Jeremiah 50

¹Lefoko le Jehofa o le buileng ka ga Babilone, ka ga lefatshe la Bakalatea, ka Jeremia moperofeti.

²“Bolelang mo merafeng lo kakanye, mme lo tlhome mokgele; kakanyang, lo se ka lwa loba; lo re: ‘Babilone o gapilwe, Bele o tlhabisitswe ditlhong, Merotake o thubagantswe; ditshwantsho tsa gagwe di tlhabisitswe ditlhong, medimo ya gagwe ya disetwa e thubagantswe.’

³“Gonne go tla morafe o o tswang ntlheng ya botsheka, o tla go mo tlhasela, o o tlaa swafatsang lefatshe la gagwe, mme ga go ketla go aga ope mo go lone; ba tshabile, ba ile, motho le kgomo.

⁴“E tlaa re mo metlheng eo, le ka lobaka loo,” go bua Jehofa, “bana ba Iseraele ba tlaa tla, bone le bana ba Juta mmogo; ba tlaa etla ba lela, mme ba tlaa batla Jehofa Modimo wa bone.

⁵Ba tlaa botsa ka ga Sione ba lebile teng, ba re: ‘Tlang, lo ikopanye le Jehofa ka kgolagano e e sa khutleng, e e se ketlang e lebalwa.’

⁶“Batho ba me e ntse e le dinku tse di timetseng; badisa ba bone ba ba timeditse, ba ba faposeditse mo dithabeng; ba tlhomagantse thaba le thotana, ba lebetse sebothelo sa bone.

⁷Botlhe ba ba ba fitlhetseng ba ba supuditse; mme baba ba bone ba rile: ‘Ga re na molato, ka ba leofetse Jehofa, tsholofelo ya borraabo.’

⁸“Kudubitlegang lo tswe mo gare ga Babilone, lo tswe mo lefatsheng la Bakalatea, mme lo nne jaaka diphoko fa pele ga matsomane.

⁹Gonne, bonang, ke tlaa tsosetsa ke ba ke tlhatlosetsa kwa Babilone kokwano ya merafe e megolo e tswa lefatsheng la botsheka; mme ba tlaa mo ikabela; mme a le foo o tlaa gapiwa; metswi ya bone e tlaa nna jaaka ya seganka se se setswerere; ga go ketla go boa ope ka lefela.

¹⁰Lefatshe la Kalatea le tlaa nna thopo; botlhe ba ba le thopang ba tlaa kgora.” Go bua Jehofa.

¹¹“E re ka lo ipela, ka lo itumela, lona ba lo thopang boswa jwa me, ka lo lealeega jaaka kgomo ya moroba e e gatang mabele, mme lo kgwankgwanyega jaaka dipitse tse di nonofileng;

¹²mmaeno o tlaa tlhajwa ke ditlhong thata; yo o lo belegeng o tlaa sosobagana; bona, o tlaa nna wa moragorago wa merafe, o tlaa nna naga fela, le lefatshe la lokgere, le sekaka.

¹³Ka ntlha ya botšarara jwa ga Jehofa ga o ketla o nnwa, mme o tlaa swafala gotlhe fela; mongwe le mongwe yo o tlaa fetang ka Babilone o tlaa gakgamala, mme o tlaa otsetsa dipetso tsotlhe tsa gagwe.

¹⁴“Ikabeleng Babilone mo tikologong, lona lotlhe ba lo laelang bora; mo huleng, se rekegeleng metswi; gonne o leofetse Jehofa.

¹⁵O goeleleng mo tikologong; o inetse; dikago tsa one tsa phemelo di ole, dithako tsa one di digilwe; gonne ke pusoloso ya ga Jehofa; ipusolosetse mo go ene; jaaka a dirile, mo direleng jalo.

