2 Kings 14

¹E rile ka ngwaga wa bobedi wa ga Joaše morwa Jehoahase kgosi ya Iseraele, Amasia morwa Joaše kgosi ya Juta a simolola go busa.

²O rile a simolola go busa a bo a le dinyaga di le 25. A busa ka dinyaga di le 29 mo Jerusalema. Leina la ga mmaagwe e ne e le Jehoadine wa Jerusalema.

³A dira se se siameng mo matlhong a ga Jehofa; le fa go ntse jalo e seng jaaka Dafite rraagwe; a dira jaaka tsotlhe tse Joaše rraagwe o ne a di dirile.

⁴Le fa go ntse jalo mafelo a a tlotlometseng ga a ka a tlosiwa; batho ba ne ba sa ntse ba isa ditlhabelo, ba fisa maswalo mo mafelong a a tlotlometseng.

⁵Ga dirala ya re bogosi bo sena go tlhomama mo seatleng sa gagwe, a bolaya batlhanka ba gagwe ba ba bolaileng kgosi rraagwe.

⁶Mme bana ba babolai bao ga a ka a ba bolaya, jaaka se se kwadilweng mo lokwalong lwa molao wa ga Moše, jaaka Jehofa a laotse, a re: “Borra batho ba se ka ba bolaelwa bana, le bana ba se ka ba bolaelwa borraabo; mme motho mongwe le mongwe a swele boleo jwa gagwe.”

⁷Baetome a ba bolaela mo Molapong wa Letswai ba le 10 000, a gapa Sela ka ntwa, a go raya leina a re: “Joketheele”, nako e sa le eno.

⁸Foo Amasia a roma batho kwa go Joaše, morwa Jehoahase, morwa Jehu kgosi ya Iseraele a re: “Ntlo re lebanye difatlhogo.”

⁹Joaše kgosi ya Iseraele a roma kwa go Amasia kgosi ya Juta a re: “Sitlwasitlwane yo o ne a le mo Lebanone a roma kwa mosetareng o o mo Lebanone, a re: ‘Naya morwaake morwadio go nna mosadi;’ mme ga feta sebatana se se mo Lebanone, sa gataka sitlwasitlwane.

¹⁰Le gale o kgemethile Baetome, mme pelo ya gago e go goleditse; o nne o belafale ka ga gone, o bo o nne koo gaeno; gonne o tlaa bo o italeletsang go tla o ikutlwisa botlhoko gore o tle o we, e bong wena, le Bajuta nao?”

¹¹Mme Amasia a gana go utlwa. Mme Joaše kgosi ya Iseraele a bolola; mme ene le Amasia kgosi ya Juta ba lebanya difatlhogo kwa Bethešemeše, o e leng wa Juta.

¹²Mme Bajuta ba fenyega fa pele ga Baiseraele, mme mongwe le mongwe wa bone a tshabela kwa mogopeng wa gagwe.

¹³Joaše kgosi ya Iseraele a tshwara Amasia kgosi ya Juta, morwa Joaše, morwa Ahasia kwa Bethešemeše, a ya kwa Jerusalema, a thuba lorako lwa Jerusalema go tswa kgorong ya Eferaime go ya kwa kgorong ya kgokgotsho, boleele jwa mabogo a le makgolo a le mane.

¹⁴A tsaya gouta yotlhe le selefera, le dilwana tsotlhe tse di fitlhelwang mo ntlong ya ga Jehofa le mo dikhumong tsa ntlo ya kgosi, le ba ba ntshitsweng peelano ya motse le bone, mme a boela kwa Samaria.

¹⁵Ditiro tse dingwe tsa ga Joaše tse o ne a di dira le bonatla jwa gagwe, le jaaka a ne a tlhabana le Amasia kgosi ya Juta, a ga di a kwalwa mo lokwalong lwa ditirafalo tsa dikgosi tsa Iseraele?

¹⁶Joaše a robala le borraagwe, a fitlhwa mo Samaria le dikgosi tsa Iseraele; mme Jeroboame morwawe a busa mo boemong jwa gagwe.

¹⁷Mme Amasia morwa Joaše kgosi ya Juta a nama a sa tshedile morago ga loso lwa ga Joaše morwa Jehoahase kgosi ya Iseraele, dinyaga di le 15.

¹⁸Ditiro tse dingwe tsa ga Amasia, a ga di a kwalwa mo lokwalong lwa ditirafalo tsa dikgosi tsa Juta?

¹⁹Ba mo rera mo Jerusalema; a tshabela kwa Lakiše, mme ba mo latedisa batho kwa Lakiše, mme ba mmolaela gone.

²⁰Ba mo lere ka dipitse; a fitlhwa mo Jerusalema le borraagwe, mo motseng wa ga Dafite.

²¹Mme batho botlhe ba Juta ba tsaya Asaria, yo o dinyaga di 16, ba mo dira kgosi mo boemong jwa ga Amasia rraagwe.

²²A aga Elathe, a ba a o busetsa mo Juta, kgosi e sena go robala le borraagwe.

²³E rile ka ngwaga wa 15 wa ga Amasia morwa Joaše kgosi ya Juta, Jeroboame morwa Joaše kgosi ya Iseraele a simolola go busa mo Samaria, mme a busa ka dinyaga di le 41.

²⁴A dira se se bosula mo ponong ya ga Jehofa. Ga a ka a fapoga mo maleong otlhe a ga Jeroboame morwa Nebate, a o ne a leofisa Baiseraele ka one.

²⁵A busa molelwane wa Baiseraele go tswa kwa botsenong jwa Hamathe go ya kwa lewatleng la Areba, ka fa lefokong la ga Jehofa, Modimo wa Iseraele, le o ne a le bua ka motlhanka wa gagwe Jona morwa Amitai, moperofeti, yo e ne e le wa Gathe-hefere.

²⁶Gonne Jehofa o ne a bona patikego ya Baiseraele, fa go ne go le botlhoko thata; gonne go ne go sa sala ope yo o tswaletsweng le yo o itsamaelang fela le gone go se na mothusi ope wa Baiseraele.

²⁷Mme Jehofa ga a ka a re o tla phimola leina la Baiseraele fa tlase ga legodimo; mme a ba golola ka Jeroboame morwa Joaše.

²⁸Jaana ditiro tse dingwe tsa ga Jeroboame le tsotlhe tse o ne a di dira le bonatla jwa gagwe, le jaaka a ne a tlhabana, le jaaka a ne a busa Damaseko le Hamathe, e e kileng ya ne e le metse ya Juta, a e busetsa mo Iseraele, a ga go a kwalwa mo lokwalong lwa ditirafalo tsa dikgosi tsa Iseraele?

²⁹Mme Jeroboame a robala le borraagwe, e bong le dikgosi tsa Iseraele; mme Sekaria morwawe a busa mo boemong jwa gagwe.