2 Kings 24

¹E rile mo metlheng ya gagwe, Nebukatenesare kgosi ya Babilone a tla, Jehoiakime a tswa motlhanka wa gagwe ka dinyaga di le tharo; foo a sokologa a mo tsuololela.

²Mme Jehofa a mmololetsa manokwane a Bakalatea, le manokwane a Basiria, le manokwane a Bamoabe, le manokwane a bana ba Amone, a ba roma kwa lefatsheng la Juta gore ba le senye, ka fa lefokong la ga Jehofa le o ne a le bua ka baperofeti batlhanka ba gagwe.

³Ruri selo se, se tsile mo go Bajuta ka taolo ya ga Jehofa, go tla se ba tlosa mo ponong ya gagwe, ka ntlha ya maleo a ga Manase, ka fa tsotlhe tse o ne a di dira;

⁴le gone ka ntlha ya madi a batho a a se nang molato a o ne a a tsholola; gonne o ne a tlatsa Jerusalema ka madi a a se nang molato; mme Jehofa a gana go itshwarela.

⁵Ditiro tse dingwe tsa ga Jehoiakime le tsotlhe tse o ne a di dira, a ga di a kwalwa mo lokwalong lwa ditirafalo tsa dikgosi tsa Juta?

⁶Mme Jehoiakime a robala le borraagwe, mme Jehoiakine morwawe a busa mo boemong jwa gagwe.

⁷Mme Kgosi ya Egepeto ga ya a ka ya tlhola e tswa mo lefatsheng la ga yone; gonne kgosi ya Babilone e ne e gapile gotlhe mo e ne e le ga kgosi ya Egepeto, go tswa molatswaneng wa Egepeto go ya nokeng ya Euferatese.

⁸E rile Jehoiakine a simolola go busa a bo a le dinyaga di le 18; mme a busa ka dikgwedi di le tharo mo Jerusalema; leina la ga mmaagwe e ne e le Nehušete morwadia Elenathane wa Jerusalema.

⁹A dira se se bosula mo ponong ya ga Jehofa, jaaka tsotlhe tse rraagwe o ne a di dira.

¹⁰Ya re ka lobaka loo batlhanka ba ga Nebukatenesare kgosi ya Babilone ba tla Jerusalema, mme motse wa tlhaselwa.

¹¹Nebukatenesare kgosi ya Babilone a tla kwa motseng batlhanka ba gagwe ba ntse ba o tlhasela.

¹²Jehoiakine kgosi ya Juta a tswela kwa kgosing ya Babilone, ene le mmaagwe, le batlhanka ba gagwe, le dikgosana tsa gagwe, le baopafadiwi ba gagwe. Kgosi ya Babilone ya mo tshwara ka ngwaga wa 8 wa puso ya gagwe.

¹³Ya ntsha gone dikhumo tsotlhe tsa ntlo ya ga Jehofa, le dikhumo tsa ntlo ya kgosi, ya kgaolakgaola dilwana tsotlhe tsa gouta tse Solomone kgosi ya Iseraele o kileng a di dira mo tempeleng ya ga Jehofa, jaaka Jehofa a buile.

¹⁴A tlosa ba Jerusalema botlhe, le dikgosana tsotlhe, le diganka tsotlhe tse di pelokgale, le ditshwarwa di le 10 000, le botlhe baitse ba ditiro, le bathudi; ga go a ka ga sala ope fa e se bahumanegi fela ba batho ba lefatshe.

¹⁵A isa Jehoiakine kwa Babilone, le mma kgosi, le basadi ba kgosi, le baopafadiwi ba yone, le batho ba batona ba lefatshe, a ba isa botshwarong kwa Babilone, a ba tlosa mo Jerusalema.

¹⁶Le banna botlhe ba ba dinatla ba le 7 000, le baitse ba ditiro, le bathudi ba le 1 000, botlhe e le ba ba thata, le ba ba tshwanetseng ntwa, kgosi ya Babilone ya ba isa le bone kwa Babilone e le ditshwarwa fela.

¹⁷Kgosi ya Babilone ya dira Matania rangwanaagwe kgosi mo boemong jwa gagwe, mme a mo raya leina le sele a re, Setekia.

¹⁸E rile Setekia a simolola go busa a bo a le dinyaga di le 21; mme a busa ka dinyaga di le 11 mo Jerusalema; leina la ga mmaagwe e ne e le Hamutale morwadia Jeremia wa Libena.

¹⁹A dira se se bosula mo ponong ya ga Jehofa, jaaka tsotlhe tse Jehoiakime a ne a di dira.

²⁰Gonne ya re ka ntlha ya bogale jwa ga Jehofa ga dirala jalo mo Jerusalema le mo Juta, ga tsamaya a ba latlha ba tswa mo ponong ya gagwe; mme Setekia a tsuololela kgosi ya Babilone.