¹⁶Kgaolang mojadi mo Babilone, le ene yo o tshwarang thipa ya mabele mo lobakeng lwa go roba; mongwe le mongwe o tlaa retologela kwa bathong ba ga gabo ka ntlha ya poifo ya tšhaka e e patikang, mongwe le mongwe o tlaa tshabela kwa lefatsheng la ga gabo.

¹⁷“Iseraele ke nku e e phalogileng; ditau di mo lelekile; ga ntlha kgosi ya Babilone e mo supuditse; ga bofelo Nebukatenesare kgosi ya Babilone o robile marapo a gagwe.”

¹⁸Ke gone ka moo Jehofa wa masomosomo, Modimo wa Iseraele o bua jaana, a re: “Bonang ke tlaa betsa kgosi ya Babilone le lefatshe la yone, jaaka ke beditse kgosi ya Asiria.

¹⁹Ke tlaa ba ke busetsa Iseraele kwa mafulong a gagwe, mme o tlaa fula mo Karemele, le mo Bašane; mowa wa gagwe o tlaa kgora mo makgabaneng a Eferaime le mo Gileate.

²⁰Mo metlheng eo, le ka lobaka loo,” go bua Jehofa, “boikepo jwa Iseraele bo tlaa batlwa, mme go tlaa bo go sena bope; le maleo a Juta, mme ga a ketla a fitlhelwa, gonne ke tlaa itshwarela bone ba ke ba sadisang e le masalela.

²¹“Bololelang lefatshe la Merathaime, ke go re, go le tlhasela, le go tlhasela banni ba Pekote; bolayang, lo senyetse ruri morago ga bone,” go bua Jehofa, “mme lo dire ka fa go tsotlhe tse ke di go laoletseng.

²²Go na le modumo wa tlhabano mo lefatsheng, le wa tshenyo e kgolo.

²³Ana noto ya lefatshe lotlhe e phatlogile jang ka bogare, e thubegile jang! Ana Babilone o swafetse mo merafeng jang!

²⁴Ke go beetse seru, o bile o tshwerwe, wena Babilone, mme o ne o sa itse; o bonywe, o bile o tshwerwe, ka o ganetse le Jehofa.

²⁵Jehofa o budile ntlo ya gagwe ya dibolao, tsa tšhakgalo ya gagwe; gonne Jehofa, Modimo wa masomosomo o na le tiro e o e dirang mo lefatsheng la Bakalatea.

²⁶Tswang kwa bokhutlong jwa lefatshe lo mmololele, lo bule matlo a gagwe a a bolokelang; lo mo ribegetse a nne mekoakoa, fela lo mo senyetse ruri; go se ka ga sala sepe sa gagwe.

²⁷Bolayang dipholo tsa gagwe tsotlhe, a di ye tlhabong; a bo baa latlhega! Gonne motlha wa bone o tsile, motlha wa tshekiso ya bone.

²⁸“A lentswe la ba ba tshabang ba falola ba tswa lefatsheng la Babilone, ba ya go bolela mo Sione pusoloso ya ga Jehofa Modimo wa rona, pusoloso ya tempele ya gagwe.

²⁹“Phuthang bahudi ka bora ba tle go tlhasela Babilone, botlhe ba ba itseng go laela bora; mo tlhaoleleleng lo mo dike tikologong; a go se falole ope wa gone; mo dueleng ka fa tirong ya gagwe; ka fa go tsotlhe tse o di dirileng, mo direleng jalo, gonne o na a ntse a le boikgodiso fa pele ga Jehofa, fa pele ga Moitshepi wa Iseraele.

³⁰Ke gone ka moo makau a gagwe a tlaa welang mo mebileng ya gagwe, le batlhabani ba gagwe botlhe ba tla tuuladiwa ka tsatsi leo,” go bua Jehofa.

³¹“Bona, ke emalanye nao, wena mokaka,” go bua Jehofa, Morena wa masomosomo; “gonne motlha wa gago o tsile, motlha o ke tlaa go sekisang ka one.

