1 Samuel 25

¹Samuele a swa; mme Baiseraele botlhe ba phuthega mmogo ba mo lelela, ba mo fitlha mo ntlong ya gagwe mo Rama. Mme Dafite a nanoga, a fologela kwa nageng ya Parane.

²Ga bo go le monna mo Maone, yo dithuo tsa gagwe di neng di le kwa Karemele, monna yoo o ne a le mogolo thata, a na le dinku di le 3 000, le dipodi di le 1 000; mme a beola dinku tsa gagwe mo Karemele.

³Leina la monna yoo e ne e le Nabale, leina la mosadi wa gagwe e le Abigaile; mosadi a bo a na le tlhaloganyo thata, a le montle mo sefatlhogong; monna ene a bo a le sebeto, a le bosula mo ditirong tsa gagwe; mme a bo a le wa kgotla ya ga Kalebe.

⁴Dafite a utlwa a le kwa nageng fa Nabale a beola dinku tsa gagwe.

⁵Dafite a roma makau a le some; Dafite a raya makau a re: “Tlhatlogelang kwa Karemele, lo ye kwa goo rra Nabale, lo mo dumedise ka leina la me.

⁶Lo ree ene yo o tshelang a le mo letlotlong, lo bue jaana lo re: ‘A kagiso e nne le wena, a kagiso e nne le ntlo ya gago, a go nne kagiso mo go tsotlhe tse o nang natso.

⁷Jaana ke utlwile fa o na le babeodi. Basimane ba gago ba ba disang, ba ntse ba na le rona, ga re a ka ra ba utlwisa botlhoko, le gone ga ba a ka ba tlhokafalelwa ke sepe ka lobaka lotlhe lwa fa ba le mo Karemele.

⁸Botsa makau a gago, ba tlaa go bolelela. Ke gone a makau a me a bone botsalano mo matlhong a gago; gonne re tsile ka letsatsi le le molemo; ke a go rapela, naya batlhanka ba gago le morwao Dafite sengwe fela se se fa gaufi.’ ”

⁹E rile makau a ga Dafite a fitlha, a bua le Nabale ka fa mafokong otlhe ao, ka leina la ga Dafite, mme ba itse go khutla.

¹⁰Nabale a fetola batlhanka ba ga Dafite a re: “Ana Dafite e be e le mang? Le morwa Jese e mang? Monomotlha go na le batlhanka ba le bantsi ba ba thobang mongwe le mongwe mo go mong wa gagwe.

¹¹A ke tlaa tsaya senkgwe sa me, le metsi a me, le nama ya me e ke e bolaetseng babeoledi ba me, ke di neye batho ba ke sa itseng kwa ba tswang gone?”

¹²Mme makau a ga Dafite a itsaya motlhala ba bowa ba fitlha ba mmolelela ka fa mafokong otlhe ao.

¹³Dafite a raya banna ba gagwe a re: “A mongwe le mongwe a ikgatlhe ka tšhaka ya gagwe.” Mme mongwe le mongwe a ikgatlha ka tšhaka ya gagwe; le ene Dafite a ikgatlha ka tshaka ya gagwe; mme ga sala Dafite morago e ka ne e le banna ba ba 400; mme ba ba 200 ba sala le dithoto.

¹⁴Lengwe la makau la bolelela Abigaile, mosadi wa ga Nabale, la re: “Bona, Dafite o ne a romile batho ba tswa kwa nageng, ba tla go dumedisa mong wa rona; mme a fitlha a ba kgalemela fela.

¹⁵Banna bao ba bo ba le molemo thata mo go rona, ga re a ka ra utlwisiwa botlhoko, le gone ga re a ka ra tlhoka sepe ka lobaka lotlhe lwa fa re ntse re na nabo re le mo dinageng.

¹⁶Ba ne ba le lorako fa go rona bosigo le motshegare, ka lobaka lotlhe lwa fa re na nabo re disitse dinku.

¹⁷Ke gone jaana itse o bo o akanye se o tlaa se dirang; gonne bosula bo laoletswe mong wa rona, le ntlo yotlhe ya gagwe; gonne ene ke seramatla ruri, se motho o sa ka keng a bua naso.”

¹⁸Foo Abigaile a itlhaganela, a tsaya dinkgwe di le makgolo mabedi, le mefalo ya bojalwa jwa mofine e le mebedi, le dinku di le tlhano di baakantswe, le dielo di le tlhano tsa mabele a a gadikilweng, le marose a difine tse di swabileng a le lekgolo, le dipapetla tsa difeige di le makgolo mabedi, a di belesa ka diesela.

¹⁹A raya makau a gagwe a re: “Nketelelang pele; bonang, ke tlaa lo latela.” Mme a se ka a bolelela monna wa gagwe Nabale.

²⁰Ga nna jalo, ya re a palame esela ya gagwe, a fologa ka phata ya thaba, bonang, Dafite le banna ba gagwe ba bo ba fologa ba lebaganye nae, mme a kopana nabo.

²¹Dafite o ne a rile: “Ruri dilo tsotlhe tse seapu seo se nang natso mo nageng ke di boloketse lefela, mme go se ka ga tlhokafala sepe sa dilo tsotlhe tse e leng tsa gagwe. O ntefetse molemo ka bosula.

²²“A Modimo o direle baba ba ga Dafite jalo o bo o go fetise, fa e tlaa re bosa bo o sa ke bo ke sadisite sengwe le fa e le ngwana wa mosimane a le mongwe fela mo dilong tsotlhe tse e leng tsa gagwe.”

²³E rile Abigaile a bona Dafite, a akofa a pagologa mo eseleng ya gagwe, a wela fa pele ga Dafite ka sefatlhogo, a ikobela fa fatshe.

