2 Kings 19

¹Ga dirala e rile kgosi Hesekia a utlwa, a ikgagola diaparo, a ikhurumetsa ka letsela la kgetsi, mme a ya mo ntlong ya ga Jehofa.

²A roma Eliakime yo o laolang ntlo, le Shebene mokwaledi, le bagolwane ba baperesiti, ba ikhurumeditse ka letsela la kgetsi, ba ya kwa go Isaia moperofeti, morwa Amose.

³Ba mo raya ba re: “Hesekia o bua jaana, a re: ‘Letsatsi leno ke letsatsi la tlalelo, le la kgalemo, le la kgalo; gonne bana ba gaufi le go tsalwa mme ga go na thata ya go belega.

⁴E tlaa re gongwe Jehofa Modimo wa gago a utlwa mafoko a ga Rabešake, yo kgosi ya Asiria mong wa gagwe o mo romileng, gore a tle go kgoba Modimo o o tshedileng, le go kgalemela mafoko a Jehofa Modimo wa gago o a utlwileng; ke gone o rapelele masalela a a setseng.’ ”

⁵Batlhanka ba ga Hesekia ba tla kwa go Isaia.

⁶Mme Isaia a ba raya a re: “Lo tlaa raya mong wa lona jaana, lo re: Jehofa o bua jaana a re: ‘O se ka wa boifa mafoko a o a utlwileng, a batlhanka ba kgosi ya Asiria ba nkgadileng ka one.

⁷Bona, ke tlaa tsenya mowa mongwe mo go ene, mme o tlaa utlwa tumo nngwe, o tlaa boela lefatsheng la ga gabo; mme ke tlaa mo usa ka tšhaka kwa lefatsheng la ga gabo.’ ”

⁸Jalo Rabešake a bowa, a fitlhela kgosi ya Asiria e tlhabana le Libena; gonne o na a utlwile fa a tlogile mo Lakiše.

⁹Ya re a utlwa go bolelwa ka ga Tirehaka kgosi ya Ethiopia, go twe: “Bona, o bolotse, o tsile go tlhabana nao.” a tloga a roma batho gape kwa go Hesekia a re:

¹⁰“Lo bue le Hesekia kgosi ya Juta jaana, lo re: A Modimo wa gago o o ikanyang mo go one o se go tsietse, o re: Jerusalema ga o ketla o tsenngwa mo seatleng sa kgosi ya Asiria.

¹¹Bona, o utlwile se dikgosi tsa Asiria di se diretseng mafatshe otlhe, ka go a senyetsa ruri; mme a wena o tlaa gololwa?

¹²A medimo ya merafe e e golotse, e borre ba e sentseng, e bong, Gosane, le Harane le Resife, le bana ba Edene ba ba kileng ba ne ba le mo Telasare?

¹³Kgosi ya Hamathe e kae, le kgosi ya Arepate, le kgosi ya motse wa Sefarefaime, ya Hena, le ya Ifa?”

¹⁴Hesekia a amogela lokwalo mo seatleng sa barongwa, mme a lo bala; Hesekia a ya kwa ntlong ya ga Jehofa, a lo baya fa pele ga Jehofa.

¹⁵Hesekia a rapela fa pele ga Jehofa a re: “Jehofa Modimo wa Iseraele, yo o dutseng gare ga botšheruba, ke wena Modimo, e bong wena wesi wa magosi otlhe a lefatshe; o dirile legodimo le lefatshe.

¹⁶A ko o sekege tsebe Jehofa, o utlwe; o tle o buduloge matlho, Jehofa, o bone; o utlwe mafoko a ga Senakeribe, a o mo romileng ka one go tla go kgoba Modimo o o tshedileng.

¹⁷Ruri Jehofa, dikgosi tsa Asiria di swafaditse merafe le mafatshe a yone.

¹⁸Di bile di latlhetse medimo ya yone mo molelong; gonne e ne e se medimo epe, fa e se tiro ya diatla tsa batho fela, dikgong le maje; ke gone ka fa ba e sentseng ka gone.

¹⁹Ke gone jaana, Jehofa Modimo wa rona, ke a go rapela, a ko o re golole mo seatleng sa gagwe gore magosi otlhe a lefatshe a itse fa e le wena Jehofa Modimo, e bong wena wesi.”

