Jeremiah 35

¹Lefoko le le tsileng mo go Jeremia le tswa kwa go Jehofa, mo metlheng ya ga Jehoiakime morwa Josia, kgosi ya Juta, la re:

²“Ya kwa ntlong ya Barekabe, o bue nabo, mme o ba ise mo ntlong ya ga Jehofa, mo go nngwe ya matlwana, mme o ba nose bojalwa jwa mofine.”

³Foo ka tsaya Jaasania morwa Jeremia, morwa Habasinia, le bomorwa rraagwe le bomorwawe botlhe, le botlhe ba kgotla ya Barekabe;

⁴ka ba isa mo ntlong ya ga Jehofa, mo ntlwaneng ya bomorwa Hanane morwa Igetalia, monna wa Modimo, e e bapileng le ntlwana ya dikgosana, fa godimo ga ntlwana ya ga Maaseia morwa Shalume, molebedi wa mojako.

⁵Ka baya dinkgwana tsa bojalwa jwa mofine le dinwelo fa pele ga bomorwa ntlo ya Barekabe, ka ba raya ka re: “Nwang bojalwa jwa mofine.”

⁶Ba re: “Ga re nwe bojalwa jwa mofine epe; gonne Jonatabe morwa Rekabe rraetsho o ne a re laola a re: ‘Lo se ka lwa na bojalwa jwa mofine epe, lona, le fa e le bomorwaa lona ka bosakhutleng.

⁷Le gone lo se ka lwa aga ntlo le fa e le go jala peo, le fa e le go tlhoma tshimo ya mafine, le fa e le go dira le yone; mme lo age mo megopeng ka metlha yotlhe ya lona; gore lo tshele metlha e le mentsi mo lefatsheng le lo jakileng mo go lone.’

⁸Re aketse lentswe la ga Jonatabe morwa Rekabe rraetsho, mo go tsotlhe tse o di re laetseng, ka go tlhoka le go nwa bojalwa jwa mofine bope ka metlha yotlhe ya rona, le basadi ba rona, le bana ba rona ba basimane le ba basetsana;

⁹le fa e le go ikagela matlo a go aga mo go one; le gone ga re na tshimo ya mafine, le fa e le lotlhagare, le fa e le peo.

¹⁰Re ntse re agile mo megopeng fela, re ntse re utlwa, re bile re dirile ka fa go tsotlhe tse Jonatabe rraetsho o di re laoletseng.

¹¹Mme ga dirala, e rile Nebukatenesare kgosi ya Babilone a tla mo lefatsheng, ra bua, ra re: ‘Ntlong, re yeng Jerusalema ka go boifa ntwa ya Bakalatea, le ka go boifa ntwa ya Basiria’; mme re ntse mo Jerusalema jalo.”

¹²Foo lefoko la ga Jehofa la tla mo go Jeremia, la re:

¹³“Jehofa wa masomosomo, Modimo wa Iseraele o bua jaana, a re: Ya o reye batho ba Juta le banni ba Jerusalema, o re: A ga lo ketla lo amogela thuto lo reetsa mafoko a me? Go bua Jehofa.

¹⁴Mafoko a ga Jonatabe morwa Rekabe, a o a laoletseng bomorwawe, a re, ba se nwe bojalwa jwa mofine, a diraditswe, mme le gompieno ga ba nwe bope, gonne ba ntse ba tshwere taolo ya ga rraabo; mme nna ke buile le lona, ke phakela ke bua; mme ga lo a ka lwa ntheetsa.

¹⁵Ke bile ke romile batlhanka botlhe ba me, e bong baperofeti kwa go lona, ke phakela ke ba roma, ke re: ‘A mongwe le mongwe wa lona a ke a boe mo tseleng ya gagwe e e bosula, lo bo lo siamise ditiro tsa lona, lo se ye le medimo e sele go e direla, mme lo tlaa aga mo lefatsheng le ke le neileng lona le borraeno.’ Mme ga lo a ka lwa sekega tsebe, le fa e le go ntheetsa.

¹⁶E re ka bomorwa Jonatabe morwa Rekabe, ba dirafaditse taolo ya ga rraabo e o e ba laoletseng, mme batho ba, ba se ka ba ntheetsa,

¹⁷ke gone ka moo Jehofa, Modimo wa Masomosomo, Modimo wa Iseraele o bua jaana, a re: ‘Bonang, ke tlaa tlisetsa Bajuta le banni botlhe ba Jerusalema, bosula jotlhe jo ke bo buileng ka ga bone; ka gonne ke buile nabo mme ba se ka ba utlwa; ke ba biditse, mme ba se ka ba araba.’ ”

¹⁸Jeremia a raya ba ntlo ya Barekabe a re: “Jehofa wa masomosomo, Modimo wa Iseraele o bua jaana, a re: ‘E re ka lo utlwile taolo ya ga Jonatabe rraeno, lo bile lo tshegeditse dikaelo tsotlhe tsa gagwe, lo dirile ka fa go tsotlhe tse o di lo laoletseng;

¹⁹ke gone ka moo Jehofa wa masomosomo, Modimo wa Iseraele o bua jaana, a re: Jonatabe morwa Rekabe ga a ketla a tlhoka monna yo o tlaa emang fa pele ga me ka bosakhutleng.’ ”