1 Corinthians 15

¹Jaana bagaetsho, ke lo itsise Mafoko a a Molemo a ke a lo reretseng, a le lona lo a amogetseng, le a lo emeng mo go one,

²a lo bileng lo bolokwa ka one; ka re, ke lo itsise mantswe a ke a lo reretseng, fa lo sa ntse lo a tshegeditse, fa lo se ka lwa dumelela lefela.

³Gonne e rile pelepele ka lo neela mo le nna ke go amogetseng, e bong gore Keresete o swetse dibe tsa rona ka fa dikwalong; le gore, o ne a fitlhwa;

⁴le gore, o tsositswe ka letsatsi la boraro ka fa dikwalong;

⁵le gore, a bonwa ke Kefase; le ke ba ba 12 morago ga moo.

⁶Morago a bonwa ke badumedi ba ba fetang 500 ka lobaka lo le longwe fela, ba bontsi jwa bone ba sa ntseng ba leyo le gompieno, bangwe ba setse ba robetse;

⁷morago a bonwa ke Jakobe; morago ke baaposetole botlhe.

⁸Moragorago, a bonwa le ke nna, ke le motho yo e keteng ke tsetswe ka lobaka lo e seng lone.

⁹Gonne ke mmotlana wa baaposetole, yo ke bileng ke sa tshwanela go bidiwa moaposetole, ka ke bogisitse phuthego ya Modimo.

¹⁰Ke ntse jaaka ke ntse jaana ka ntlha ya tshegofatso ya Modimo; tshegofatso ya one e e ntirafaletseng, ga e a ka ya fitlhelwa e le lefela, mme ka dira bogolo go bone botlhe, le fa go ntse jalo ya bo e se nna, mme e le tshegofatso ya Modimo e ke ntseng ke na nayo.

¹¹Ke gone le fa e le nna, le fa e le bone, re rera jalo, le lona lo dumetse jalo.

¹²Jaana fa Keresete a rerwa gore o tsositswe mo baswing, ana bangwe mo go lona ba bua jang ba re, ga go na go tsoga ga baswi?

¹³Fa go se na tsogo ya baswi, le ene Keresete ga a a tsosiwa;

¹⁴mme fa Keresete a sa tsosiwa, foo thero ya rona ke lefela; tumelo ya lona le yone ke lefela.

¹⁵Ee, re bile re fitlhelwa re le basupi ba Modimo ba re akang fela; ka re supile fa Modimo o tsositse Keresete mo baswing; ga o a ka wa mo tsosa, fa e le ruri baswi ba sa tsosiwe.

¹⁶Gonne fa baswi ba sa tsosiwe, le ene Keresete ga a a tsosiwa.

¹⁷Mme fa Keresete a sa tsosiwa, tumelo ya lona ke lefela; lo sa ntse lo le mo dibeng tsa lona.

¹⁸Jalo le ba ba robaletseng mo go Keresete ba tlaa bo ba nyeletse.

¹⁹E ka re fa re solofetse mo go Keresete mo botshelong jono bo le josi fela, ke rona ba re tlhomolang pelo bogolo go batho botlhe.

²⁰Nnyaa, jaanong Keresete o tsositswe mo baswing, e le lebutswapele la ba ba robetseng.

²¹Gonne e re ka loso lo tsile ka motho, go tsoga ga baswi le gone go tsile ka motho.

²²Gonne jaaka botlhe ba swa ka Atame, go ntse jalo, botlhe ba tlaa tshedisiwa ka Keresete.

²³E tlaa bo e le mongwe le ka fa thulaganyong ya gagwe: Keresete e le ene lebutswapele; foo go tle ba e leng ba ga Keresete, mo go tleng ga gagwe.

²⁴Foo go tle bokhutlo jo o tlaa neelang Modimo, e bong Rara, bogosi ka jone, a sena go nyeletsa puso yotlhe le taolo, le nonofo.

²⁵Gonne o na le go busa fela, a ba a tla a tsamaye a beye baba botlhe ba gagwe fa tlase ga dinao tsa gagwe.

²⁶Mmaba wa bofelo yo o tlaa nyelediwang ke loso.

²⁷“Gonne, o beile dilo tsotlhe mo taolong fa tlase ga dinao tsa gagwe.” Fa o re: “Dilo tsotlhe di beilwe mo taolong,” go a bonala fa go sa rewe one o o beileng dilo tsotlhe mo taolong ya gagwe.

²⁸E tlaa re dilo tsotlhe di sena go bewa mo taolong ya gagwe, foo Morwa one le ene ka esi, o tlaa bewa mo taolong ya one o o beileng dilo tsotlhe mo taolong ya gagwe, gore Modimo o nne gotlhe mo go tsotlhe fela.

²⁹Fa go sa nna jalo, ba ba kolobelediwang baswi ba tlaa dirang? Fa baswi ba sa tsosiwe gope, ba tlaa ba ba kolobelediwe go reng?

³⁰Le rona, re emetseng mo poitshegong ka dipaka tsotlhe?

