1 Chronicles 16

¹Ba gorosa letlole la kgolagano ya Modimo, ba le baya mo gare ga mogope o Dafite o o le tlhometseng; ba isa ditshupelo tse di fisiwang, le ditshupelo tsa kagiso fa pele ga Modimo.

²E rile Dafite a sena go wetsa go isa tshupelo e e fisiwang, le ditshupelo tsa kagiso, a segofatsa batho ka leina la ga Jehofa.

³A abela mongwe le mongwe wa Baiseraele, monna le mosadi, mongwe le mongwe kgolokwe ya senkgwe, le sebeka sa nama, le mongoloi wa ditshwabi tsa mefine.

⁴A tlhoma bangwe ba Balefi, gore ba direle fa pele ga letlole la ga Jehofa, le go tumisa, le go leboga, le go baka Jehofa Modimo wa Iseraele.

⁵Asafe e le yo mogolo, wa bobedi mo go ene e le Sekaria, Jeiele, le Shemi-ramothe, le Jehiele, le Matithia, le Eliabe, le Benaia, le Obete-etome le Jeiele, ba na le disaletere le diharepe; mme Asafe a tsosa modumo o mogolo ka disemebala;

⁶Benaia le Jahasiele ba baperesiti ba letsa dinaka ka metlha yotlhe fa pele ga letlole la kgolagano ya Modimo.

⁷Ke gone ka tsatsi leo Dafite a simolola sa ntlha go laola gore go bakwe Jehofa ka Asafe le bana ba ga rraagwe. A re:

⁸“A ko lo ntshetseng Jehofa malebogo, bitsang leina la gagwe madiro a gagwe lo a itsefatse mo ditšhabeng.

⁹Mo opeleleng, mo opeleleng dipako, buang ka ga ditiro tsotlhe tsa gagwe tse di gakgamatsang.

¹⁰Kgantshang ka leina la gagwe le le itshepileng; a dipelo tsa bone ba ba batlang Jehofa di itumele.

¹¹Batlang Jehofa le thata ya gagwe; batlang sefatlhogo sa gagwe ka bosakhutleng.

¹²Gakologelwang ditiro tsa gagwe tse di gakgamatsang, tse o di dirileng; dikgakgamatso tsa gagwe, le dikatlholo tsa molomo wa gagwe;

¹³lona losika lwa ga Iseraele motlhanka wa gagwe, lona bana ba ga Jakoba, baitshenkedwi ba gagwe.

¹⁴Ke ene Jehofa Modimo wa rona; dikatlholo tsa gagwe di mo lefatsheng lotlhe.

¹⁵Gakologelwang kgolagano ya gagwe ka bosakhutleng, e bong lefoko le o le laoletseng dikokomana di le makgolo a some;

¹⁶e bong kgolagano e o ne a e dira le Aberahame, le ikano ya gagwe le Isake.

¹⁷Ikano eo o bile a e tlhomamisetsa Jakobe, gore e nne molao o o emeng, gape le Iseraele, gore e nne kgolagano e e sa khutleng,

¹⁸ka a re: ‘Lefatshe la Kanana ke tlaa le naya wena, go nna kabelo ya boswa jwa lona;’

¹⁹jale ka lo le batho ba se kae mo palong, ee, lo le ba se kaenyana, e bile lo le bajaki fela mo go lone.

²⁰Ba kgarakgatshega ka go nna ba tlhomaganya merafe fela, ba tswe bogosing jo bongwe ba ye tšhabeng e nngwe.

²¹Ga a ka a leseletsa motho ope go ba direla tshiamololo; ee, o ne a kgalemela dikgosi ka ntlha ya bone;

²²A re: ‘Se ameng batlodiwa ba me, lo se ka lwa utlwisa baperofeti ba me botlhoko bope.’

²³Lefatshe lotlhe opelela Jehofa! Bonatsa poloka ya gagwe ka go tlhomaganya malatsi.

