Micah 5

¹Jaanong o tlaa iphutha, o nna ditlhopha, wena morwadia ditlhopha; o re tlhasetse, ba tlaa kanya kgosi ya Iseraele mo lesameng ka thupa.

²“Wena Bethelehema Eferatha, yo o leng mmotlana mo go makgolokgolo a Juta, mo go wena go tlaa ntswela mongwe yo o tlaa nnang molaodi mo Iseraele; yo matso a gagwe a sa leng a nna a bogologolo, e bong ka go se nang tshimologo.”

³Ke gone ka moo o tlaa ba tlhobogang, ene yo o mo metlotseding a ba a tla a belega; foo makunantshane a bana ba ga rraagwe a tlaa boela kwa baneng ba Iseraele.

⁴O tlaa ema, mme o tlaa fudisa letsomane la gagwe ka thata ya ga Jehofa, ka tlotlomalo ya leina la ga Jehofa Modimo wa gagwe; mme ba tlaa nna; gonne jaanong o tlaa nna mogolo le go ya dikhutlong tsa lefatshe.

⁵Mme monna yoo e tlaa nna ene kagiso ya rona. Mogang Moasiria o tlang mo lefatsheng la rona, le mogang o gatang mo matlong a rona a dikgosi, foo re tlaa mo tsosetsa badisa basupa, le banna ba bagolwane ba ba ferang e le mabedi.

⁶Mme ba tlaa lakaila lefatshe la Asiria ka tšhaka, le lefatshe la Nimerote mo dikgorong tsa lone; mme o tlaa re golola mo Moasirieng, mogang o tlang mo lefatsheng la rona, le mogang o gatang mo teng ga molelwane wa rona.

⁷Le masalela a ga Jakobe a tlaa nna mo gare ga ditšhaba di le dintsi, jaaka monyo o o tswang kwa go Jehofa, jaaka medupe mo bojannyeng; e e sa diegeleng motho, le fa e le go leta bana ba batho.

⁸Maselela a ga Jakobe a tlaa nna mo merafeng, mo gare ga ditšhaba di le dintsi, jaaka tau mo gare ga diphologolo tsa sekgwa, jaaka tawana mo matsomaneng a dinku, e e a reng e ralala e be e gatake, e gagole, mme go bo go se na ope yo o gololang.

⁹A seatla sa gago se tsholelediwe godimo ga baba ba gago, mme a baba botlhe ba gago ba kgaolwe.

¹⁰“Go tlaa dirala mo motlheng oo,” go bua Jehofa, “go re ke tlaa kgaola dipitse tsa gago di tswa mo gare ga gago, ke ba ke senya dikara tsa gago.

¹¹Ke tlaa kgaola metse ya lefatshe la gago, ke tlaa rutla dikago tsotlhe tsa gago tsa phemelo tse di thata.

¹²Ke tlaa kgaola ke tlosa boloi mo seatleng sa gago; mme ga o ketla o tlhola o dira le baswabi ba ditiro.

¹³Ke tlaa kgaola ke tlosa ditshwantsho tsa gago tse di setilweng, le maje a a emeng motloutlo a gago mo gare ga gago; mme ga o ketla o tlhola o obamela tiro ya diatla tsa gago.

¹⁴Ke tlaa khumola ke tlosa Medimako ya gago mo gare ga gago, ke tlaa senya metse ya gago.

¹⁵Ke tlaa dirafatsa pusoloso ka bogale le mo merafeng e e se kang ya reetsa.”