Isaiah 9

¹Ga go ketla go nna phifalo mo go ene yo o kileng a nna mo tlalelong e e mahehe. E kile ya re mo motlheng wa pele, a tsenya lefatshe la Sebulone mo nyatsegong, le lefatshe la Nafetali; mme mo motlheng wa morago o le dirile go nna kgalalelo, ka fa tseleng ya lewatle, kwa moseja ga Joretane, Galilea wa merafe.

²Batho ba ba kileng ba sepela mo lefifing ba bonye lesedi le legolo; ba ba kileng ba aga mo lefatsheng la moriti wa loso, lesedi le phatsimile mo go bone.

³O ntsifaditse morafe, o totisitse boitumelo jwa bone; ba itumela fa pele ga gago ka fa boitumelong jwa thobo, jaaka batho ba tle ba itumele fa ba abalana thopo.

⁴Gonne jokwe ya morwalo, le thobane ya tshikaro ya gagwe, le serobi sa mopatiki, o di robile jaaka mo motlheng wa Midiane.

⁵Gonne diaparo tsa phemelo tsa ba ba tlhomeletseng ntwa, le dikobo tse di tladikilweng mo mading, di tlaa nna tsa go fisiwa fela, e tlaa nna dilo tsa molelo fela.

⁶Gonne ngwana re mo tsaletswe, ngwana wa mosimane re mo neilwe, mme puso e tlaa nna mo leruding la gagwe; leina la gagwe le tlaa bidiwa: “Kgakgamatso, Mogakolodi, Modimo Mothata, Rara wa Bosakhutleng, Kgosana ya Kagiso.”

⁷Ga go tota ga puso ya gagwe, le ga kagiso ga go ketla go nna le bokhutlo, a le mo setulong sa bogosi sa ga Dafite, le mo bogosing jwa gagwe go bo tlhomamisa, le go bo tshegetsa ka katlholo le ka tshiamo, go tloga gompieno go ya bosakhutleng. Tlhoafalo ya ga Jehofa wa masomosomo e tlaa dirafatsa selo se.

⁸Morena o isitse lefoko kwa go Jakobe, mme le ntse mo go Iseraele.

⁹Mme batho botlhe ba tlaa itse, le ene Eferaime, le banni ba Samaria ba ba buang ka boikgodiso le ka lesoko la pelo, ba re:

¹⁰“Makwete a ole, mme re tlaa aga ka maje a a betlilweng; masekamore a remilwe, mme re tlaa a fetola masetara.”

¹¹Ke gone ka moo Jehofa o tlaa bayang baganetsi ba ga Resine kwa godimo, gore ba tlhabane nae, o tlaa tlhotlheletsa baba ba gagwe;

¹²e bong Basiria kwa pele, le Bafilisitia kwa morago; ba tlaa suputsa Iseraele ka legano le le atlhameng. Le fa go ntse jaana, bogale jwa gagwe ga bo a fapoga, letsogo la gagwe le sa ntse le lolame fela.

¹³Le fa go ntse jalo batho ga baa sokologela kwa go ene yo o ba iteileng, le gone ga ba a batla Jehofa wa masomosomo.

¹⁴Ke gone ka moo Jehofa o tlaa kgaolang Iseraele tlhogo le mogatla, kala ya mokolane le mokhasi, ka letsatsi le le lengwe fela.

¹⁵Motho yo mogologolo le motlotlegi, ke ene tlhogo; mme moperofeti yo o rutang maaka ke ene mogatla.

¹⁶Gonne ba ba gogang batho ba, ba ba timetsa, le ba ba gogwang ke bone ba a senngwa.

¹⁷Ke gone ka moo Morena ga a ketla a itumelela makau a bone, le gone ga a ketla a tlhomogela masiela a bone le basadi ba batlholagadi pelo: gonne mongwe le mongwe ke motlhapatsi le modirabosula; molomo mongwe le mongwe o bua dinyana. Mme le fa go ntse jaana bogale jwa gagwe ga bo a fapoga, letsogo la gagwe le sa ntse le lolame fela.

¹⁸Gonne tshiamololo e tuka jaaka molelo; o laila lokhi le lorwana: Ee, o tshuba mo ditswatsweng tsa sekgwa, mme di tsokolele kwa godimo di le dithogomosi tsa mosi fela.

¹⁹Lefatshe le šetse ruri ka bogale jwa ga Jehofa wa masomosomo; batho le bone ba ntse jaaka dilo tsa molelo fela; ga go ope yo o rekegelang ngwana wa ga rraagwe.

²⁰Mme motho o tlaa phamola ka fa ntlheng ya letsogo le legolo, mme a nne a bolawe ke tlala fela; a je ka fa letsogong la molema, mme ba se ke ba kgora; motho mongwe le mongwe o tlaa ija nama ya letsogo la gagwe:

²¹Manase a je Eferaime, le Eferaime a je Manase; mme bone mmogo ba kopanele Juta. Le fa go ntse jaana bogale jwa gagwe ga bo a fapoga, letsogo la gagwe le sa ntse le lolame fela.