Isaiah 31

¹Ija! A bo go latlhega bone ba ba tshologelang thuso kwa Egepeto, ba ikaega dipitse; ba ikanya dikara tsa tlhabano ka go bo di le dintsi, le bapalami ka go bo ba nonofile thata; mme ga ba lebe Moitshepi wa Iseraele, le gone ba sa batle Jehofa!

²Le fa go ntse jalo, le ene o botlhale, o tlaa lere bosula, ga a ketla a khutlisa mafoko a gagwe; o tlaa tsogologela ntlo ya badira bosula, a ba a tsogologela thuso e e tswang mo go ba ba dirang boikepo.

³Aitse, Baegepeto ke batho, ga se Modimo; le dipitse tsa bone ke nama, ga se mowa; mme e tlaa re Jehofa a ba otlololela letsogo la gagwe, go le yo o thusang o tlaa kgotswa, le yo o thusiwang o tlaa wa, mme ba tlhaele botlhe mmogo.

⁴Gonne Jehofa o nthaya jaana, a re: “Fela jaaka fa tau e kurutla, le jaaka tawana, godimo ga se di se bolaileng, fa bontsi jwa badisa ba bidiwa, gore ba e tshologele, ga e ketla e rerega ka lentswe la bone, le fa e le go ikokobetsa ka modumo wa bone; jalo fela Jehofa wa masomosomo o tlaa fologa a tla go tlhabana mo thabeng ya Sione, le mo thoteng ya teng.

⁵Jaaka dinonyane fa di phaphasela, jalo Jehofa wa masomosomo o tlaa femela Jerusalema; o tlaa femela a o golola, o tlaa o tlolaganya a o boloka.”

⁶Boelang kwa go ene yo lo mo tsuolololetseng mo gogolo, lona bana ba Iseraele!

⁷Gonne mo letsatsing leo motho mongwe le mongwe o tlaa latlha medimo ya gagwe ya disetwa ya selefera, le medimo ya gagwe ya disetwa ya gouta, e diatla tsa lona tota di e lo diretseng go nna boleo.

⁸“Foo Moasiria o tlaa wa ka tšhaka, mme e seng ya motho; tšhaka e e seng ya motho e tlaa mo gaila; mme o tlaa tshaba tšhaka, mme makau a gagwe a tlaa kgetha.

⁹Lefika la gagwe le tlaa fetela koo ka ntlha ya therego, le dikgosana tsa gagwe di tlaa rerega ka mokgele,” go bua Jehofa, yo molelo wa gagwe o leng mo Sione, le pesetso ya gagwe e leng mo Jerusalema.