1 Timothy 5

¹O se ka wa kgalemela mogolwane; mme o mo laye jaaka fa e ka bo e le rraago; le makau jaaka bomonnao.

²Basadi ba ba godileng o ba laye jaaka fa e ka bo e le bommaago; le barweetsana jaaka bokgaitsadio, ka boitsheko jotlhe.

³Tlotla basadi ba batlholagadi ba e leng batlholagadi ruri.

⁴Fa mosadi mongwe wa motlholagadi a na le bana, kgotsa ditlogolo, a bao ba ithute pele go itshupa bopelonomi mo go ba ga bone, le go leboga batsadi ba bone; gonne mo, go lebosega mo matlhong a Modimo.

⁵Aitse mosadi yo e leng motlholagadi ruri, a bile a tlogetswe a le mo paeng fela, tsholofelo ya gagwe e tlhomilwe mo Modimong, o tle a tswelele mo mekokotlelong le mo merapelong bosigo le motshegare.

⁶Mme mosadi wa motlholagadi yo o ineelang mo dikgatlhegong, o sule a sa ntse a tshedile.

⁷Le tsone dilo tse o di ba laolele, gore ba tle ba nne ba se na mokgobo.

⁸Fa mongwe a sa tlamele ba ga gabo, bogolo ba e leng ba ntlo ya gagwe, o latotse tumelo, mme o bosula go gaisa yo o sa dumeleng.

⁹Mosadi ope a se ka a kwalwa e le motlholagadi a ise a nne dinyaga di le 60, e le yo o kileng a nyalwa ke monna a le mongwe fela.

¹⁰A bolelwa sentle ke ditiro tse di molemo; fa a godisitse bana, fa a bolokile baeng, fa a tlhapisitse baitshepi dinao, fa a thusitse ba ba mo pitlaganong, fa a tsweletse pele ka tlhoafalo mo tirong nngwe le nngwe e e molemo.

¹¹O gane basadi ba batlholagadi ba ba sa ntseng ba le meroba; gonne e tlaa re ba babalelwa ke taolo ya ga Keresete, ba rate go nyalwa;

¹²mme ba bone tshekiso, ka gobo ba latlhile ikano ya bone ya ntlha.

¹³Le gone ba ithute botshwakga, ba nne ba dikologe le matlo; mme ga se go re ba ditshwakga fela, e bile ke babalabadi le balotlhanyi, ba bue dilo tse ba sa tshwanelang go di bua.

¹⁴Ke gone, ke rata gore batlholagadi ba ba sa ntseng ba le meroba ba nyalwe, ba bone bana, ba laole ntlo, ba tlhoke le go naya mmaba lobaka lope lwa go kgala;

¹⁵gonne le jaana bangwe ba setse ba fapogile ba ile le Satane.

¹⁶Fa mosadi mongwe yo o dumelang a na le basadi ba batlholagadi, e le ba ga gabo, a a ba thuse, mme phuthego e se imediwe; gore e tle e thuse ba e leng batlholagadi ruri.

¹⁷Bagolwane ba ba laolang sentle a ba kaiwe go tshwanela tlotlo sebedi, bogolo ba ba dirang mo lefokong le mo go ruteng.

¹⁸Gonne lokwalo lwa re: “O se ka wa bofa kgomo molomo fa e photha mabele,” gape lwa re: “Modiri o tshwanetswe ke maduo a gagwe.”

¹⁹Fa mogolwane a bewa molato, o se ka wa dumela, fa e se ka molomo wa basupi ba le babedi, kgotsa ba le bararo.

²⁰Ba ba leofang o ba kgalemele mo ponong ya botlhe, gore ba bangwe le bone ba nne mo poifong.

²¹Ke go laya mo ponong ya Modimo le ya ga Keresete Jesu, le ya baengele ba ba itshenketsweng, gore o tlhokomele dilo tse ka mo go se nang tlhaolo, o sa dire sepe ka mokgwa wa go rata mongwe.

²²O se ka wa beela motho ope diatla ka potlako, le gone o se ka wa tlhakanela le batho ba bangwe dibe tsa bone; o itshegetse o le mo boitshekong.

²³O se tlhole o le monwi wa metsi, o nne o nwe bojalwanyana jwa mofine ka ntlha ya mala a gago, le makoa a gago a mantsi.

²⁴Dibe tsa batho ba bangwe di a bonala, di fetela pele di ya tshekisong; tsa batho ba bangwe le bone di ba sale morago.

²⁵Go ntse fela jalo, go na le ditiro tse di molemo tse di bonalang fela; le tse di sa nnang jalo ga di ka ke tsa fitlhega.