Proverbs 12

¹Le fa e le mang yo o ratang thuto o rata kitso, mme yo o ilang kgalemelo o seholofolo fela.

²Motho yo o molemo o tlaa bona botsalano mo go Jehofa, mme o tlaa sekisa motho yo o maano a boikepo.

³Motho ga a ketla a tlhomamisiwa ka boikepo, mme motswe wa mosiami ga o ketla o tshikinngwa gope.

⁴Mosadi yo o mokgwa montle o o iphaphileng ke serwalo sa tlhogo mo monneng wa gagwe, mme yo o tlhabisang ditlhong o ntse jaaka sebodu mo marapong a gagwe.

⁵Megopolo ya basiami e lekalekanye, mme dikgakololo tsa baikepi ke tsietso.

⁶Mafoko a baikepi ke a go lalela madi a motho go a tsholola, mme molomo wa bathokgami o tlaa ba golola.

⁷Baikepi ba ribegeditswe, mme ga bayo, mme ntlo ya mosiami e tlaa ema.

⁸Motho o tlaa bolelwa ka molemo ka fa botlhaleng jwa gagwe, mme yo o pelo e e lesoko o tlaa nyadiwa.

⁹Motho yo o kobelwang tlase, mme a na le motlhanka, o gaisa yo o itlotlang, mme a tlhoka dijo.

¹⁰Motho yo o siameng o tle a gopole botshelo jwa kgomo yabo, mme mautlwelobotlhoko a moikepi ke bolalome fela.

¹¹Yo o lemalemang masimo a gagwe o tlaa bona letlotlo la dijo, mme yo o salang maithamako morago ga a na tlhaloganyo.

¹²Moikepi o eletsa tsa lotloa lwa batho ba ba bosula, mme motswe wa mosiami o ungwa loungo.

¹³Seru sa motho yo o bosula se mo tlolong ya dipounama, mme mosiami o tlaa tswa mo tlalelong.

¹⁴Motho o tlaa kgora molemo ka loungo lwa molomo wa gagwe, mme madiro a diatla tsa motho o tlaa a busediwa.

¹⁵Tsela ya lesilo e siame mo matlhong a lone, mme yo o botlhale o tle a reetse kgakololo.

¹⁶Go kgoberega ga lesilo go itsiwe ka bonako, mme motho yo o ikgapang o fitlha ditlhong.

¹⁷Yo o bolelang boammaaruri o bonatsa tshiamo, mme mosupi wa kako o bonatsa tsietso.

¹⁸Go na le go bua ka kgakgabuelo jaaka ditlhabo tsa putlela, mme loleme lwa motho yo o botlhale ke phodiso.

¹⁹Pounama ya boammaaruri e tlaa tlhomama ka bosakhutleng, mme loleme lo lo akang lo ema ka ponyo ya leitlho fela.

²⁰Tsietso e mo pelong tsa ba ba logang bosula, mme bagakolodi ba kagiso ba na le boitumelo.

²¹Basiami ga ba ketla ba diralelwa ke bosenyi bope, mme baikepi ba tlaa tlalelwa ke bosula.

²²Dipounama tse di akang ke sefedisa pelo mo go Jehofa, mme ba ba dirang ka boammaaruri ba a mo natefela.

²³Motho yo o ikgapang o loba kitso, mme dipelo tsa dieleele di bolela bosilo.

²⁴Seatla sa motlhoafadi se tlaa busa, mme seramatla se tlaa dirisiwa tiro ka thata.

²⁵Boimelesego mo pelong ya motho bo tle bo e inamise, mme lefoko le le molemo le e ipedise.

²⁶Mosiami ke mokayatsela mo go wa ga gabo, mme tsela ya baikepi e a ba timetsa.

²⁷Yo o seramatla ga a ke a besa se o se bolaileng a ile go tsoma, mme dithoto tse di tlhokegang tsa batho di tle di nne kwa batlhoafading.

²⁸Botshelo bo mo tseleng ya tshiamo, le mo tselaneng ya yone ga go na loso.