²⁴A wela fa dinaong tsa gagwe a re: “A boikepo bo nne mo go nna morena wa me, a bo nne mo go nna; ke a go rapela, o mme lelata la gago le bue mo ditsebeng tsa gago, o utlwe mafoko a lelata la gago.

²⁵Ke a go rapela, a morena wa me a se tlhokomele monna yole wa seramatla, e bong Nabale; gonne jaaka leina la gagwe le ntse, le ene o ntse jalo; Nabale ke leina la gagwe, mme boeleele bo mo go ene; nna lelata la gago ga ke a ka ka bona makau a morena wa me o ne o a romile.

²⁶Jaana ka re, morena wa me, jaaka Jehofa a tshedile le jaaka mowa wa gago o tshedile, e re ka Jehofa a go thibile mo molatong wa madi, le mo go ipusolosetseng ka seatla sa gago, ka re: A baba ba gago le ba ba batlelang morena wa me bsula ba nne jaaka Nabale.

²⁷Jaana thelesetso e lelata la gago le e lerileng moreneng wa me, e newe makau a a setseng morena wa me morago.

²⁸Ke a go rapela, o itshwarele tlolo ya lelata la gago; gonne ruri Jehofa o tlaa direla morena wa me ntlo ya tlhomamo, ka morena wa me a tlhabana ditlhabano tsa ga Jehofa; bosula ga bo ketla bo fitlhelwa mo go wena ka metlha yotlhe ya gago.

²⁹Le fa motho a go tsogologetse, a re o a go konatelela, a batla mowa wa gago, le fa go ntse jalo, mowa wa morena wa me o tlaa fitlhelwa mo ngateng ya botshelo mo go Jehofa Modimo wa gago, mewa ya baba ba gago o tlaa e konopela koo jaaka ekete e tswa mo khuting ya motsekedi.

³⁰Go tlaa dirala, e tlaa re Jehofa a sena go direla morena wa me ka fa go tsotlhe tse di molemo, tse o di buileng ka ga gago, a go tlhomile go nna kgosana ya Iseraele;

³¹moo, ga go ketla go nna khutsafalo mo go wena, le fa e le kgopiso ya pelo mo go morena wa me, ya go re o kile wa tsholola madi a a se nang molato, le fa e le go re morena wa me o kile a ipusolosetsa ka esi. E tlaa re Jehofa a sena go direla morena wa me sentle, foo o gakologelwe lelata la gago.”

³²Dafite a raya Abigaile a re: “A go bakwe Jehofa Modimo wa Iseraele, yo o go romileng gompieno wa tla go nkgatlhantsha.

³³A go bakwe botlhale jwa gago, a go bakwe wena, yo o nthibileng gompieno mo mading a a se nang molato, le mo go ipusolosetseng ka seatla sa me.

³⁴Gonne ruriruri, jaaka Jehofa Modimo wa Iseraele a tshedile, yo o nthibileng, gore ke se ka ka go utlwisa botlhoko, fa o ka bo o se ka wa itlhaganela wa tla go nkgatlhantsha, ruri e ne e tlaa re bosa bo o sa, go ka bo go se ka ga salela Nabale sepe, le fa e le ngwana a le mongwe fela wa mosimane.”

³⁵Jalo Dafite a amogela mo seatleng sa gagwe se o ne a se mo lereditse; a mo raya a re: “Ya ka kagiso kwa ntlong ya gago; bona, ke reeditse lentswe la gago, le wena ke go tshotse sentle.”

³⁶Abigaile a fitlha kwa go Nabale; mme bonang a bo a dira modiro mo ntlong ya gagwe, o o tshwanang le modiro wa kgosi; mme pelo ya ga Nabale e ne e tlhapetswe mo teng ga gagwe, gonne a tagilwe thata; ke gone ka moo mosadi o se kang a mmolelela sepe, bonnye le fa e le bogolo, ga tsamaya bosa jwa sa.

³⁷Ga dirala ya re ka moso bojalwa bo dule mo go Nabale, mosadi wa gagwe a mmolelela dilo tse, mme pelo ya gagwe ya nyera mo teng ga gagwe, a nna jaaka lentswe fela.

³⁸Ga dirala e ka ne e le morago ga malatsi a le some, Jehofa a itaya Nabale, mme a swa.

³⁹E rile Dafite a utlwa fa Nabale a sule, a re: “A go bakwe Jehofa, yo o sekileng kgobo ya me e e tswang mo seatleng sa ga Nabale, mme a thiba motlhanka wa gagwe mo bosuleng; go dira bosula ga Nabale, Jehofa o go buseditse mo tlhogong ya gagwe ka esi.” Dafite a roma, a ya go bua ka ga Abigaile, go mo tsaya a nna mosadi wa gagwe.

⁴⁰E rile batlhanka ba ga Dafite ba fitlha kwa go Abigaile kwa Karemele, ba bua nae ba re: “Dafite o re romile kwano go wena, go tla go go tsaya o ya go nna mosadi wa gagwe.”

⁴¹Mme a nanoga, a ikobela fa fatshe ka sefatlhogo, a re: “Bona, lelata la gago ke motlhanka wa go tlhapisa dinao tsa batlhanka ba morena wa me.”

⁴²Abigaile a itlhaganela, a tloga, a palama esela, a na le barweetsana ba gagwe ba le batlhano ba ba mo salang morago; mme a sala barongwa ba ga Dafite morago, a ya a nna mosadi wa gagwe.

⁴³Le gone Dafite a tsaya le Ahinoame wa Jesereele; boo babedi ba nna basadi ba gagwe.

⁴⁴Mme jaana Mikale, morwadia Saule, mosadi wa ga Dafite, Saule o ne a mo neile Paleti morwa Laiše, yo e neng e le motho wa Galime.