Isaiah 55

¹“Heelang! Mongwe le mongwe yo o nang le lenyora, tlang metsing a mantsi, le yo o se nang madi; tlang lo reke, lo je. Ee, tlang lo reke bojalwa jwa mofine le maši, go sa lopiwe madi, go se na tuelo.

²Ana lo ntsheletsang se e seng dijo madi? Le tuelo ya mofufutso wa lona, lo e ntsheletsang se se sa yeng le pelo? Ntheetsang thata, mme lo je se se molemo, mme a mowa wa lona o itumele ka mo go nonneng.

³Sekegang tsebe ya lona, lo tle mo go nna; utlwang, mme mowa wa lona o tlaa tshela; mme ke tlaa golagana le lona ka kgolagano e e sa khutleng, e bong mautlwelobotlhoko a a tlhomameng a ga Dafite.

⁴Bona, ke mo ntshitse gore a nne mosupi mo ditšhabeng, gore a nne mogogi le molaodi mo ditšhabeng.

⁵Bona, o tlaa bitsa morafe o o sa o itseng, le morafe o o neng o sa go itse o tlaa tshologela kwa go wena, ka ntlha ya ga Jehofa, Modimo wa gago, le ka ntlha ya Moitshepi wa Iseraele, gonne o go galaleditse.

⁶“Batlang Jehofa a sa ntse a ka bonwa; mmitseng a sa ntse a le gaufi.

⁷A moikepi a latlhe tsela ya gagwe, le motho yo o sa siamang kgopolo tsa gagwe; a a boele kwa go Jehofa, mme o tlaa mo utlwela botlhoko; le kwa Modimong wa rona, gonne o tlaa itshwarela ka botlalo.

⁸Gonne megopolo ya me ga se megopolo ya lona; le gone mekgwa ya lona ga se mekgwa ya me, go bua Jehofa.

⁹Gonne jaaka magodimo a le kwa godimo bogolo go lefatshe, jalo mekgwa ya me e kwa godimo bogolo go mekgwa ya lona, le megopolo ya me bogolo go megopolo ya lona.

¹⁰“Gonne jaaka pula e tle e ne, e tswa legodimong, le kapoko, mme di sa boele gone, mme di kolobise lefatshe, di le tlhogise, di le kukuntse, mme le neye mojadi peo, le moji dijo;

¹¹lefoko la me le tlaa nna jalo, le le tswang mo molomong wa me; ga le ketla le boela fela mo go nna, mme le tlaa dirafatsa se ke se ratang, le tlaa segofala mo selong se ke le isitseng kwa go sone.

¹²“Gonne lo tlaa tswa ka boitumelo lo tlaa ntshiwa lo gogwa ka kagiso; dithaba di tlaa ponyega ka kopelo, le makhubu fa pele ga lona, le ditlhare tsotlhe tsa naga di tlaa opa diatla.

¹³Mo boemong jwa setlhare se se mitlwa go tlaa tlhoga morukuru; le mo boemong jwa mmabi go tlaa tlhoga setlhare sa bolao; mme e tlaa bo e le ga Jehofa, go nna leina le sesupo se se sa khutleng, se se se ketlang se kgaolwa.”