Leviticus 19

¹Jehofa a bua le Moše, a re:

²“Bua le phuthego yotlhe ya bana ba Iseraele, o ba reye o re: Lo tlaa nna boitshepo, gonne nna Jehofa Modimo wa lona ke boitshepo.

³Motho mongwe le mongwe a a boife mmaagwe le rraagwe, mme lo boloke boSabata ba me; ke nna Jehofa Modimo wa lona.

⁴“Lo se ka lwa fapogela kwa medimong ya disetwa, lo se ka lwa itirela medimo e e thelwang; ke nna Jehofa Modimo wa lona.

⁵“Fa lo isetsa Jehofa setlhabelo sa ditshupelo tsa kagiso, lo se ise gore lo tle lo amogelwe.

⁶A se jewe ka letsatsi le lo se isang ka lone, le ka moso; fa go setse sengwe ka letsatsi la boraro a se fisiwe ka molelo.

⁷Fa e ka re gongwe sa jewa ka letsatsi la boraro, e tlaa bo e le moila; ga se ketla se amogelwa.

⁸Mongwe le mongwe yo o se jang o tlaa rwala tshiamololo ya gagwe, ka a tlhapaditse selo se se itshepileng sa ga Jehofa; motho yoo, o tlaa kgaolwa mo bathong ba ga gabo.

⁹“E re fa lo roba thobo ya lefatshe la lona, o se ka wa robela ruri ditlhofi tsa leota la gago, le gone o se ka wa sela maronopo a thobo ya gago.

¹⁰Le gone o se ka wa ronopa tshimo ya gago ya mafine, le gone o se ka wa sela loungo lo lo oleng lwa tshimo ya gago ya mafine; o tlaa di siela mohumanegi le moeng; ke nna Jehofa Modimo wa lona.

¹¹“Lo se ka lwa utswa; le gone lo se ka lwa dira ka tsietso, le fa e le go akelana.

¹²Le gone lo se ka lwa ikana ka leina la me ka tsietso, wa tlhapatsa leina la Modimo wa gago; ke nna Jehofa.

¹³“O se ka wa patika mongwe ka wena, le fa e le go mo thukhutha; maduo a motlhanka wa gago yo o thapilweng ka tuelo, a se ka a lala kwa go wena go fitlhelela ka moso.

¹⁴O se ka wa hutsa motho yo o bosusu, le fa e le go beela sefofu sekgopi, mme o boife Modimo wa gago; ke nna Jehofa.

¹⁵“Lo se ka lwa dira tshiamololo epe mo katlholong; o se ka wa tlhokomela bomangmang jwa mohumanegi, le fa e le go tlotla bomangmang jwa mononofi; o atlhole wa gaeno ka tshiamo.

¹⁶O se ka wa tsamaya tsamaya mo bathong ba gaeno o le motsamaisi wa ditshebo, le gone o se ka wa tsenya botshelo jwa wa gaeno mo pitlaganong; ke nna Jehofa.

¹⁷“O se ka wa ila morwa rraago mo pelong ya gago; ruri go kgalemela wa gaeno, o tlaa mo kgalemela, o bo o sa rwale boleo ka ntlha ya gagwe.

¹⁸O se ka wa ipusolosetsa, le fa e le go nna ka pelo e e bosula ka ga bana ba batho ba gaeno; o rate wa gaeno jaaka o ithata; ke nna Jehofa.

¹⁹“Bolokang melao ya me. O se ka wa lesa dikgomo tsa gago tsa palamana le dilo tse di losika lo sele; o se ka wa jala peo di le pedi di sele mo leoteng la gago; le gone o se ka wa apara seaparo se se dirilweng ka go tlhakanya matsela a a mefuta mebedi.

²⁰“Le fa e le mang yo o lalang le mosadi yo o leng motlhanka, mme a beeletswe ke monna, mme a sa rekololwa gope, le fa e le go newa kgololo; ba tlaa sekisiwa, ga ba ketla ba bolawa, ka mosadi a ne a sa gololwa.

²¹Monna a ise tshupelelo ya gagwe ya molato kwa go Jehofa kwa mojakong wa mogope wa bophuthegelo, e bong phelefu ya tshupelelo ya molato.

²²Moperesiti o tlaa mo direla tetlanyo ka phelefu ya tshupelelo ya molato fa pele ga Jehofa ka ntlha ya boleo jwa gagwe jo o bo leofileng, mme o tlaa itshwarelwa boleo jo o bo leofileng.

²³“E tlaa re lo sena go fitlha mo lefatsheng, lo tlhoma ditlhare dingwe le dingwe tse di jewang, foo lo tlaa kaya loungo lwa tsone gore ke bokgola jwa tsone; a di nne bokgola go lona ka dinyaga di le tharo; a di se jewe.

²⁴Mo ngwageng wa bone loungo lotlhe lwa tsone lo tlaa nna boitshepo, lwa go baka Jehofa.

²⁵Mo ngwageng wa botlhano lo ka ja loungo lwa tsone, gore di tle di lo ungwele totafalo ya tsone; ke nna Jehofa Modimo wa lona.

²⁶“Lo se ka lwa ja sepe se se nang le madi a sone, le gone lo se ka lwa dira mereo, le fa e le go swaba ka eng le eng.

²⁷Lo se ka lwa ipeola tlhogo setlopo, le gone lo se ka lwa senya ditedu mo dintlheng.

²⁸Lo se ka lwa itshegakela baswi mebele ya lona, le fa e le go ikwala mmele ka gope, ke nna Jehofa.

²⁹“O se ka wa tlhapatsa morwadio, go mo dira seaka; lefatshe le ka tla la wela mo boakeng, mme la tlala boikepo.

³⁰Lo ilele boSabata ba me, lo bo lo sisimoge felo ga me ga boitshepo; ke nna Jehofa.

³¹“Se fapogeleng kwa go bone ba ba buang le badimo, le fa e le kwa go bone ba ba loang; lo se ka lwa ba batla go tla lo itshekololwa ke bone; ke nna Jehofa Modimo wa lona.

³²“O nanoge o eme fa pele ga yo o tlhogo e pududu, o tlotle sefatlhogo sa motsofe, mme o boife Modimo wa gago; ke nna Jehofa.

³³“Fa moeng a jakile mo go lona mo lefatsheng, lo se ka lwa mo siamololela.

³⁴Moeng yo o jakileng mo go lona, a a nne go lona jaaka yo o tsaletsweng mo go lona, o mo rate jaaka o ithata, gonne lo ne lo le baeng mo lefatsheng la Egepeto; ke nna Jehofa Modimo wa lona.

³⁵“Lo se ka lwa dira tshiamololo epe mo katlholong, mo selekanyong sa boleele, le sa bokete, le sa seelo.

³⁶Lo tlaa dira le dilekanyo tsa pego tse di siameng, le dilekanyo tsa bokete tse di siameng, le emere yo o siameng, le nkgwana e e lekanyang; ke nna Jehofa Modimo wa lona, yo ke lo ntshitseng mo lefatsheng la Egepeto.

³⁷Lo tlhokomele melao ya me yotlhe, le dikatlholo tsa me tsotlhe, go di dira; ke nna Jehofa.”