Habakkuk 3

¹Morapelo wa ga Habakuke moperofeti, o o rulaganyeditsweng Shigionothe.

²Jehofa, ke utlwile tumedi ya gago, mme ka boifa; Jehofa rudisa tiro ya gago mo gare ga dinyaga, mo gare ga dinyaga o dire gore e itsiwe; o re o le bogale o gakologelwe boutlwelobotlhoko.

³Modimo o ne wa tswa kwa Temane, le Moitshepi kwa thabeng ya Parane. Sela. Kgalalelo ya gagwe ya apesa magodimo, le lefatshe la tlala pako ya gagwe.

⁴Le phatsimo ya gagwe e ne e ntse jaaka lesedi; go ne go tswa marang mo seatleng sa gagwe; le go sujwa ga nonofo ya gagwe go ne go le teng.

⁵Kgogodi ya mo etelela pele, le melelo ya tladi ya tlapana ya tswa fa dinaong tsa gagwe.

⁶A ema, a lekanya lefatshe; a leba, mme a phatlalatsa merafe; le dithaba tsa bosakhutleng tsa faladiwa, le makhubu a a sa yeng kae a ikoba; ditsamao tsa gagwe di ne di ntse jaaka bogologolo.

⁷Ka bona megope ya Kušane e le mo pitlaganong; dilepelelo tsa lefatshe la Midiane tsa tetesela.

⁸A Jehofa o ne a itumologela dinoka? A o ne o le bogale le dinoka, kgotsa a o ne o gakaletse lewatle, fa e bo ne ne o ne o palame dipitse tsa gago, o palame dikara tsa gago tsa poloka?

⁹Bora jwa gago bo ne bo senoletswe ruri, maikanelo a ditso e le lefoko la tlhomamo. Sela. O ne wa tsetsereganya lefatshe ka dinoka.

¹⁰Dithaba tsa go bona, mme tsa boifa; morwalela o o makhubukhubu wa feta; boteng jwa ntsha kodu, jwa tsholeletsa mabogo godimo.

¹¹Letsatsi la ema mo bonnong jwa lone, le yone kgwedi; ka lesedi la metswi ya gago ka e hulega, ka phatsimo ya lerumo la gago le le galalelang.

¹²O ne wa ralala lefatshe ka kgakalo, wa photha merafe, o le bogale.

¹³Wa tswela poloko ya batho ba gago, poloko ya ba gago ba ba tloditsweng, wa ntsha tlhogo ya ntlo ya baikepi ntho, wa senola motheo go ya fela kwa thamong. Sela.

¹⁴O ne wa phunya yo o leng tlhogo ya batlhabani ba gagwe ka marumo a gagwe fela; ba ne ba tsile jaaka setsuatsue go mphalatsa; go duduetsa ga bone go ne go ntse jaaka e kete ga go jela ruri bahumanegi ka bosaitsiweng.

¹⁵O ne wa gata lewatle ka dipitse tsa gago, e bong mokoa wa metsi a a thata.

¹⁶Ka utlwa, mme mpa ya me ya roroma, dipounama tsa me tsa tlakaselela lentswe; go nyera ga ntsena mo marapong, ka roroma mo felong ga me; ka go lebelela motlha wa tlalelo, mogang o bololelang batho, e bong ene yo o mo tlhaselang a le ditlhophatlhopha.

¹⁷Gonne le fa mofeige o se ketla o thunya, le fa go tlaa bo go se na loungo mo mafineng; tiro ya motlhware e ka tla ya tlhaela, le matlhagare a se ka a ntsha dijo; letsomane le ka tla la kgaolwa mo lesakaneng, mme go se ka ga dirana le matlhape mo marakeng.

¹⁸Le fa go ntse jalo ke tlaa itumela mo go Jehofa, ke tlaa ipela mo Modimong wa poloko ya me.

¹⁹Jehofa, Morena, ke thata ya me, o dira dinao tsa me di nna jaaka maoto a tshephe, o tlaa ntsamaisa mo mafelong a me a a godimo. Go diretswe moopedi yo mogolo mo diletsong tsa me tse di ditlhale.