Acts 17

¹Jaana e rile ba sena go ralala Amfipolise le Apolonia, ba fitlha mo Thesalonika, kwa go nang le ntlo ya thuto ya Bajuta teng.

²Paulo a tsena mo go bone jaaka tlwaelo ya gagwe, a nna a fetolana nabo ka dikwalo, ka boSabata ba le bararo.

³A ranola, a ba rulaganyetsa gore, go ne go tshwanetse fa Keresete a tlaa swa, le go ba a tsoga mo losong, a ba a re: “Jesu yo ke mo lo bolelelang, ke ene Keresete.”

⁴Bangwe ba bone ba utlwa, mme ba ikopanya le Paulo le Silase; le bontsi jo bogolo jwa Bagerika ba ba rapelang Modimo, le bahumagadi ba le bantsinyana.

⁵Mme Bajuta, ka ba tlhotlhelediwa ke lefufa, ba itseela banna bangwe ba difephe, mo go ba e leng babodufadi ba ba senang molemo ope; e rile ba sena go kgobokanya batho, ba feretlha motse, ba tlhasela ntlo ya ga Jasone, ba leka go ba ntshetsha mo bathong.

⁶E rile ba sa ba fitlhele, ba swabolela Jasone le bakaulengwe bangwe kwa pele ga bolaodi ba motse, ba goa ka thata ba re: “Batho ba, ba ba tshelepantseng lefatshe, le mono ba tsile.

⁷Jasone o ba amogetse; mme batho ba botlhe ba tlola melao ya ga Kaesare, ka ba re go na le kgosi e nngwe ga twe, Jesu.”

⁸Ya re batho le balaodi ba motse ba utlwa dilo tse, ba fuduega.

⁹Ya re ba sena go lefisa Jasone le ba bangwe, ba ba lesa ba tsamaya.

¹⁰Bakaulengwe ba akofa ba tshabisa Paulo le Silase bosigo, ba ya kwa Berea; ya re ba fitlha teng, ba tsena mo ntlong ya thuto ya Bajuta.

¹¹Bone ba ne ba tsalegile bogolo go ba ba kwa Thesalonika, ka ba amogetse lefoko ka pelo e e etleetsegileng, ba lotolotsa mo dikwalong ka malatsi otlhe, fa dilo tse di ntse jalo.

¹²Ke gone ba le bantsi ba bone ba dumela; le bahumagadi ba ba tlotlegang ba Bagerika, le banna ba le bantsinyana.

¹³E rile Bajuta ba Thesalonika ba tlhaloganya fa lefoko la Modimo le bolelwa ke Paulo le mo Berea, le gone ba ya teng, ba feretlha, ba fudua bontsintsi jwa batho.

¹⁴Foo bakaulengwe ba akofa ba tshabisa Paulo, ba re ba mo isa kwa lewatleng; mme Silase le Timotheo ba nama ba sa setse teng.

¹⁵Ba ba tsamaisitseng Paulo ba ya ba mo fitlhisa kwa Athene; ya re ba sena go laelediwa kwa go Silase le Timotheo, gore ba tle kwa go ene ka bonako, ba tsamaya.

¹⁶E rile ka Paulo a sa ntse a ba nnetse mo Athene, mowa wa gagwe wa tlhotlheletsega mo teng ga gagwe, ka a bona motse o tletse medimo ya disetwa.

¹⁷Jalo a nna a fetolana le Bajuta le batho ba ba rapelang Modimo, ba le mo ntlong ya thuto, le mo patlelong ya motse ya borekelo ka malatsi otlhe, a fetolana le ba o rakanang nabo.

¹⁸Batlhale bangwe ba Baepikuria le Basetoike le bone ba ganetsanya nae. Mme bangwe ba re: “O ba a rata go buang mmalabadi yo?” Ba bangwe ba re: “E kete e ka nna mmoledi wa medimo e sele,” ka gobo a bolela Jesu le go tsoga ga baswi.

¹⁹Mme ba mo tshwara, ba mo isa kwa Areopago, ba re: “Tswee, a ga re ka ke ra itse thuto e ntšha e, e o e bolelang, gore ke eng?

²⁰Gonne o lere dilo dingwe di sele mo ditsebeng tsa rona; mme ra re, re rata go itse dilo tse kwa di kaelang teng.”

²¹Jaana Baathene botlhe le baeng ba ba jakileng teng, ba ne ba tle ba fetise lobaka lwa bone ba sa dire sepe sa bobedi, fa e se go bolela le fa e le go utlwa sengwe se seša fela.

²²Paulo a ema fa gare ga Areopago a re: “Lona banna ba Athene, ke a lemoga fa e kete lo na le tshisimogo mo dilong tsotlhe.

²³Gonne e rile ke feta, ke leba dilo tse lo di obamelang, ka fitlhela le sone sebeso sengwe, se na le sekwalo sa go re: SA MODIMO MONGWE O O SA ITSIWENG. Ke gone, se lona le se obamelang ka go tlhoka go itse, ke sone se ke se lo ranolelang.

²⁴Modimo o o dirileng lefatshe le dilo tsotlhe tse di mo go lone, one, ka o le Morena wa legodimo, le lefatshe, ga o nne mo ditempeleng tse di agiwang ka diatla;

²⁵le gone ga o direlwe ke diatla tsa batho, jaaka e kete o tlhoka selo sengwe, e tswa one ka osi o naya botlhe botshelo, le mowa le dilo tsotlhe;

²⁶o dirile ditšhaba tsotlhe tsa batho, ba tswa mothong a le mongwe fela, go tla ba aga mo lefatsheng lotlhe, ka o tlhomamisitse metlha ya bone e e laotsweng, le melelwane ya maago a bone;

²⁷gore ba batle Modimo, e tle e re kgotsa ba o apaape, ba o bone, le fa o se kgakala le mongwe le mongwe wa rona;

²⁸gonne mo go one re a tshela, mo go one re a tshikinyega, re leyo ka one; jaaka le bangwe bantshi ba dipina ba lona ba buile ba re: ‘Gonne le rona re losika lwa one.’

²⁹Ke gone e re ka re le lotsalo lwa Modimo, ga re a tshwanela go gopola fa o e leng Modimo tota o ka tshwana le gouta, le fa e le selefera, le fa e le lentswe le le setilweng ka botswerere le maano a motho.

³⁰Ke gone, metlha ya botlhoka kitso, Modimo o ne wa e tlhokomologa; mme gompieno o laola gore batho botlhe ba ikwatlhaye ka ntlha tsotlhe,

³¹ka o tlhomile letsatsi le o tlaa atlholang lefatshe ka lone ka tshiamo, ka monna yo o mo laotseng; mo, o go tlhomamiseditse batho botlhe ka o mo tsositse mo baswing.”

³²Jaana ya re ba utlwa ka ga go tsoga ga baswi, bangwe ba sotla; ba bangwe ba re: “Re tlaa ba re go utlwa gape ka ga moo.”

³³Paulo a tswa mo go bone jalo.

³⁴Banna bangwe ba mo ngaparela, ba dumela; Dionisio wa Moareopago le ene a le mo go bone, le mosadi mongwe yo o bidiwang Damarise, le ba bangwe nabo.