Isaiah 11

¹Go tlaa tswa letlhogela mo thitong ya ga Jese, mme letswela le le tswang mo metsweng ya gagwe le tlaa ungwa.

²Mowa wa ga Jehofa o tlaa nna mo go ene, mowa wa botlhale le wa tlhaloganyo, mowa wa kgakololo le wa nonofo, mowa wa kitso le wa go boifa Jehofa.

³Go thama ga gagwe go tlaa nna mo go boifeng Jehofa; ga a ketla a atlhola ka fa ponong ya matlho a gagwe, le fa e le go kgalema ka fa kutlong ya ditsebe tsa gagwe.

⁴O tlaa atlholela bahumanegi ka tshiamo, a kgalemelele bakgobaladi ba lefatshe ka tekatekanyo; mme o tlaa itaya lefatshe ka thupa ya molomo wa gagwe, a bolaya baikepi ka mowa wa dipounama tsa gagwe.

⁵Tshiamo e tlaa nna moitlamo wa lotheka lwa gagwe, le boikanngo bo nne moitlamo wa dirope tsa gagwe.

⁶Phiri e tlaa aga le kwanyana, nkwe e tlaa botha le potsane; le namane le tawana di tlaa fula mmogo; mme ngwanyana yo monye o tlaa di goga.

⁷Kgomo e namagadi e tlaa fula e na le bera; bana ba tsone ba tlaa botha mmogo; mme tau e tlaa ja motlhaka jaaka kgomo.

⁸Ngwanyana yo o anyang o tlaa tshameka fa mosimeng wa kake, ngwanyana yo o kgwisitsweng o tlaa baya seatla sa gagwe fa kutleng ya šaušawane.

⁹Ga di ketla di utlwisa botlhoko le fa e le go senya mo thabeng yotlhe ya me e e boitshepo; gonne lefatshe le tlaa bo le tletse kitso ya go itse Jehofa, jaaka metsi a khurumeditse lewatle.

¹⁰Go tlaa dirala mo letsatsing leo, go re motswe wa ga Jese, yo o emeng a le mokgele wa ditšhaba, merafe e tlaa leba kwa go ene; mme felo fa o nnang gone go tlaa nna kgalalelo.

¹¹Go tlaa dirala mo letsatsing leo go re Morena o tlaa ntsha letsogo la gagwe gape go ba a tsaya masalela a batho ba gagwe, a a tlaa bong a setse, a tswa Asiria le kwa Egepeto, le kwa Patherose, le kwa Kuše, le kwa Elame, le kwa Shinare, le kwa Hamathe, le kwa ditlhakeng tsa lewatle.

¹²O tlaa tlhomela merafe mokgele mme o tlaa kokoanya balelekwi ba Iseraele; o tlaa phuthela mmogo bafaladi ba Juta ba tswa dikgokgotshong tsoo nne tsa lefatshe.

¹³Lefufa la ga Eferaime le lone le tlaa tloga, le ba ba tshwenyang Juta ba tlaa kgaolwa; Eferaime ga a ketla a nna lefufa le Juta, le Juta ga a ketla a tshwenya Eferaime.

¹⁴Ba tlaa phomegela mo leruding la Bafilisitia ka fa ntlheng ya bophirimatsatsi; mmogo ba tlaa thopa bana ba botlhabatsatsi; ba tlaa ntshetsa letsogo la bone kwa Etome le Moabe; mme bana ba Amone ba tlaa ba ineela.

¹⁵Jehofa o tlaa senyetsa ruri senwane sa lewatle la Egepeto; mme o tlaa thokgosetsa letsogo la gagwe godimo ga Noka ka phefo ya gagwe e e tshubang, o tlaa e betsa e nna dinokana di supa, o tlaa di kgabagantsha batho ka dinao di ikomeleletse fela.

¹⁶Go tlaa nna tsela e tona ya mheru ya masalela a batho ba gagwe, ba ba tlaa bong ba setse ba tswa Asiria; jaaka e kile ya ne e le ya ga Iseraele mo motlheng o ba duleng mo lefatsheng la Egepeto ka one.