²⁰Foo Isaia morwa Amose a roma kwa go Hesekia, a re: Jehofa Modimo wa Iseraele o bua jaana a re: “E re ka o nthapetse ka ga Senakeribe kgosi ya Asiria, ke go utlwile.

²¹Le, ke lefoko le Jehofa o le buileng ka ga gagwe, a re: “Morwadia Sione wa kgarebana o go nyaditse, a go tshega ka tshotlo; morwadia Jerusalema o go thukhuthetse tlhogo.

²²Ana o kgobile mang, wa kgala mang? O tsholeleditse mang lentswe, wa lebisa matlho a gago ka lokubana kwa go mang? Ke Moitshepi wa Iseraele fela.

²³O kgobile Jehofa ka barongwi ba gago, o rile: ‘Ke tlhatlogetse kwa ditlhoreng tsa dithaba ka bontsi jwa dikara tsa me, kwa tengteng ga Lebanone; wa re: Ke tlaa rema masetara a gone a a godileng, le ditlhare tsa mafira tse di tlhophegileng tsa gone; ke tlaa tsena kwa botlholeng jwa gagwe jo bo kwa kgakalakgakala, e bong sekgwa sa lotlhagare lwa gagwe lo lo ungwang.

²⁴Wa re: Ke epile ke nole metsi a seeng, ke tlaa tšhesa dinoka tsotlhe tsa Egepeto ka sebete sa lonao lwa me.’

²⁵A ga o a utlwa fa nna ke sa le ke go dira bogologolo, nna ka go bopa mo metlheng ya bogologolo? Jaana ke go dirafaditse, gore wena o tle o nne motho wa go swafatsa metse e e thekeleditsweng le go dira mekoa ya marope fela.

²⁶Ke gone ka moo banni ba yone ba ne ba le thata e potlana, ba boifa, ba tlhakana tlhogo; ba ne ba ntse jaaka bojang jwa naga, le jaaka morogo o motala, jaaka bojang mo ditlhoreng tsa matlo, le jaaka mabele a a tshubegileng a ise a gole.

²⁷Ke a go itse: go dula ga gago, le go tswa ga gago, le go tsena ga gago, le go ntšhakgalela ga gago.

²⁸Ka ntlha ya go ntšhakgalela ga gago, le ka gonne boitelaganyo jwa gago bo tsile go ntsena mo ditsebeng, ke gone ke tlaa go tsenyang kgoge ya me mo nkong, le mogolaseto wa me mo ganong la gago, ke tlaa go busa ka tsela e o tsileng ka yone.

²⁹“Se e tlaa nna sekao mo go wena: Monongwaga lo tlaa ja maijadi fela, le ka ngwaga wa bobedi lo tlaa ja matshwabudu a one; ka ngwaga wa boraro lo jale, lo robe, lo tlhome masimo a mafine, mme lo je muango a one.

³⁰Masalela a a falotseng a ntlo ya ga Juta, a tlaa melela kwa tlase, a ungwela godimo.

³¹Gonne masalela a tlaa tswa mo Jerusalema, le mo thabaneng ya Sione, go tlaa tswa ba ba tlaa falolang; tlhoafalo ya ga Jehofa e tlaa dira seo se.

³²“Ka ntlha ya gone moo, Jehofa o bua jaana ka ga kgosi ya Asiria, a re: “ ‘Ga a ketla a tla mo motseng o, le fa e le go hulela motswi gone, le gone ga a ketla a tla fa pele ga one ka thebe, le fa e le go o tsosetsa lomota.

³³O tlaa boa ka tsela e o tsileng ka yone, mme ga a ketla a tla mo motseng o, go bua Jehofa.

³⁴Gonne ke tlaa tlhabanela motse o go o boloka, ka ntlha ya me, le ka ntlha ya motlhanka wa me Dafite.’ ”

³⁵Ga dirala, ya re bosigo joo, moengele wa ga Jehofa a tswa, a tsena bothibelelong jwa Baasiria, a gaila batho ba le 185 000; ya re batho ba phakela ka moso, bonang, ba bo ba le ditoto botlhe fela.

³⁶Senakeribe kgosi ya Asiria a tloga, a boa, mme a nna mo Ninife.

³⁷Ga dirala, ya re a sa ntse a obame mo ntlong ya ga Niseroke modimo wa gagwe, Aterameleke le Sharesere ba mmolaya ka tšhaka; ba falolela kwa lefatsheng la Ararate. Esare-hatone morwawe a busa mo boemong jwa gagwe.