²⁴Kakanyang kgalalelo ya gagwe mo gare ga merafe, ditiro tsa gagwe tse di gakgamatsang mo gare ga ditšhaba tsotlhe!

²⁵Gonne Jehofa o mogolo, o na le go bakwa segolo, le gone o na le go boifiwa bogolo go medimo yotlhe.

²⁶Gonne medimo yotlhe ya ditšhaba ke dilo fela, ene Jehofa o dirile magodimo.

²⁷Tlotlo e fa pele ga gagwe, le borena, thata le boitumelo di mo felong ga gagwe.

²⁸Ntshetsang Jehofa lona ditshika tsa ditšhaba, ntshetsang Jehofa kgalalelo le thata!

²⁹Ntshetsang Jehofa kgalalelo e e tshwanetseng leina la gagwe; lereng tshupelo, lo tle fa pele ga gagwe! Obamelang Jehofa mo bontleng jwa boitshepo.

³⁰Lefatshe lotlhe a le rorome fa pele ga gagwe; lobopo le lone lo nitame, ga lo kake lwa tsikinngwa.

³¹A magodimo a itumele, a lefatshe le ipele; a go buiwe mo merafeng go twe: ‘Jehofa o a busa!’

³²A lewatle le sume, le bojotlhe jwa lone, a naga e belafale, le tsotlhe tse di mo go lone!

³³Foo ditlhare tsa sekgwa di tlaa opela ka boitumelo fa pele ga Jehofa, gonne o tla go atlhola lefatshe.

³⁴A ko lo ntshetseng Jehofa malebogo; gonne o molemo; gonne boutlwelo botlhoko jwa gagwe bo eme ka bosakhutleng.

³⁵Lo bue lo re: ‘Re boloke Jehofa wa poloko ya rona, o bo o re phuthe o re golole mo merafeng, gore re tle go baka leina la gago le le itshepileng, le go ja koma mo pakong ya gago.’

³⁶A go bakwe Jehofa Modimo wa Iseraele, go tswa bosasimologeng go ya fela bosakhutleng.” Mme batho botlhe ba re: “Amen!” Mme ba baka Jehofa.

³⁷Jalo a tlogela Asafe le bana ba ga rraagwe gone fa pele ga letlole la kgolagano ya ga Jehofa, go tla ba direla fa pele ga letlole ka metlha yotlhe, jaaka tiro ya letsatsi lengwe le lengwe e lopa;

³⁸le boObete-etome le bana ba ga rraagwe, batho ba le 68, le Obete-etome morwa Jeduthune le Hosa, ba bile ba le balebedi ba mojako.

³⁹Mme Satoke moperesiti le bana ba ga rraagwe ba baperesiti, ba le fa pele ga motlaagana wa ga Jehofa mo felong fa go tlotlometseng mo go mo Gibeone,

⁴⁰go tla ba isetsa Jehofa ditshupelo tse di fisiwang mo sebesong sa tshupelo e e fisiwang ka metlha yotlhe, ka moso le maitsebowa, e bong jaaka tsotlhe tse di kwadilweng mo molaong wa ga Jehofa, o o o laoletseng Baiseraele.

⁴¹Mme ba bo ba na le Hemane le Jeduthune, le ba bangwe ba ba itshenketsweng, ba ba badilweng ka maina go tla ba baka Jehofa ka gobo boutlwelo botlhoko jwa gagwe bo eme ka bosakhutleng.

⁴²Mme Hemane le Jeduthune ba bo ba na nabo, ba na le dinaka le disemebala, ba di tsholetse bone ba ba tlaa bong ba dumisetsa godimo, ba bile ba na le diletso tsa dikopelo tsa Modimo. Bomorwa Jeduthune ba bo ba laotswe go nna fa kgorong.

⁴³Batho botlhe ba tsamaya, mongwe le mongwe a ya kwa ga gagwe, mme Dafite a boa a ya go segofatsa ntlo ya gagwe.