³¹Ke a ikana ka go ipelafatsa ga me ka lona bagaetsho, mo ke nang nago mo go Keresete Jesu Morena wa rona, ka re, ke a swa ka malatsi otlhe.

³²Fa ke lole le dibatana kwa Efeso, ka fa mokgweng wa batho, go a bo go nthusang? A e re fa baswi ba sa tsosiwe, a re jeng, re nweng, gonne re tsoga re swa ka moso.

³³Lo se ka lwa tsietsega: “Go ikopanya le ba ba bosula, go tle go bodise mekgwa e mentle.”

³⁴Tsitsibogelang kwa tshiamong, mme se leofeng; gonne bangwe ga ba na kitso ya Modimo; mo, ke go bua go lo tlhabisa ditlhong.

³⁵Mme mongwe o ba a tla a re: “Ana baswi ba tsosiwa jang? Mme ba tlaa tla ka mmele o o ntseng jang?”

³⁶Seelele ke wena! Le se wena ka wesi o se jalang, ga se ke se tshela, fa se sa swe pele.

³⁷Aitse se o se jalang, ga o jale mmele o o tlaa nnang, fa e se tlhaka fela, kgotsa e le ya mabele, gongwe e le ya peo e sele.

³⁸Mme Modimo o e naya mmele ka fa go kgatlhileng one ka teng, o naya peo nngwe le nngwe mmele o e leng wa yone.

³⁹Nama yotlhe ga e tshwane; mme go nama e nngwe ya batho, e nngwe nama ya phologolo, e nngwe nama ya dinonyane, e nngwe nama ya ditlhapi.

⁴⁰Go bile go na le mebele ya selegodimo, le mebele ya selefatshe; mme kgalalelo ya mebele ya selegodimo e sele, le kgalalelo ya mebele ya selefatshe e sele.

⁴¹Go na le kgalalelo nngwe ya letsatsi, e nngwe ke kgalalelo ya kgwedi, e nngwe ke kgalalelo ya dinaledi; gonne naledi nngwe e farologanye mo go e nngwe ka kgalalelo.

⁴²Go tsoga ga baswi le gone go ntse jalo. Go jalwa e le mo go bolang, go tsosiwe e le mo go sa boleng.

⁴³Go jalwa e le mo go tlotlologileng; go tsosiwe go le mo kgalalelong; go jalwa go le bokoa; go tsosiwe go le thata.

⁴⁴Go jalwa e le mmele wa tlholego; go tsosiwe e le mmele wa semowa. E re fa go na le mmele wa tlholego, wa semowa le one o teng.

⁴⁵Le gone go kwadilwe jalo ga twe: “Motho wa pele, e bong Atame, a dirwa motho yo o tshedileng.” Atame wa morago a dirwa mowa o o tshedisang.

⁴⁶Le fa go ntse jalo sa pele e ne e se sa semowa, fa e se sa tlholego fela; mme sa semowa sa tla kwa morago.

⁴⁷Motho wa pele ke wa mmu, wa selefatshe; motho wa bobedi ke wa legodimo.

⁴⁸Jaaka wa selefatshe a ntse, ba ba leng ba selefatshe le bone ba ntse jalo; jaaka wa selegodimo a ntse, ba ba leng ba selegodimo le bone ba ntse jalo.

⁴⁹Jaaka re ne re ntse mo tshwanong ya wa selefatshe, re tlaa nna jalo mo tshwanong ya wa selegodimo.

⁵⁰Jaana, bagaetsho, ke bua lefoko le, ka re, nama le madi ke dilo tse di sa ka keng tsa rua bogosi jwa Modimo; le gone go bola ga go ka ke ga rua bosaboleng.

⁵¹Bonang, ke lo bolelela bosaitsiweng: Ga re ketla re robala rotlhe, mme re tlaa fetolwa rotlhe fela,

⁵²ka gangwe fela, ka ponyo ya leitlho, ka lobaka lwa lonaka lwa bofelo. Gonne lonaka lo tlaa gelebetega, mme baswi ba tlaa tsosiwa ka mo go sa boleng, mme rona re tlaa fetolwa.

⁵³Gonne mo go bolang mo, go na le go apara bosaboleng, le mo go swang mo, go na le go apara bosasweng.

⁵⁴E tlaa re mo go bolang mo go sena go apara bosaboleng, le mo go swang mo go sena go apara bosasweng, foo go tlaa dirafala lefoko le le kwadilweng ga twe: “Loso lo meditswe ke phenyo.”

⁵⁵“Loso, phenyo ya gago e kae? Loso, lobelela lwa gago lo kae?”

⁵⁶Lobelela lwa loso ke boleo; mme thata ya boleo ke molao.

⁵⁷Mme a go lebogwe Modimo, o o re nayang phenyo ka Morena wa rona Jesu Keresete.

⁵⁸Ke gone bagaetsho ba ba rategang, lo tlhomame, lo nitame, lo ntse lo totafetse mo tirong ya Morena ka metlha yotlhe, ka lo itse fa tiro ya lona e se ketla e nna lefela mo Moreneng.