Jeremiah 12

¹O tshiamo, Jehofa mogang ke go rapelang; le fa go ntse jalo ke rata ka ganetsanya nao ka ga mafoko a: Ke ka ntlha yang fa tsela ya baikepi e segofala? Ke ka ntlha yang fa botlhe ba ba dirang ka bolotsana thata ba iketlile fela?

²O ba tlhomile, ee, ba namile metswe; ee, ba a gola, ba a ungwa; o gaufi mo molomong wa bone, o kgakala le diphilo tsa bone.

³Nna, Jehofa, o a nkitse; o a mpona, o leka pelo ya me ka fa e go ikutlwang ka teng; ba swatolele kwa tlhabong jaaka dinku, o ba baakanyetse motlha wa polao.

⁴Ana lefatshe le tlaa hutsafala ka lobaka lo lo kaye, le merogo ya lefatshe lotlhe e swaba? Ditshedi di a nyelediwa, le dinonyane, ka ntlha ya boikepo jwa ba ba agileng mo go lone; gonne ba rile: “Ga a ketla a bona bokhutlo jwa rona.”

⁵“Fa o tabogile le batho ba dinao, mme ba go lapisitse, foo a ka ganela jang le dipitse? Le fa o bolokegile o le mo lefatsheng la kagiso, ana o tlaa dirang mo kgogomogong ya Joretane?

⁶Gonne le ba e leng bana ba ga rraago, le ba ntlo ya ga rraago, ke bone ba ba go diretseng ka bolotsana; ke bone ba ba go thomeleleditseng ka thata; o se ka wa ba dumela, le fa ba bua mafoko a a molemo nao.

⁷“Ke tlogetse ntlo ya me, ke latlhile boswa jwa me; moratwi yo mogolo wa mowa wa me, ke mo tsentse mo seatleng sa baba ba gagwe.

⁸Boswa jwa me bo ntlhanogetse, o ntse jaaka tau mo sekgweng: o nkgoeletse ka lonyatso; ke gone ka moo ke mo tlhoileng.

⁹A boswa jwa me bo ntse mo go nna jaaka lenong le lewebu, le le dibola? A dinonyane tsa bonong di mo loma ka ntlha tsotlhe? Tsamayang lo ye go phutha dibatana tsotlhe tsa naga, di tle go ja.

¹⁰Badisa ba le bantsi ba sentse tshimo ya me ya mafine ba gatakile setsha sa me, setsha sa me se sentle ba se dirile naga e e swafetseng fela.

¹¹Ba se swafaditse; se a nkhutsafalela, ka se swafetse; lefatshe lotlhe le swafaditswe, ka go bo go se na motho ope yo o go bayang mo pelong.

¹²Bathopi ba tsile mo dithoteng tsotlhe tse di loforotlho tsa naga, gonne tšhaka ya ga Jehofa e a kometsa; go tswa bokhutlong bongwe jwa lefatshe go ya bokhutlong jo bongwe jwa lefatshe, ga go na motho ope yo o nang le kagiso.

¹³Ba jadile mabele mme ba robile mitlwa; ba itlhokofaditse, mme ga ba bone molemo ope; mme lo tlaa tlhabisiwa ditlhong ke dikatelo tsa lona ka ntlha ya bogale jo bo fisang jwa ga Jehofa.”

¹⁴Jehofa o bua jaana ka ga ba ke bapileng nabo botlhe ba ba bosula, ba ba amang boswa jo ke bo ruisitseng tšhaba ya me Baiseraele, a re: “Bonang, ke tlaa ba kumola mo lefatsheng la bone, mme ke tlaa ba kumola ba ntlo ya Juta mo go bone.

¹⁵Mme go tlaa dirala go re, e tlaa re ke sena go ba kumola, ke boe, ke ba utlwele botlhoko; ke tlaa ba lere gape, mongwe le mongwe mo bosweng jwa gagwe, le mongwe le mongwe mo lefatsheng la gagwe.

¹⁶Mme go tlaa dirala go re, fa ba ithuta ka tlhoafalo mekgwa ya batho ba me, go ikana ka leina la me, go re: ‘Jaaka Jehofa a tshedile;’ fela jaaka ba kile ba ruta batho ba me go ikana ka Baale, foo ba tlaa agelelwa mo gare ga batho ba me.

¹⁷Fa ba gana go utlwa, foo ke tlaa kumola morafe oo, ke o kumola ke o senya. Go bua Jehofa.”