Exodus 34

¹Jehofa a raya Moše a re: “Betla matlapa a le mabedi a a tshwanang le a ntlha; mme ke tlaa kwala mo matlapeng ao mafoko a a neng a le mo matlapeng a ntlha, a o a thubileng.

²E re ka moso o bo o ipaakantse, mo mosong o tlhatlogele mo thabeng ya Sinai, o iponatse fa pele ga me gone kwa tlhoreng ya thaba.

³Go se nne motho ope yo o tlhatlogang nao, le gone go se ka ga bonwa motho ope mo thabeng yotlhe fela; le matsomane le matlhape a se ka a fula fa pele ga thaba eo.”

⁴Moše a betla matlapa a le mabedi a a tshwanang le a ntlha; mme a phakela a tlhatloga thaba ya Sinai, jaaka Jehofa a mo laotse, a tshotse matlapa a mabedi mo seatleng sa gagwe.

⁵Jehofa a fologa a le mo lerung, a ema nae gone, mme a utlwatsa leina la ga Jehofa.

⁶Jehofa a feta fa pele ga gagwe, a utlwatsa, a re: “Jehofa, Jehofa, Modimo o o tletseng bopelotlhomogi, o o tsalano, o o bonya go galefa, le o o letlotlo la boutlwelo botlhoko le boammaaruri;

⁷o o bolokelang ba makgolokgolo boutlwelo botlhoko, o o itshwarelang tshiamololo, le tlolo, le boleo; le o o se ketlang o golola yo o molato gope; o o beletsang bana ba batho tshiamololo ya borraabo, le bana ba bana, go ya go fitlha mo kokomaneng ya boraro le ya bone.”

⁸Moše a akofa a ikobela tlhogo fa fatshe, a obama.

⁹A re: “Fa jaana ke bonye tsalano mo matlhong a gago Jehofa, ke a go rapela, a Jehofa a ke a tsamaye mo gare ga rona; gonne ke tšhaba e thamo e thata; o re itshwarele tshiamololo le boleo jwa rona, o re tseye re nne boswa jwa gago.”

¹⁰A re: “Bona, ke dira kgolagano; fa pele ga batho botlhe ba gago ke tlaa dira dikgakgamatso, tse di iseng di ke di dirwe mo lefatsheng lotlhe, le fa e le mo morafeng ope; batho botlhe ba o mo go bone ba tlaa bona tiro ya ga Jehofa, gonne se ke se dirang nao se a boitshega.

¹¹O tshegetse se ke se go laolelang gompieno; ke leleka fa pele ga gago Moamore, le Mokanana, le Mohite, le Moperise, le Mohife le Mojebuse.

¹²O itise, o se ka wa dira kgolagano le banni ba lefatshe le o yang kwa go lone, gore e se ka ya nna seru mo gare ga lona.

¹³Lo tlaa rutla dibeso tsa bone, lo thubaganye difikantswe tse di motloutlo tsa bone, lo reme medimako ya bone.

¹⁴“Gonne ga o ketla o obamela modimo ope o sele; gonne Jehofa yo leina la gagwe go tweng, Kelefufa, ke Modimo o o lefufa ruri:

¹⁵O ka tla wa dira kgolagano le banni ba lefatshe, wa akafalela medimo ya bone, wa isetsa medimo ya bone tshupelo, mme mongwe a go bitse, mme o ye go ja tshupelo ya gagwe;

¹⁶wa tseisa bomorwao bomorwadia bone; bomorwadia bone ba akafalele medimo ya bone, ba fepe bomorwao, le bone ba akafalele medimo ya bone.

¹⁷“O se ka wa itirela medimo epe e e thelwang.

¹⁸“O tshegetse modiro wa senkgwe se se sa bedisiwang. O je senkgwe se se sa bedisiwang ka malatsi a supa jaaka ke go laotse, ka lobaka lo lo tlhomilweng, ka kgwedi ya Abibe; gonne o dule kwa Egepeto ka kgwedi ya Abibe.

¹⁹“Botlhe ba maitibolo ke ba me; le tse ditonanyana mo dikgomong tsotlhe tsa gago, e bong maitibolo a kgomo le a sehutshane.

²⁰Leitibolo la esela o le rekolole ka sehutshanyane; mme fa o gana go le rekolola, o le komole thamo. Batsalwapele mo go bomorwao o ba rekolole. Ga go na ope yo o tlaa bonalang fa pele ga me a iphotlhere fela.

²¹“O dire ka malatsi a le marataro, mme ka letsatsi la bosupa o ikhutse: mo lobakeng lwa go lema le lwa go roba, le gone o ikhutse.

²²“O tshegetse modiro wa dibeke; e bong wa mabutswapele a thobo ya mabele, le modiro wa go rora mabele mo bokhutlong jwa ngwaga.

²³“Lonna lotlhe lwa gago lo bonale gararo ka ngwaga fa pele ga Jehofa Modimo, Modimo wa Iseraele.

²⁴Gonne merafe ke tlaa e kgopholela kwa ntle fa pele ga gago, ke tlaa atlhamolosa melelwane ya gago; le gone ga go na motho ope yo o tlaa eletsang lefatshe la gago, mogang o yang go bonala fa pele ga Jehofa Modimo wa gago gararo ka ngwaga.

²⁵“O se ka wa isa madi a tshupelo ya me a na le senkgwe se se bedisitsweng; le gone tshupelo ya modiro wa tlolaganyo e se ka ya salela moso.

²⁶“Sa ntlha sa mabutswapele a lefatshe la gago o se ise mo ntlong ya ga Jehofa Modimo wa gago. O se ka wa tlhadia potsane ka maši a mmaayo.”

²⁷Jehofa a raya Moše a re: “Kwala mafoko a; gonne ke dirile kgolagano le wena le Iseraele ka fa mafokong a.”

²⁸A nna gone le Jehofa ka malatsi a le 40, le masigo a le 40; ga a ka a ja dijo, le fa e le go nwa metsi. Mme a kwala mo matlapeng mafoko a kgolagano, e bong mantswe a a some.

²⁹Ga dirala ya re Moše a fologa mo thabeng ya Sinai a na le matlapa a tshupo mo seatleng a bo a sa itse fa letlalo la sefatlhogo sa gagwe le phatsima, ka a buile le Jehofa.

³⁰E rile Arone le bana botlhe ba Iseraele ba leba Moše, letlalo la sefatlhogo sa gagwe la bo le phatsima; ka moo ba boifa go mo atamela.

³¹Moše a ba tlhaeletsa; Arone le balaodi botlhe ba phuthego ba boela kwa go ene; mme Moše a bua nabo.

³²Morago bana ba Iseraele botlhe ba atamela; a ba laolela tsotlhe tse Jehofa o di buileng nae mo thabeng ya Sinai.

³³E ne e tle e re Moše a wetsa go bua nabo, a beye losire mo sefatlhogong sa gagwe.

³⁴E ne e re fa Moše a tsena fa pele ga Jehofa a ya go bua nae a tlose losire, go tsamaya a tswe; mme a tswe a bue le bana ba Iseraele se o se laoletsweng.

³⁵Bana ba Iseraele ba bone sefatlhogo sa ga Moše, fa letlalo la sefatlhogo sa ga Moše le phatsima; Moše a beye losire mo sefatlhogong sa gagwe gape go tsamaya a tsene a ye go bua nae.