Psalms 122

¹E rile ba nthaya ba re: “A re yeng kwa ntlong ya ga Jehofa,” ka itumela.

²Dinao tsa rona di eme mo teng ga dikgoro tsa gago, wena Jerusalema;

³Jerusalema, o agilwe jaaka motse o o kitlanyeng;

⁴kwa ditso di tlhatlogelang gone, e bong ditso tsa ga Jehofa, go nna tshupo mo go Iseraele, go ntshetsa leina la ga Jehofa malebogo.

⁵Gonne ditulo tsa bogosi tsa katlholelo di beilwe gone, e bong ditulo tsa bogosi tsa ntlo ya ga Dafite.

⁶Rapelelang kagiso ya Jerusalema: “Ba ba go ratang ba tlaa tlhogonolofala.

⁷A go nne kagiso mo teng ga dithako tsa gago, le go tlhogonolofala mo teng ga matlo a gago a dikgosi.”

⁸Ka ntlha ya bana ba ga rre le bankana ba me, ke tlaa bua jaana ke re: “Kagiso e nne mo teng ga gago.”

⁹Ka ntlha ya ntlo ya ga Jehofa, Modimo wa rona, ke tlaa go batlela se se molemo.