Ezekiel 30

¹Gape lefoko la ga Jehofa la tla mo go nna, la re:

²“Morwa motho, perofesa, o re: Morena Modimo o bua jaana, a re:

³“Bokolelang lo re: A letsatsi le legolo! Gonne letsatsi le atametse, e bong letsatsi la ga Jehofa le atametse, letsatsi la maru; e tlaa nna motlha wa baditšhaba.

⁴Tšhaka e tlaa tla mo Egepeto, mme go tlaa nna tlalelo e e mahehe mo Ethiopia, mogang babolaiwi ba wang mo Egepeto; ba tlaa tlosetsa bontsi jwa gagwe koo, le metheo ya gagwe e tlaa rutlwa.

⁵“Ba Ethiopia, le ba Pute, le ba Lute, le batho ba ba tlhakanyeng botlhe, le ba Kuba, le bana ba lefatshe le le mo kgolaganong, ba tlaa tswa nabo ka tšhaka.”

⁶Jehofa o bua jaana, a re: “Le ba ba tshegeditseng Egepeto ba tlaa wa, le pelafalo ya thata ya gagwe e tlaa fologa; go simologa ka kago e e godileng ya Sefene ba tlaa wa mo go ene ka tšhaka, go bua Morena Modimo.

⁷Ba tlaa swafala mo gare ga mafatshe a a swafetseng, metse ya gagwe e tlaa nna mo gare ga metse e e ropefetseng.

⁸Ba tlaa itse fa ke le Jehofa, ke sena go tsenya molelo mo Egepeto, le bathusi ba gagwe botlhe ba senyegile.

⁹“E tlaa re mo motlheng oo barongwa ba tlaa tswa fa pele ga me ka dikepe ba ya go boifisa Baethiopia ba ba ntseng fela ba sa re sepe. Go tlaa nna tlalelo e e mahehe mo go bone, jaaka mo motlheng wa Egepeto; gonne bonang, o etla.”

¹⁰Morena Modimo o bua jaana, a re: “Ke bile ke tlaa khutlisa bontsi jwa Egepeto, ka seatla sa ga Nebukatenesare kgosi ya Babilone.

¹¹Ene le batho ba gagwe nae, ba ba boitshegang ba merafe, ba tlaa leriwe go senya lefatshe; ba tlaa somolela Egepeto ditšhaka tsa bone, ba tlaa tlatsa lefatshe ka babolaiwi.

¹²Mme ke tlaa kgadisa dinoka, ke tlaa rekisetsa lefatshe mo seatleng sa batho ba ba bosula; ke tlaa swafatsa lefatshe le tsotlhe tse di mo go lone, ka seatla sa baeng. Nna Jehofa ke buile.”

¹³Morena Modimo o bua jaana, a re: “Ke bile ke tlaa senya medimo ya disetwa, ke tlaa khutlisa tse e leng ditshwantsho, di nyelela mo Nofa; ga go ketla go tlhola go nna kgosana ya lefatshe la Egepeto; ke tlaa tsenya poifo mo lefatsheng la Egepeto.

¹⁴Ke tlaa swafatsa Patherose, ke tlaa tsenya molelo mo Soane, ke tlaa dirafatsa ditshekiso mo No.

¹⁵Ke tlaa goromeletsa tšararego ya me mo Sine o e leng kago e e thata ya phemelo ya Egepeto, ke kgaola bontsi jwa No.

¹⁶Ke tlaa tsenya molelo mo Egepeto; Sine o tlaa nna mo tlalelong e kgolo e e mahehe; le No o tlaa thubaganngwa; le Nofe o tlaa nna le baganetsi go le motshegare.

¹⁷Makau a Afene le a Pibesethe a tlaa wa ka tšhaka; mme metse eo e tlaa ya botshwarong.

¹⁸Le gone kwa Tagepenese motshegare o tlaa ngongwaela, mogang ke robelang teng dijokwe tsa Egepeto, pelafalo ya thata ya gagwe e tlaa khutla mo go ene; mme ka ga gagwe leru le tlaa mo khurumetsa, le bomorwadie ba tlaa ya botshwarong.

¹⁹Ke tlaa dirafatsa ditshekiso mo Egepeto jalo; mme ba tlaa itse fa ke le Jehofa.”

²⁰Ga dirala ya re ka ngwaga wa 11, ka kgwedi ya ntlha, ka letsatsi la bosupa la kgwedi, lefoko la ga Jehofa la tla mo go nna, la re:

²¹“Morwa motho, ke robile letsogo la ga Faro kgosi ya Egepeto; mme bona, ga le a fapiwa go tla le bewa melemo e e fodisang, go tla le bofiwa ka sebofo, gore le nonofele go tshwara tšhaka.

²²Ke gone ka moo Morena Modimo o bua jaana, a re: Bona, ke tlhabana le Faro kgosi ya Egepeto, ke tlaa roba mabogo a gagwe, le le thata, le le le robegileng gale; mme ke tlaa usa tšhaka mo seatleng sa gagwe.

²³Ke tlaa gasamisetsa Baegepeto mo merafeng, ke ba phatlalaletsa le mafatshe.

²⁴Ke tlaa thatafatsa mabogo a kgosi ya Babilone, ke tsenya tšhaka ya me mo seatleng sa yone; ke tlaa roba mabogo a ga Faro, mme o tlaa sonela fa pele ga yone ka ditshonelo tsa motho yo o tlhabilweng lwa go swa.

²⁵Ke tlaa tsholetsa mabogo a kgosi ya Babilone, mabogo a ga Faro a tlaa lesologa; mme ba tlaa itse fa ke le Jehofa, mogang ke tsenyang tšhaka ya me mo seatleng sa kgosi ya Babilone, mme e tlaa e otlololela lefatshe la Egepeto.

²⁶Ke tlaa gasamisetsa Baegepeto mo merafeng, ke tlaa ba phatlalaletsa le mafatshe; mme ba tlaa itse fa ke le Jehofa.”