³²Mokaka o tlaa kgopiwa a wa, mme ga go na ope yo o tlaa mo kakatlololang; ke tlaa tshuba molelo mo metseng ya gagwe, mme o tlaa laila botlhe ba ba mo tikologong ya gagwe.”

³³Jehofa wa masomosomo o bua jaana, a re: “Bana ba Iseraele le bana ba Juta ba bogisiwa mmogo; mme botlhe ba ba ba isitseng botshwarong ba ba tshwere thata, ba gana go ba rebola.

³⁴Morekolodi wa bone o thata; Jehofa wa masomosomo ke leina la gagwe; o tlaa ba emelela ruri mo tshekong, gore a tle a neye lefatshe boikhutso, mme a iketlolole banni ba Babilone.

³⁵“Go tšhaka mo go Bakalatea,” go bua Jehofa, “le mo banning ba Babilone, le mo dikgosaneng tsa gagwe, le mo matlhaleng a gagwe.

³⁶Go tšhaka mo babelafading, mme ba tlaa fela tlhaloganyo; go tšhaka mo dikgankeng tsa gagwe, mme ba tlaa tseana.

³⁷Go tšhaka mo dipitseng tsa bone, le mo dikareng tsa bone, le mo bathong botlhe ba ba tlhakanyeng ba ba mo gare ga gagwe, mme ba tlaa nna jaaka basadi; go tšhaka mo mahumong a gagwe, mme a tlaa utswiwa.

³⁸Go leuba mo dinokeng tsa gagwe, mme di tlaa tšha; gonne ke lefatshe la ditshwantsho tse di setilweng, mme ba a tsenwa ka ga medimo ya disetwa.

³⁹“Ke gone ka moo dibatana tsa naga di na le diphiri di tlaa nna teng, le bontšhe ba tlaa nna teng; mme ga a ketla a tlhola a nnwa ka bosakhutleng; mme ga go ketla go aga motho teng go ya tshikatshikeng.

⁴⁰Jaaka Modimo o ne o kile wa ribegetsa Sotoma le Gomora, le metse e e neng e bapile nayo, go bua Jehofa; jalo fela ga go ketla go nna motho ope teng, mme ga go ketla go tlholatlhola ope morwa motho teng.

⁴¹“Bonang, go tswa tšhaba kwa ntlheng ya botsheka; le morafe o mogolo, le dikgosi di le dintsi di tlaa tsosiwa kwa dikhutlong tsa lefatshe.

⁴²Ba tshwara bora le lerumo; ba bolalome, ga ba itse go tlhomoga pelo; kodu ya bone e faologa jaaka lewatle, mme ba palame dipitse; mongwe le mongwe o go abetswe go tlhabana nao, jaaka monna mo tlhabanong, wena morwadia Babilone.

⁴³Kgosi ya Babilone e utlwile tumedi ya bone, mme diatla tsa yone di a koafala; tlalelo e e mahehe e e tshwere, le metlotsedi e e etsang ya mosadi a le mo pelegong.

⁴⁴“Bonang, o tlaa tlhatloga jaaka tau e e ntshiwang ke kgogomogo ya Joretane e tla go tlhasela mo mafulong a a tlhomameng; mme ke tlaa mo e tshabisa ka tshoganetso; mme yo o itshenketsweng, ke tlaa mo neela go e laola; gonne e mang yo o tshwanang le nna? E mang yo o tlaa nkaelang motlha? Mme modisa e mang yo o tlaa emang fa pele ga me?

⁴⁵Ke gone utlwang kgakololo ya ga Jehofa, e o e gakologetsweng ka ga Babilone; le maikaelelo a gagwe, a o a ikaeletseng ka ga lefatshe la Bakalatea; ruri ba tlaa ba gogela koo, e bong banyana ba letsomane; ruri o tlaa swafatsa bonno jwa bone ka ntlha ya bone.

⁴⁶Lefatshe le a roroma ka modumo wa go gapiwa ga Babilone, le go goa go utlwala mo merafeng.”