Ezekiel 33

¹Lefoko la ga Jehofa la tla mo go nna, la re:

²“Morwa motho, bua le bana ba batho ba gaeno, o ba reye o re: Mogang ke lereng tšhaka mo lefatsheng lengwe, fa batho ba lefatshe leo ba tsaya motho mo go bone, ba mmaya molebedi wa bone;

³fa e tlaa re a bona tšhaka e tla mo lefatsheng, mme a letsa lonaka, a tlhagisa batho;

⁴foo le fa e le mang yo o utlwang tumo ya lonaka, mme a se ka a tlhagisega, fa tšhaka e tlaa e mo tlosa, madi a gagwe a tlaa nna mo tlhogong ya gagwe.

⁵O utlwile tumo ya lonaka, mme a se ka a tlhagisega, madi a gagwe a tlaa nna mo go ene: le mororo fa a ka bo a ne a tlhagisega o ka bo a golotse mowa wa gagwe.

⁶Mme fa molebedi a bona tšhaka e tla, mme a sa letse lonaka, mme batho ba sa tlhagisiwe, mme tšhaka e tla, e tlosa motho mongwe mo go bone; o tlosiwa mo boikepong jwa gagwe, mme madi a gagwe ke tlaa a batla mo seatleng sa molebedi.

⁷“Jalo fela, wena morwa motho, ke go beile molebedi wa ba ntlo ya Iseraele; mme ke gone utlwa lefoko mo molomong wa me, mme o ba neye tlhagiso e e tswang mo go nna.

⁸Ya re fa ke raya moikepi, ke re: ‘Wena moikepi, ruri o tlaa swa!’ Mme o sa bue go tlhagisa moikepi gore a tswe tseleng ya gagwe; moikepi yoo o tlaa swela mo boikepong jwa gagwe, mme madi a gagwe ke tlaa a lopa mo seatleng sa gago.

⁹Le fa go ntse jalo fa o tlhagisa moikepi ka ga tsela ya gagwe go mo sokolola mo go yone, mme a sa sokologe mo tseleng ya gagwe; o tlaa swela mo boikepong jwa gagwe, mme wena o bo o golotse mowa wa gago.

¹⁰“Le wena, morwa motho, raya ba ntlo ya Iseraele, o re: Lo tle lo bue jaana, lo re: ‘Ditlolo tsa rona le maleo a rona a mo go rona, re tlhorega fela mo go tsone; mme re bo re ka tshela jang?’

¹¹Ba reye o re: Jaaka ke tshedile, go bua Morena Modimo, ga ke na kgatlhego epe mo losong lwa moikepi; fa e se go re moikepi a sokologe mo tseleng ya gagwe, mme a tshele. Sokologang, sokologang mo ditseleng tsa lona tse di bosula; gonne lo ratelang go swa, lona ba ntlo ya Iseraele?

¹²“Le wena, morwa motho, raya bana ba batho ba gaeno, o re: ‘Tshiamo ya mosiami ga e ketla e mo golola mo motlheng wa tlolo ya gagwe; mme ka ga boikepo jwa moikepi ga a ketla a wa ka jone mo motlheng o o sokologang ka one mo boikepong jwa gagwe. Le ene yo o siameng ga a ketla a nonofa go tshela ka gone, mo motlheng o o leofang ka one.’

¹³Ya re fa ke raya mosiami ke re: ‘Ruri o tlaa tshela;’ fa a ikanya tshiamo ya gagwe, mme a dira boikepo, ga go ketla go gakologelwa ditiro dipe tsa gagwe tsa tshiamo; mme mo boikepong jo o bo dirileng o tlaa swela mo go jone.

¹⁴Gape, ya re fa ke raya moikepi ke re: ‘Ruri o tlaa swa;’ fa a sokologa mo boleong jwa gagwe, mme a dira se se laotsweng le se se siameng;

¹⁵fa moikepi a rebola peelo, a busa se o ne a se tsere ka bogodu, a sepela mo ditaong tsa botshelo, a sa dire boikepo bope; ruri o tlaa tshela, ga a ketla a swa.

¹⁶Ga go ketla go gakologelwa maleo ape a gagwe a o a dirileng go mo sekisa; o dirile se se laotsweng le se se siameng; ruri o tlaa tshela.

