Hosea 14

¹Iseraele we, boela mo go Jehofa Modimo wa gago; gonne o ole ka boikepo jwa gago.

²Yang le mafoko, lo boele mo go Jehofa; lo mo reye lo re: “Tlosa boikepo jotlhe, mme o amogele se se molemo; jalo re tlaa isa tshupelo ya melomo ya rona jaaka e ka bo e le dikgomo.

³Ašure ga a ketla a re boloka; re tlaa gana go palama dipitse; le gone ga re ketla re tlhola re raya tiro ya diatla tsa rona re re: ‘Lo medimo ya rona;’ gonne lesiela le bona kutlwelobotlhoko mo go wena.”

⁴“Ke tlaa fodisa tenego ya bone, ke tlaa ba rata ka go thama ga pelo fela; gonne bogale jwa me bo mo fapogile.

⁵Ke tlaa nna jaaka monyo mo go Iseraele; o tlaa thunya jaaka thunyo ya lesoma, mme o tlaa nama metswe jaaka Lebanone.

⁶Dikala tsa gagwe di tlaa nna maphatladika, le bontle jwa gagwe bo tlaa nna jaaka jwa motlhware le lonko lwa gagwe jaaka lwa Lebanone.

⁷Ba ba agileng fa tlase ga moriti wa gagwe ba tlaa boa; ba tlaa rulwa jaaka mabele, ba thunya jaaka mofine. Lonko lwa gagwe lo tlaa nna jaaka lwa bojalwa jwa mofine jwa Lebanone.

⁸Eferaime o tlaa re: ‘Ke sa tlhola ke dirang ka ditshwantsho tse di setilweng?’ Ke mo arabile, mme ke tlaa mo tlhokomela; ke ntse jaaka setlhare sa mofira o motala; loungo lwa gago lo bonwa mo go nna.”

⁹Yo o botlhale ke mang, mme o tlaa tlhaloganya dilo tse? Le yo o bonokopela, mme o tlaa di itse? Gonne ditsela tsa ga Jehofa di siame, mme ba ba tshiamo ba tlaa sepela mo go tsone; batlhodi bone, ba tlaa wa mo go tsone.