Jeremiah 15

¹Foo Jehofa a nthaya, a re: “Le fa bo Moše le Samuele ba ka bo ba eme fa pele ga me, le fa go ntse jalo pelo ya me e ne e sa kake ya nna le batho ba; ba ole mo ponong ya me, ba tswe ba ye koo.

²Go tlaa dirala go re, e tlaa re ba go raya ba re: ‘Re tlaa tswela kae?’ Foo o ba bolelele, o re: Go bua jaana Jehofa, a re: “ ‘Ba ba laoletsweng loso, ba ye losong; ba ba laoletsweng tšhaka, ba ye tšhakeng; le ba ba laoletsweng moswele ba ye mosweleng; le ba ba laoletsweng botshwaro ba ye botshwarong.’

³“Ke tlaa ba laolela dilo tse di mehuta mene,” go bua Jehofa; “tšhaka go bolaya, dintša go gagola, dinonyane tsa legodimo, le dibatana tsa lefatshe, go suputsa le go senya.

⁴Ke tlaa ba akgaakgela mo magosing otlhe a lefatshe, ka ntlha ya ga Manase morwa Hesekia kgosi ya Juta, ka ntlha ya se o se dirileng mo Jerusalema.

⁵“Gonne e mang yo o tlaa go tlhomogelang pelo, wena Jerusalema? Kgotsa e mang yo o tlaa go tukuthelang tlhogo? Kgotsa e mang yo o tlaa fapogang a ya go botsa ka fa o ntseng ka teng?

⁶O nkganne, go bua Jehofa, o boetse kwa morago, ke gone ka moo ke go otlololetseng seatla sa me, mme ka go senya; mme ke lapile ka go nna ke ikwatlhaya.

⁷Ke ba olositse ka seoloso mo dikgorong tsa lefatshe; ke ba thukhuthile bana, ke sentse batho ba me; ga ba a boa mo ditseleng tsa bone.

⁸Basadi ba bone ba batlholagadi ba intsifaletse go feta mošawa wa mawatle; ke lerile mo go bone mothopi go le motshegare go tla a bolaya mma makau: ke digetse tlalelo e e mahehe le ditheregiso mo go ene ka tshoganetso.

⁹Yo o tsetseng bana basupa o a tapetega, o dule mowa; letsatsi la gagwe le kotlometse go sa ntse go le motshegare; o ntse a tlhajwa ke ditlhong a sosobagana; masalela a bone ke tlaa a neela tšhaka fa pele ga baba ba bone,” go bua Jehofa.

¹⁰Ija! Mma we! Ka e le fa o ntsetse ke le motho wa komang le kgang le lefatshe lotlhe! Ga ke a adima ope ka go lopa koketso, le nna batho ga ba a nkadima ka go ntopa koketso; le fa go ntse jalo mongwe le mongwe wa bone o a mphutsa.

¹¹Jehofa a re: “Ruri ke tlaa go thatafatsa gore o bone molemo; ruri ke tlaa dira gore mmaba a go rapele ka thata mo motlheng wa bosula, le mo motlheng wa patikego.”

¹²A mongwe o ka roba tshipi, e bong tshipi e e tswang ntlheng ya botsheka, le kgotlho?

¹³“Thoto ya gago le dikhumo tsa gago ke tlaa di ntsha thopo fela di sa rekwe, mme e be e le ka ntlha ya dibe tsotlhe tsa gago, e bong mo melelwaneng yotlhe ya gago.

¹⁴Ke tlaa di fetisa le baba ba gago di ya kwa lefatsheng le o sa le itseng; gonne go gotsitswe molelo mo bogaleng jwa me, o o tlaa fisang mo go lona.”

¹⁵Jehofa, o a itse; o nkgopole, o ntekole, mme o ntefetse mo babogising ba me; o se ka wa ntlosa ka bopelotelele jwa gago; o itse fa ke bonye go kgojwa ka leina la gago.

¹⁶Mafoko a gago a ne a bonwa, mme ka a ja; mafoko a gago a ne a le boitumelo mo go nna, le boipelo jwa pelo ya me; gonne ke bidiwa ka leina la gago, Jehofa Modimo wa masomosomo.

¹⁷Ga ke a ka ka dula mo phuthegong ya bone ba ba dirang mokete, ga ke a ka ka duduetsa; ka dula ke le nosi ka ntlha ya seatla sa gago; gonne o ntladitse ka tšhakgalo.

¹⁸Ana go ntse jang botlhoko jwa me bo nnetse ruri, le ntho ya me e le e e sa foleng, e e ganang go fodisiwa? A ruri o tlaa nna mo go nna jaaka nokana e e tsietsang, jaaka metsi a a sa tlhomamang?

¹⁹Ke gone Jehofa o bua jaana, a re: “Fa o boa, foo ke tlaa ba ke go tlisa gape, gore o tle o eme fa pele ga me; fa o lomolola se se tlhokegang mo go se se bosula, o tlaa nna jaaka molomo wa me; ba tlaa boela mo go wena, mme wena ga o ketla o boela kwa go bone.

²⁰Ke tlaa go dira go nna lorako lwa kgotlho lo lo thekeleditsweng kemalanong le batho ba; ba tlaa tlhabana nao, mme ga ba ketla ba go fenya; gonne ke na nao go go boloka le go go golola,” go bua Jehofa.

²¹“Ke tlaa go golola mo seatleng sa baikepi, ke ba ke go rekolola mo seatleng sa ba ba boitshegang.”