Psalms 135

¹Bakang Jehofa; lo bakeng leina la ga Jehofa; lo mmakeng lona batlhanka ba ga Jehofa;

²lona ba lo emang mo ntlong ya Jehofa, mo malwapeng a ntlo ya Modimo wa rona.

³Lo bakeng Jehofa; gonne Jehofa o molemo; opelelang leina la gagwe dipako; gonne go monate.

⁴Gonne Jehofa o ikgethetse Jakobe go nna wa gagwe ka sebele, le Iseraele go nna khumo ya gagwe e e tlhophegileng.

⁵Gonne ke a itse fa Jehofa a le mogolo, le go re Jehofa wa rona o godimo ga medimo yotlhe.

⁶Sengwe le sengwe se Jehofa o se ratileng o dirile sone fela, kwa legodimong le mo lefatsheng, mo mawatleng le mo mafelong a a boteng otlhe fela.

⁷O tle a tlhatlose mouwane kwa dikhutlong tsa lefatshe; a direle pula dikgadima; a ntshe phefo mo dibolokelong tsa gagwe.

⁸Ke yo o na a itaya matsalwapele a Egepeto, a motho le a kgomo.

⁹O ne a baya ditshupo le dikgakgamatso mo gare ga gago Egepeto, mo go Faro, le mo batlhankeng ba gagwe botlhe fela.

¹⁰Yo o ne a itaya merafe e le mentsi, a bolaya dikgosi tse di thata:

¹¹Sihone kgosi ya Baamore, le Oge kgosi ya Bašane, le magosi otlhe a Kanana;

¹²a aba lefatshe la bone go nna boswa, boswa jwa ga Iseraele, tšhaba ya gagwe.

¹³Leina la gago, Jehofa, le eme ka bosakhutleng; segopodiso sa gago, Jehofa, se ntse mo tshikatshikeng tsotlhe fela.

¹⁴Gonne Jehofa o tlaa atlhola batho ba gagwe, mme o tlaa ikwatlhaya ka ga batlhanka ba gagwe.

¹⁵Medimo ya disetwa ya merafe ke selefera le gouta, tiro ya diatla tsa batho.

¹⁶E na le melomo, mme ga e bue; e na le matlho, mme ga e bone;

¹⁷e na le ditsebe, mme ga e utlwe; mme le gone ga go na mowa mo melomong ya yone.

¹⁸Ba ba e dirang ba tlaa tshwana nayo fela; ee, mongwe le mongwe yo o e ikanyang.

¹⁹Lona ba ntlo ya ga Iseraele, bakang Jehofa; lona ba ntlo ya ga Arone, bakang Jehofa;

²⁰lona ba ntlo ya ga Lefi, bakang Jehofa; lona ba lo boifang Jehofa, lo bakeng Jehofa.

²¹A go bakwe Jehofa mo Sione, yo o agileng kwa Jerusalema. Bakang Jehofa.