Jeremiah 20

¹Jaana Pašure morwa moperesiti Imere, yo e ne e le molaodi yo mogolo mo ntlong ya ga Jehofa, a utlwa Jeremia a perofesa dilo tse.

²Foo Pašure a itaya Jeremia moperofeti, a mo golegela mo disaneng tse di mo kgorong e e godimo ya Benjamine, e e mo ntlong ya ga Jehofa.

³Mme ga dirala ya re ka moso, Pašure a ntsha Jeremia mo disaneng. Foo Jeremia a mo raya a re: “Jehofa ga a raya leina la gago Pašure fa e se Magore-misabibe.

⁴Gonne Jehofa o bua jaana, a re: ‘Bona, ke tlaa go itshabisa ka wesi ka therego, o ba o tshajwa ke ditsala tsotlhe tsa gago; mme ba tlaa wa ka tšhaka ya baba ba bone, mme matlho a gago a tlaa go bona; le Bajuta botlhe ke tlaa ba tsenya mo seatleng sa kgosi ya Babilone, mme o tlaa ba isa Babilone e le ditshwarwa, mme o tlaa ba bolaya ka tšhaka.

⁵Gape dikhumo tsotlhe tsa motse o, le totafalo yotlhe ya one, le dilo tsotlhe tse di tlhokegang tsa one, ee, le mahumo otlhe a dikgosi tsa Juta, ke tlaa tsenya gotlhe fela mo diatleng tsa baba ba bone, ba ba tlaa ba thopang, ba ba tsaya, ba ba isa Babilone.

⁶Wena Pašure le botlhe ba ba agileng mo ntlong ya gago, lo tlaa ya botshwarong; mme o tlaa fitlha kwa Babilone o ba o swela teng, o tlaa fitlhwa gone, wena le ditsala tsotlhe tsa gago, tse o di perofeseditseng ka maaka.’ ”

⁷Jehofa o mphepisitse, mme ka fepisega; o thata bogolo go nna, mme o fentse; ke dule setshego sa motshegare otlhe, mongwe le mongwe o a ntshotla.

⁸Gonne ke a re ke bua gangwe le gape, ke be ke goe; ke go ke re: “Thubakanyo le thopo”: ka gonne lefoko la ga Jehofa le dirilwe mo go nna kgobo le setshego motshegare otlhe.

⁹Fa ke re: “Ga nketla ke mo umaka, le fa e le go tlhola ke bua mo ineng la gagwe,” foo go bo go nne mo pelong ya me e kete molelo o o šang o tswaletswe mo marapong a me, ke bile ke lapile ka go iphapaanya, ke be ke retelelwe ke go itshoka.

¹⁰Gonne ke utlwile dikepololo tsa batho ba le bantsi, theregiso ka ntlha tsotlhe. “Mmoleleng, mme re tlaa mmolela,” go bua ditsala tsotlhe tsa me tse ke itsanyeng natso, ba ba lebeletseng go kobela ga me: “e tlaa re gongwe a rapelesege, mme re tlaa mo fenya, re ipusolosetsa mo go ene.”

¹¹Jehofa o nna le nna jaaka seganka, jaaka yo o boitshegang; ke gone ka moo babogisi ba me ba tlaa kgopegang, mme ga ba ketla ba fenya; ba tlaa tlhajwa ke ditlhong thata, ka ba se ka ba dira ka botlhale, ba dirile ka tlotlololo e e sa khutleng, e e se ketlang e lebalwa gope.

¹²Mme wena Jehofa wa masomosomo, yo o lekang basiami, yo o bonang diphilo le pelo, a ke bone tefetso ya gago mo go bone; gonne ke go senoletse mafoko a me.

¹³Opelelang Jehofa, bakang Jehofa; gonne o golotse mowa wa motlhoki mo seatleng sa ba ba dirang bosula.

¹⁴A letsatsi le ke tsetsweng ka lone le hutsege; a letsatsi le mme o mpelegeng ka lone le se segofale.

¹⁵A go hutsege monna yo o isitseng mafoko kwa go rre, a re: “O bonye ngwana wa mosimane;” mme a mo itumedisa thata.

¹⁶A monna yoo a nne jaaka metse e Jehofa o e ribegeditseng, mme a se ka a ikwatlhaya; mme a utlwe go goa mo mosong, le mokgosi o o tshosang motshegare;

¹⁷ka a se ka a mpolaya ke sa le mo sebopelong; jalo mme e ka bo e ne e le ene phupu ya me, le sebopelo sa gagwe se ka bo se ntse se le seimana ka gale le ka gale.

¹⁸Ana ke ne ke tswelang mo sebopelong, ka tla go bona letsapa le bohutsana gore malatsi a me a tle a fetisiwe ka ditlhong?