1 Chronicles 23

¹Jaana Dafite o ne a tsofetse, a le metlha e e tletseng; mme a baya Solomone morwawe kgosi ya Iseraele.

²Mme a phutha dikgosana tsotlhe tsa Iseraele di na le baperesiti le Balefi.

³Balefi ba bo ba balwa e le ba ba dinyaga di 30 go ya kwa go bomogoloa bone, palo ya bone ka ditlhogo tsa bone, monna le monna, e ne e le 38 000.

⁴“Mo go bao ga bo go le 24 000 e le balebalebi ba tiro ya ntlo ya ga Jehofa; 6 000 e le balaodisiwa le baatlhodi,

⁵ba ba 4 000 e le balebedi ba mejako; ba ba 4 000 ba baka Jehofa ka diletso tse ke di dirileng,” go bua Dafite, “ka re go tle go bakwe ka tsone.”

⁶Dafite a ba kgaoganya makoko a a fapaanang fela jaaka bomorwa Lefi ba ntse, e bong Gerešone le Kohathe le Merari.

⁷Ga Bagerešone: e ne e le Latane le Shimei.

⁸Bomorwa Latane: e le Jehiele yo mogolo, Sethame le Joele, ba le bararo.

⁹Bomorwa Shimei: e le Shelomothe, Hasiele le Harane, ba le bararo. Bao e ne e le ditlhogo tsa matlo a borraabo tsa ga Latane.

¹⁰Le bomorwa Shimei: Jahathe, Sine, Jeuše le Beria. Ba bane bao e le bomorwa Shimei.

¹¹Jahathe e ne e le yo mogolo, Sisa e le wa bobedi; Jeuše le Beria ba bo ba se na bana ba basimane ba le bantsi; ka ntlha ya moo ba nna ntlo ya borra batho kgotla e le nngwe fela.

¹²Bomorwa Kohathe: Amerame, le Isahare, le Heberone le Usiele, ba le bane.

¹³Bomorwa Amerame: Arone le Moše: Arone a lomololwa, gore a tle a itshepise dilo tse di boitshepo jo bo itshepileng, ene le bomorwawe, ka bosakhutleng, go tla ba fisa maswalo fa pele ga Jehofa, go mo direla le go baka leina la gagwe ka bosakhutleng.

¹⁴Ka ga Moše, monna wa Modimo, bomorwawe ba ne ba balelwa mo lotsong lwa ga Lefi.

¹⁵Bomorwa Moše: Gerešome le Eliesere.

¹⁶Bomorwa Gerešome: Shebuele yo mogolo.

¹⁷Bomorwa Eliesere e ne e le Rehabia yo mogolo. Eliesere o ne a se na ba sele bana ba basimane; bomorwa Rehabia ba bo ba le bantsi thata.

¹⁸Bomorwa Isehare: Shelomithe yo mogolo.

¹⁹Bomorwa Heberone: Jeria yo mogolo, wa bobedi Amaria, wa boraro Jahasiele, wa bone Jekameame.

²⁰Bomorwa Usiele: Mika yo mogolo, wa bobedi Isešia.

²¹Bomorwa Merari: Mahali le Muši. Bomorwa Mahali: Eleasare le Kiše.

²²Eleasare a swa a se na bana ba basimane fa e se ba basetsana fela; bomorwa rraabo, e bong bomorwa Kiše ba ba nyala.

²³Bomorwa Muši: Mahali, le Etere, le Jeremothe, ba le bararo.

²⁴Ba e ne e le bomorwa Lefi ka fa matlong a borraabo, e bong ditlhogo tsa matlo a borraabo, tsa bone ba ba badilweng mo go bone, mo palong ya maina ka ditlhogo tsa bone, ba ba dirang tiro ya tirelo ya ntlo ya Jehofa, go simolola ka ba ba dinyaga di 20 le bomogoloa bone.

²⁵Gonne Dafite o ne a re: “Jehofa Modimo wa Iseraele, o neile batho ba gagwe boikhutso; o agile mo Jerusalema ka bosakhutleng.

²⁶Le bone Balefi ga ba ke ba tlhola ba na le go rwala motlaagana le dilwana tsa one tsa tirelo ya one.”

²⁷Gonne bomorwa Lefi ba tlogile ba balwa ka mafoko a bofelo a ga Dafite, go simolola ka ba ba dinyaga di 20 go ya kwa go bomogoloa bone.

²⁸Gonne tiro ya bone e le go lebelela mo go bomorwa Arone mo tirelong ya ntlo ya ga Jehofa, mo malwapeng, mo matlwaneng le mo go ntlafatseng dilo tsotlhe tse di itshepileng, e bong tiro ya tirelo ya ntlo ya Modimo,

²⁹le mo go sone senkgwe sa tshupo, le mo setoung sa tshupelo ya boupe, le fa e le sa dinkgwenyana tse di lotsatsana tse di sa bedisiwang, kgotsa sa se se besitsweng mo pitseng e e lokhaetla, kgotsa sa se se kokobileng, le sa seelo sengwe le sengwe, le go lekanya botona;

³⁰le go ema ka meso yotlhe ba leboga ba baka Jehofa, le gone mo maitseboeng;

³¹le go isa ditshupelo tsotlhe tse di fisiwang di isediwa Jehofa, mo bosabateng, le mo metlheng ya go rogwa ga dikgwedi, le mo metlheng ya mediro e e tlhomilweng, di le palo e e emeng ka fa molaong o o tlhomilweng ka ga yone, ka metlha yotlhe fa pele ga Jehofa.

³²Le gore ba tle ba lebele mogope wa bophuthegelo, le go lebela felo ga boitshepo, le go lebelela bomorwa Arone bomogoloa bone, mo tirelong ya ntlo ya ga Jehofa.