1 Samuel 27

¹Dafite a ithaya mo pelong a re: “A bo ke tlaa nama ke swa motlha mongwe ka seatla sa ga Saule; mo go nna go molemo bogolo go falolela kwa lefatsheng la Bafilisitia; Saule o tlaa ntlhoboga go tlhola a mpatla gope mo melelwaneng yotlhe ya Iseraele: jalo ke tlaa falola mo seatleng sa gagwe.”

²Mme Dafite a nanoga, ene le ba ba 600 ba ba nang nae, a kgabaganyetsa kwa go Akiše morwa Maoke, kgosi ya Gathe.

³Dafite a nna kwa go Akiše, ene le banna ba gagwe, mongwe le mongwe a na le ba ntlo ya gagwe, le e leng Dafite a na le basadi ba gagwe ba babedi, Ahinoame, wa Mojesereele, le Abigaile wa Mokaremele, mosadi wa ga Nabale.

⁴Ga bolelelwa Saule fa Dafite a tshabetse kwa Gathe; mme a se ka a lhola a mmatla gope.

⁵Dafite a raya Akiše a re: “Fa jaana ke bonye botsalano mo matlhong a gago, a ba nneye bonno mo go mongwe wa metse e e mo lefatsheng, gore ke age gone; gonne motlhanka wa gago o ka bo a nnelang nao mo motseng wa segosi?”

⁶Foo Akiše a mo naya Sikelage ka tsatsi leo; ke gone ka fa Sikelage e leng wa dikgosi tsa Juta ka gone le gompieno.

⁷Palo ya malatsi a Dafite o ne a aga mo lefatsheng la Bafilisitia ka one e ne e le ngwaga o o tletseng le dikgwedi di le nne.

⁸Dafite le banna ba gagwe ba bolola, ba tlhasela Bagešure, le Bagirise le Baamaleke; gonne merafe eo e ne e le banni ba lefatshe, ba e ne e le ba bogologolo, jaaka fa motho a ya Shure, e bong go ya kwa lefatsheng la Egepeto.

⁹Dafite a kgemetha lefatshe, a se ka a rekegela monna le fa e le mosadi, mme a gapa dinku le dikgomo, diesela, dikamela, le diaparo; a bowa a tla kwa go Akiše.

¹⁰Akiše a re: “Lo tswa go tlhasela kae gompieno?” Dafite a re: “Kwa Juta ntlheng ya borwa, le kwa ntlheng ya go pota Bajerameele kwa borwa, le go pota Bakene ntlheng ya borwa.”

¹¹Dafite a se ka a rekegela monna le fa e le mosadi go tla a ba lere mo Gathe, a re: “Ba ka tla ba re bolela, ba re: ‘Dafite o ntse a dira jaana le jaana.’ ” Mokgwa wa gagwe o ne o ntse jaana ka metlha yotlhe a le mo lefatsheng la Bafilisitia.

¹²Akiše a dumela Dafite a re: “Batho ba ga gabo ba Iseraele o ba itlhoiseditse ruri; ke gone ka moo o tlaa nna motlhanka wa me ka bosakhutleng.”