1 Chronicles 14

¹Hirame kgosi ya Ture a roma batho kwa go Dafite ba na le ditlhare tsa masetara le baagi le babetli ba dikgong, ba tla go mo agela ntlo.

²Dafite a lemoga fa Jehofa a mo tlhomamisitse kgosi ya Iseraele, gonne bogosi jwa gagwe bo no bo goleditswe godimo, ka ntlha ya batho ba gagwe Baiseraele.

³Dafite a fela a tsaya basadi ba bangwe mo Jerusalema, Dafite a fela a tshola bana ba basimane le ba basetsana.

⁴A ke maina a bana ba o ba bonyeng mo Jerusaleme: Shamue, Shobabe, Nathane le Solomone;

⁵le Ibehare le Elišua le Elepelete;

⁶le Noga le Nefege le Jafie,

⁷le Elišame le Beeliate le Elifelete.

⁸E rile Bafilisitia ba utlwa fa Dafite a tloditswe, gore a nne kgosi ya Baiseraele botlhe fela, Bafilisitia botlhe ba ya go senka Dafite; mme Dafite a go utlwela, mme a ba bololela.

⁹Jaana Bafilisitia ba ne ba tsile bonokwane mo molapong wa Refaime.

¹⁰Dafite a botsa mo Modimong, a re: “A ke ke bololele Bafilisitia? Mme a o tlaa ba ntsenya mo seatleng?” Jehofa a mo raya a re: “Bolola; gonne ke tlaa ba go tsenya mo seatleng.”

¹¹Jalo ba tlhatlogela kwa Baale-perasime, Dafite a ba kgemetha gone; mme Dafite a re: “Modimo o thubakile baba ba me ka letsogo la me, jaaka go thobega ga metsi.” Ke gone ka moo ba reileng felo foo leina ba re, Baale-perasime.

¹²Mme ba tlogela medimo ya bone gone, mme Dafite a laola gore e fisiwe ka molelo.

¹³Bafilisitia ba tla ka bonokwane gape mo molapong.

¹⁴Dafite a botsa mo Modimong gape; mme Modimo wa mo raya wa re: “O se ka wa ba sala morago; ba fapoge, o itse go ba wela bolebagana le ditlhare tsa malubere.

¹⁵Go tlaa dirala go re fa o utlwa ekete modumo wa ba ba tsamaelang gongwe mo dikaleng tsa ditlhare tsa malubere, foo o tswele go tlhabana; gonne Modimo o ile kwa pele ga gago go ya go kgemetha ntwa ya Bafilisitia.”

¹⁶Mme Dafite a dira jaaka Modimo o mo laotse, mme ba kgemetha ntwa ya Bafilisitia go tswa Gibeone go ya fela kwa Gesere.

¹⁷Tumedi ya ga Dafite ya tswela kwa mafatsheng otlhe; mme Jehofa a tsenya poifo ya gagwe mo merafeng yotlhe fela.