Tswana 1992 Bible - 7 verses
1Ija! A lefatshe la go suma ga diphuka, le le leng kwa moseja ga dinoka tsa Ethiopia;
2le le romang barongwa ka lewatle, e bong ka makawe a koma mo metsing, ba re: “Tsamayang lona barongwa ba difadima, lo ye morafeng o o batho ba baleele ba ba borethe, kwa bathong ba ba sa leng ba simologa ba nna poitshego go tla le mo nakong eno; e le morafe o o lekanyetsang, le o o sobotlang, o lefatshe la one le faraferweng ke dinoka!”
3Lona lotlhe banni ba lobopo lotlhe, le lona ba lo agileng mo lefatsheng, e re mogang mokgele o tsholediwang mo dithabeng, lo lebe, e re mogang lonaka lo lediwang, lo utlwe.
4Gonne Jehofa o buile le nna jaana, a re: “Ke tlaa didimala fela, mme ke tlaa leba ke le mo boagong jwa me; jaaka mogote wa letsatsi le le tsabakelang, jaaka monyo mo mogoteng wa lobaka lwa thobo.”
5Gonne e tlaa re pele ga thobo, fa sethunya se tlhotlhoregile, mme kgolokwane e tloga e nna mafine a a butswang, o tlaa kgaola dikalana ka dithipa, a tlose menamo, a reme.
6Ba le mmogo ba tlaa tlogelelwa manong a dithaba, le dibatana tsa lefatshe; mme manong a tlaa ba ja selemo, le dibatana tsotlhe tsa lefatshe di tlaa ba ja mariga.
7Mo motlheng oo, go tlaa tlisediwa Jehofa wa masomosomo neo, e tswa tšhabeng e e batho ba baleele, ba ba borethe, e tswa tšhabeng e e sa leng e simologa e nna poitshego go tla nakong eno; e le morafe o o lekanyetsang, le o o sobotlang, o lefatshe la one le faraferweng ke dinoka, e tlisiwa kwa felong ga leina la ga Jehofa wa masomosomo, kwa thabeng ya Sione.