Hebrews 3

¹Ke gone bagaetsho ba ba itshepileng, lo le baabedwi ba pitso ya selegodimo, akanyang Moaposetole le Moperesiti yo mogolo wa tumelo ya rona, e bong Jesu;

²yo o ne a ikanyega mo go one o o mmeileng, jaaka le ene Moše a ne a ntse mo ntlong yotlhe ya one.

³Gonne ene, o kailwe fa a tshwanetse kgalalelo e e fetang ya ga Moše, go etsa jaaka yo o agileng ntlo a tle a bone kgalalelo e e fetang ya yone ntlo.

⁴Gonne ntlo nngwe le nngwe e tle e agiwe ke motho mongwe; mme yo o agileng dilo tsotlhe ke Modimo.

⁵Le gale Moše o ne a ikanyega mo ntlong yotlhe ya one, jaaka motlhanka go nna tshupo ka ga dilo tse di ne di tloga di bolelwa;

⁶mme Keresete o ne a ikanyega jaaka ngwana mo ntlong ya one; o rona re leng ntlo ya one, fa re tshegetsa botlhokapoifo jwa rona, le boikgantsho jwa tsholofelo ya rona ka tlhomamo, go ya kwa bokhutlong.

⁷Ke gone fela jaaka Mowa o o Boitshepo o bua o re: “Gompieno fa lo utlwa lentswe la one,

⁸se kgwaralatseng pelo tsa lona jaaka mo kgakatsong, jaaka mo motlheng wa teko kwa nageng,

⁹e borraeno ba ntalela ka yone ba nteka, mme ba bona ditiro tsa me ka dinyaga di le masome mane.

¹⁰Ke gone ka moo ke ne ka itumologela losika lo, ka ba ka re: ‘Ba timela ka gale le ka gale mo pelong tsa bone; ga ba a ka ba itse ditsela tsa me.’

¹¹Jaaka ke ikanne mo bogaleng jwa me, ka re: ‘Ga ba ketla ba tsena mo boikhutsong jwa me.’ ”

¹²Lo itise, bagaetsho, e se re kgotsa go bo go ka nna le mo go mongwe wa lona pelo e e bosula, e e sa dumeleng, ya go kgaogana le Modimo o o tshedileng.

¹³Lo laane ka malatsi otlhe, ka go sa ntse go ka twe: “Gompieno,” gore ope wa lona a se ka a kgwaraladiwa ke tsietso ya boleo.

¹⁴Gonne re diregile baabedwi le Keresete, fa re tshegetsa tshimologo ya boikanyo jwa rona, go ya ka tlhomamo kwa bokhutlong.

¹⁵Ka go sa ntse go twe: “Gompieno, fa lo utlwa lentswe la one, se ikgwaralatseng pelo tsa lona jaaka mo kgakatsong.”

¹⁶Ka gobo ke bomang ba e rileng ba sena go utlwa ba gakatsa? Nnyaa, a ga se bone botlhe ba ba duleng kwa Egepeto ka Moše?

¹⁷Ba o ba itumologetseng ka dinyaga di le 40, e ne e le bomang? A e ne e se ba ba leofileng, ba ditoto tsa bone di wetseng mo nageng?

¹⁸Ba o ba ikanetseng, wa re, ga ba ketla ba tsena mo boikhutsong jwa one, e ne e le bomang, fa e se ba ba neng ba le kgopo?

¹⁹Re a bona fa ba reteletswe ke go tsena, ka ntlha ya go tlhoka go dumela.