate; ga gagwe e le metse ya ga Jaire morwa Manase, e e mo Gileate, ee, ga gagwe e ne e le lefatshe la Aragobe, le le mo Bašane, metse e megolo e e 60, e e nang le dithako le mephakalego ya kgotlho;

¹⁴Ahinatabe morwa Ido, mo Mahanaime;

¹⁵Ahimaase, mo Nafetali; le ene a tsaya Basemathe morwadia Solomone go nna mosadi wa gagwe;

¹⁶Baane morwa Hušai, mo Ašere le Bealothe;

¹⁷Jehošafate morwa Parua, mo Isakare;

¹⁸Shimei morwa ele, mo Benjamine;

¹⁹Gebere morwa Uri, mo lefatsheng la Gileate, lefatshe la ga Sihone kgosi ya Baamore le la ga Oge kgosi ya Bašane; e ne e le ene esi leotlana mo lefatsheng leo.

²⁰Bajuta le Baiseraele ba bo ba le bantsi jaaka mošawa o o fa lewatleng ka bontsi, ba ja ba nwa ba dira mokete fela.

²¹Solomone a busa magosi otlhe go tswa Nokeng go ya lefatsheng la Bafilisitia, le kwa molelwaneng wa Egepeto; ba lere dikabelo, ba direla Solomone ka metlha yotlhe ya botshelo jwa gagwe.

²²Dijo tsa ga Solomone tsa letsatsi le le lengwe fela e ne e le dikgetse tsa setou di le 30, le dikgetse tsa boupe di le 60;

²³dikgomo tse di nontshitsweng di le some, dikgomo tse di tswang kwa mahulong di le 20, dinku di le 100, dikukama le ditshephe, le dikgama le dinonyane tse di nontshitsweng.

²⁴Gonne o na a na le taolo mo lefatsheng lotlhe le le moseja ono ga Noka, go tswa Tifesa go ya fela kwa Gasa, o ne a na le taolo mo dikgosing tsotlhe moseja ono ga Noka; mme a na le kagiso ka ntlha tsotlhe tikologong ya gagwe.

²⁵Bajuta le Baiseraele ba ne ba agile ka thagamo, mongwe le mongwe fa tlase ga mofine wa gagwe le fa tlase ga mofeige wa gagwe, go tswa Dane go ya Beerešeba ka metlha ya ga Solomone.

²⁶Solomone o ne a na le maemo a le 40 000 a dipitse tsa dikara tsa gagwe, le bapalama dipitse ba le 12 000.

²⁷Maotlana ao a na a etleeletsa kgosi Solomone le botlhe ba ba tlang lomating lwa kgosi Solomone ka dijo, lengwe le lengwe ka kgwedi ya lone; ga a ka a lesa sepe sa tlhokafala.

²⁸Le barele, le motlhaka wa dipitse, le wa dipitse tse di sianang, ba o isa kwa maotlana a ne a le gone, motho mongwe le mongwe ka fa taolelong ya gagwe.

²⁹Modimo wa naya Solomone botlhale le tlhaloganyo ka botlalo jo bogolo, le botona jwa pelo, fela jaaka mošawa o o fa losing lwa lewatle.

³⁰Botlhale jwa ga Solomone bo ne bo gaisa botlhale jwa bana botlhe ba botlhabatsatsi, le botlhale jotlhe jwa Egepeto.

³¹Gonne o ne a le botlhale bogolo go batho botlhe; bogolo go Ethane wa Moesere, le bogolo go Hemane, le Kalekole, le Darete, bomorwa Mahole; mme tumedi ya gagwe ya nna mo merafeng yotlhe mo tikologong.

³²A bolela diane di le 3 000, le difela tsa gagwe di le 1 005.

³³A bolela ka ga ditlhare, go simolola ka mosetara o o mo Lebanone go ya mosiama o o melang mo lorakong; le gone a bolela ka ga diphologolo, le dinonyane, le dilo tse di gagabang, le ditlhapi.

³⁴Ga tla batho ba ditšhaba tsotlhe, ba tla go utlwa botlhale jwa ga Solomone, ba tswa dikgosing tsotlhe tsa lefatshe tse di utlwetseng botlhale jwa gage.