2 Kings 22

¹E rile Josia a simolola go busa a bo a le dinyaga di le 8; a busa ka dinyaga di le 31 mo Jerusalema; leina la ga mmaagwe e ne e le Jetita morwadia Ataia wa Bosekathe.

²A dira se se siameng mo matlhong a ga Jehofa, a sepela mo tseleng yotlhe ya ga Dafite rraagwe, a se ka a fapogela ka fa ntlheng ya le legolo kgotsa ya la molema.

³Ga dirala ya re ka ngwaga wa 18 wa kgosi Josia, kgosi ya roma Shafane morwa Asalia, morwa Mešulame, mokwaledi kwa ntlong ya ga Jehofa, a re:

⁴“Ya kwa go Hilekia moperesiti yo mogolo, gore a tle a bale madi a a lerilweng mo ntlong ya ga Jehofa, a balebedi ba kgoro ba a phuthileng mo bathong.

⁵A ba a tsenye mo seatleng sa badiri ba e leng balebedi ba ntlo ya Jehofa; a ba a neye badiri ba ba mo ntlong ya ga Jehofa go mamatlela mathubego a ntlo.

⁶Ba a neye babetli, le baagi, le baagi ba dimota; ba a ntshetse go reka dikgong le maje a a betlilweng go tla ba mamatlelela ntlo.”

⁷Mme le fa go ntse jalo go ne go sa dirwe palo nabo ya madi a a tsentsweng mo seatleng sa bone; gonne ba dira ka boikanngo.

⁸Hilekia moperesiti yo mogolo a raya Shafane mokwaledi a re: “Ke bonye lokwalo lwa molao mo ntlong ya ga Jehofa.” Hilekia a neela Shafane lokwalo, a lo bala.

⁹Shafane mokwaledi a ya kwa kgosing, a busetsa phetolo kwa kgosing, a re: “Batlhanka ba gago ba phuthile madi a a fitlhetsweng mo ntlong, ba a tsentse mo seatleng sa badiri ba ba lebelang ntlo ya ga Jehofa.”

¹⁰Shafane mokwaledi a bolelela kgosi a re: “Hilekia moperesiti o nneetse lokwalo.” Mme Shafane mokwaledi a lo bala fa pele ga kgosi.

¹¹Ga dirala, e rile kgosi e sena go utlwa mafoko a lokwalo lwa molao, a ikgagola diaparo.

¹²Kgosi ya laola Hilekia moperesiti, le Ahikame morwa Shafane, le Akebore morwa Mikaia, le Shafane mokwaledi, le Asaia motlhanka wa kgosi, ya re:

¹³“Yang lo botse mo go Jehofa, lo boletse nna le batho, le Bajuta botlhe ka ga mafoko a lokwalo lo lo bonyweng; gonne bogale jwa ga Jehofa jo bo re tuketseng bo bogolo, ka borraetsho ba se ka ba reetsa mafoko a lokwalo lo, go dira jaaka tsotlhe tse di kwadilweng ka ga rona.”

¹⁴Jalo Hilekia moperesiti, le Ahikame, le Akebore, le Shafane, le Asaia ba ya kwa go Huleta moperofeti wa sesadi, mosadi wa ga Shalume morwa Tikefa, morwa Harahase, molebedi wa diaparo; (jaana Huleta o ne a agile mo Jerusalema mo kgaolong ya bobedi;) mme ba bua nae.

¹⁵Mosadi a ba raya a re: “Jehofa Modimo wa Iseraele o bua jaana, a re: ‘Rayang monna yo o lo romileng kwa go nna lo re:

¹⁶Jehofa o bua jaana a re: Bona, ke tlaa tlisa bosula mo felong fa, le mo banning ba gone, e bong mafoko otlhe a lokwalo lo kgosi ya Juta e lo badileng;

¹⁷ka ba ntatlhile, ba fisetsa medimo e sele maswalo, gore ba tle ba ntlhotlheletse bogaleng ka ditiro tsotlhe tsa diatla tsa bone; ke gone ka moo bogale jwa me bo tlaa tukela felo fa, mme ga bo ketla bo tingwa.’

¹⁸Kgosi ya Juta e e lo romileng gore lo botse mo go Jehofa, lo mo reye jaana, lo re: ‘Jehofa Modimo wa Iseraele o bua jaana a re: Ka ga mafoko a o a utlwileng:

¹⁹E re ka pelo ya gago e ne e sisimoga, mme wa ikokobetsa fa pele ga Jehofa, jale ka o utlwa se ke se buileng ka ga felo fa, le ka ga banni ba gone, ka re, ba tlaa nna tshwafatso le phutso, mme o ikgagotse diaparo, wa lela fa pele ga me; le nna ke go utlwile, go bua Jehofa.’

²⁰Ke gone bona, ke tlaa go phuthela kwa go borraago, mme o tlaa phuthelwa phupung ya gago ka kagiso, le gone matlho a gago ga a ketla a bona bosula jotlhe jo ke tlaa bo tlisang mo felong fa.” Mme ba busetsa phetolo e kwa kgosing.