2 Chronicles 5

¹Jalo tiro yotlhe e Solomone o ne a e direla ntlo ya ga Jehofa ya wediwa. Solomone a isa dilo tse Dafite rraagwe o ne a di tshwaetse Modimo; e bong selefera le gouta le dilwana tsotlhe, a di tsenya mo mabolokelong a dikhumo a ntlo ya Modimo.

²Foo Solomone a phutha bagolwane ba Iseraele, le ditlhogo tsotlhe tsa ditso, le dikgosana tsa makgotla a borara ba bana ba Iseraele, a ba phuthela mo Jerusalema, go tla ba tlhatlosa letlole la kgolagano ya ga Jehofa kwa motseng wa ga Dafite, o e leng Sione.

³Banna botlhe ba Iseraele ba phuthegela kwa kgosing mo modirong, o o neng o jewa ka kgwedi ya bosupa.

⁴Bagolwane botlhe ba Iseraele ba tla, mme Balefi ba tsholetsa letlole.

⁵Ba tlhatlosa letlole, le mogope wa bophuthegelo, le dilwana tsotlhe tse di itshepileng tse di ne di le mo mogopeng; tseo baperesiti ba Balefi ba di tlhatlosa.

⁶Kgosi Solomone le phuthego yotlhe ya Baiseraele, e e phuthegetseng kwa go ene, ba bo ba le fa pele ga letlole, ba isa ditlhabelo tsa dinku le tsa dikgomo, tse di sa kakeng tsa balwa ka bontsi.

⁷Baperesiti ba tsenya letlole la kgolagano ya ga Jehofa mo bonnong jwa lone mo bobuelelong jwa ntlo, mo felong ga boitshepo jo bo itshepileng, e bong fa tlase ga diphuka tsa ditšheruba.

⁸Gonne ditšheruba tsa bo di tsharolotse diphuka tsa tsone fa godimo ga felo ga letlole, mme ditšheruba tsa khurumetsa letlole le disikaro tsa lone.

⁹Disikaro di ne di le ditelele, dintlha tsa disikaro tsa ba tsa bonala di tswa mo letloleng fa pele ga bobuelelo, di sa bonale motho a le kwa ntle; ke gone kwa le gone le gompieno.

¹⁰Go ne go se na sepe mo letloleng fa e se matlapa a mabedi a Moše o a beileng gone kwa Horebe jale ka Jehofa a dira kgolagano le bana ba Iseraele ka ba tswa kwa Egepeto.

¹¹Ga dirala ya re baperesiti ba sena go tswa mo felong ga boitshepo, (gonne baperesiti ba ba gone ba ne ba iitshepisitse botlhe fela, ba sa tlhokomele go dira ka makoko a diphapaano tsa bone;

¹²le bone Balefi ba e leng baopedi botlhe fela, e bong Asafe, Hemane, Jeduthune le bomorwaa bone le bomonnaa bone, ba ema ntlheng ya botlhabatsatsi ga sebeso ba kgabile ka leloba le le boleta, ba na le disemebala le disaletere le diharepe ba bile ba na le baperesiti ba le 120 ba ba letsang dinaka).

¹³Ga dirala fela ya re baletsi ba dinaka le baopedi ba ntse jaaka motho a le mongwe fela, ba dira gore go utlwale modumo o le mongwe fela mo go bakeng le mo go lebogeng Jehofa; ya re ba tsholetsa lentswe la bone ka dinaka, le disemebala, le dilo tsa kopelo, ba baka Jehofa, ba re: “Gonne o molemo; gonne boutlwelo botlhoko jwa gagwe bo eme ka bosakhutleng.” Foo ntlo ya tlala leru, e bong ntlo ya ga Jehofa.

¹⁴Baperesiti ba ba ba retelelwa ke go ema ba direla ka ntlha ya leru; gonne kgalalelo ya ga Jehofa e ne e tletse ka ntlo ya Modimo.