¹⁷“Le fa go ntse jalo bana ba batho ba gaeno ba tle ba re: ‘Tsela ya ga Jehofa ga e lekalekane;’ mme ka ga bone, tsela ya bone ga e a lekalekana.

¹⁸Mogang mosiami o sokologang mo tshiamong ya gagwe, mme a dira boikepo, o tlaa swela fela mo go jone.

¹⁹Mogang moikepi o sokologang mo boikepong jwa gagwe, mme a dira se se laotsweng le se se siameng, o tlaa tshela ka gone.

²⁰Le fa go ntse jalo lo a tle lo re: ‘Tsela ya ga Jehofa ga e lekalekane.’ Lona ba ntlo ya Iseraele, ke tlaa atlhola mongwe le mongwe wa lona ka fa mekgweng ya gagwe.”

²¹Ga dirala ya re ka ngwaga wa 12 wa botshwaro jwa rona, ka kgwedi ya lesome, ka letsatsi la botlhano la kgwedi, mongwe yo o falotseng kwa Jerusalema a tla kwa go nna, a re: “Motse o kgemethilwe.”

²²Jaana seatla sa ga Jehofa sa bo se letse se le mo go nna go le maitsebowa, yo o falotseng a ise a goroge; mme o ne a ntumolotse molomo, ga tsamaya a tla mo mosong; mme molomo wa me o ne o tumolotswe, mme ka bo ke sa tlhole ke le semumu.

²³Lefoko la ga Jehofa la tla mo go nna, la re:

²⁴“Morwa motho, ba ba ntseng mo mafelong ale a a kgakgabetseng mo lefatsheng la Iseraele, ba a bua, ba re: ‘Aberahame o ne a le mongwe fela, mme a rua lefatshe; mme rona re bantsi; lefatshe le neilwe rona go nna boswa.’

²⁵“Ke gone o ba reye o re: Morena Modimo o bua jaana, a re: Lo ja selo le madi a sone, lo tsholeletsa medimo ya disetwa ya lona matlho, lo tsholola madi a batho; a lo ka rua lefatshe?

²⁶Lo ema mo tšhakeng ya lona, lo dira tse di makgapha, monwe le mongwe o senya mosadi wa mongwe ka ene; mme a lona lo ka rua lefatshe?

²⁷“O tlaa ba raya jaana, o re: Morena Modimo o bua jaana, a re: Jaaka ke tshedile, ruri ba ba kwa mafelong a a kgakgabetseng ba tlaa wa ka tšhaka, le ene yo o mo nageng e e lobala fela ke tlaa mo neela dibatana di mo ja, le ba ba mo dikagong tse di thata tsa phemelo le mo dikgageng, ba tlaa swa ka kgogodi.

²⁸Ke tlaa dira lefatshe tshwafalo le kgakgamatso, pelafalo ya thata ya lone e tlaa khutla; dithaba tsa Iseraele di tlaa swafala, go ba go se ketla go feta ope ka teng.

²⁹Foo ba tlaa itse fa ke le Jehofa, ke sena go dira lefatshe tshwafalo le kgakgamatso, ka ntlha ya tse di makgapha tsotlhe tsa bone tse ba di dirileng.

³⁰“Ka ga gago, morwa motho, bana ba ba gaeno ba bua ka ga gago fa dithakong le mo mejakong ya mantlo, mme ba raane, mongwe le mongwe a reye wa ga gabo, a re: Ntlong, ke a lo rapela, lo utlwe, go re lefoko la ga Jehofa la reng.

³¹Ba tle mo go wena, jaaka batho ba tle ba tle, ba dule fa pele ga gago jaaka e ka bo e le batho ba me, ba utlwe mafoko a gago, mme ba se ke ba a dirafatse; gonne ka molomo ba bua lorato lo logolo, mme pelo ya bone e ye le papadi ya bone fela.

³²Bona, o ntse mo go bone jaaka pina e e monate ya mongwe yo o nang le lentswe le le kgatlhang, mme a itse go letsa seletso sentle, gonne ba utlwa mafoko a gago, mme ga ba a dire.

³³Mogang golo mo go dirafalang, bona, go etla, foo ba tlaa itse fa moperofeti mongwe a kile a ne a le mo go bone.”