2 Corinthians 7

¹Baratwa, e re ka re na le dipolelo tse tsa tsholofetso, a re itshekiseng mo maitshekologong otlhe, a nama le a mowa, re itekaneditse boitshepo mo go boifeng Modimo.

²Re atlhamolosetseng pelo tsa lona; ga re a ka ra siamololela ope, ga re a ka ra bodisa ope, ga re a ka ra jela ope.

³Ga ke bue jalo go lo sekisa, gonne ke buile gale, ka re, lo mo pelong tsa rona go swa mmogo le go tshela mmogo.

⁴Ke bua ka tshosologo e kgolo mo go lona, ke ipelafatsa ka thata ka lona; ke tletse kgomotso, ke penologa boitumelo mo pitlaganong yotlhe ya rona.

⁵Gonne e rile re tsile mo Maketonia, nama ya rona ya se ka ya bona boiketlo, re pitlaganngwa ka ntlha tsotlhe; kwa ntle ga bo go le ditlhabano, mo teng ga bo go le dipoifo.

⁶Le fa go ntse jalo, yo o gomotsang baikokobetsi, e bong Modimo, wa re gomotsa ka go tla ga Tito;

⁷e seng ka go tla ga gagwe go le gosi, le ka yone kgomotso e ene o gomoditsweng ka yone mo go lona, ka a re bolelela tlhologelelo ya lona, le selelo sa lona, le go ntlhoafalela ga lona; jalo ka ba ka tla ka itumela bogolo.

⁸Gonne le fa ke lo hutsafaditse ka lokwalo lwa me, ga ke go ikwatlhaele, le fa nkile ka re, ke a ikwatlhaya jalo; gonne ke a bona fa lokwalo loo lo lo hutsafaditse, ya bo e le ka lobakanyana fela.

⁹Jaanong ke a itumela, e seng ka gobo lo kile lwa hutsafadiwa, mme e le ka gobo lo hutsafaditswe lwa ba lwa ikwatlhaya; gonne lo hutsafaditswe ka fa mokgweng o o tshwanetseng poifomodimo, gore lo se ka lwa bona tatlhego ka rona mo go sepe.

¹⁰Gonne bohutsana jo bo tshwanetseng poifomodimo bo tsosa boikwatlhao jo bo isang polokong, e le boikwatlhao jo bo sa ikwatlhaelweng; mme bohutsana jwa lefatshe bo goga loso.

¹¹Gonne bonang selo seo ka sosi, ke raya jaaka lo hutsafadiwa ka fa mokgweng o o tshwanetseng poifomodimo, ga tsosa ikelotlhoko e le kgolo jang mo go lona, ee, le go itlosa molato, ee, le tšhakgalo, ee, le poifo, ee, le tlhologelelo, ee, le tlhoafalo, ee, le go ipusolosa! Lo itshupile gotlhe fa lo itshekile ka ga selo se.

¹²Jalo le fa ke lo kwaletse, ka bo ke sa kwale ka ntlha ya gagwe yo o siamolotseng, le fa e le ka ntlha ya gagwe yo o siamololetsweng, mme e ne e le gore kelotlhoko e kgolo ya lona ka ga rona e lo bonatshediwe mo ponong ya Modimo.

¹³Ke gone, re gomotsegile. Mme e rile mo kgomotsegong ya rona, ra itumela bogolo ka ntlha ya boitumelo jwa ga Tito, ka mowa wa gagwe o lapolositswe ke lona lotlhe.

¹⁴Gonne fa ke mmelafaletse ka sengwe ka ga lona, ga ke a ka ka tlhabisiwa ditlhong; jaaka re buile dilo tsotlhe le lona ka boammaaruri, go ipelafatsa ga rona le gone, mo ke go dirileng fa pele ga Tito, ga fitlhelwa e le boammaaruri.

¹⁵Lorato lwa gagwe lwa mo teng lo totetse lona bogolo, ka a gakologelwa kutlo ya lona lotlhe, jaaka lo mo amogetse ka poifo le tlakaselo.

¹⁶Ke a itumela ka ke nametsegile ka ga lona mo dilong tsotlhe.