1 Samuel 3

¹Ngwana Samuele a direla Jehofa fa pele ga Eli. Lefoko la ga Jehofa la bo le tlhokega thata mo metlheng eo; go ne go se na ponatshegelo e e senogileng.

²Ga dirala ka lobaka loo e rile Eli a robetse mo bonnong jwa gagwe, (jaanong matlho a gagwe one a setse a simologile go nna lotobo, a ba a sa ka ke a bona),

³Le lobone lwa Modimo lo ise lo time, Samuele ene a le fa fatshe a robetse, mo tempeleng ya ga Jehofa, kwa letlole la Modimo le neng le le gone;

⁴ga re, Jehofa a bitsa Samuele, mme a re: “Ke fano.”

⁵A tabogela kwa go Eli, a re: “Ke fano; gonne o mpiditse.” Mme a re: “Ga ke a go bitsa; robala gape.” Mme a ya a robala.

⁶Jehofa a ba a bitsa gape a re: “Samuele.” Samuele a tsoga, a ya kwa go Eli, a re: “Ke fano; gonne o mpiditse.” Mme a mo fetola a re: “Ga ke a go bitsa morwaaka, baa o robale.”

⁷Jaana Samuele o ne a ise a itse Jehofa, le gone lefoko la ga Jehofa le ne le ise le mo senolelwe.

⁸Jehofa a bitsa Samuele gape lwa boraro. Mme a tsoga a ya kwa go Eli a re: “Ke fano; gonne o mpiditse.” Eli a lemoga fa Jehofa a biditse ngwana.

⁹Ke gone Eli a raya Samuele a re: “Ya o robale; e re fa a go bitsa o re: ‘Bua, Jehofa; gonne motlhanka wa gago o a utlwa.’ ” Jalo Samuele a ya a robala mo bonnong jwa gagwe.

¹⁰Jehofa a tla a ema a bitsa jaaka ka metlha e mengwe a re: “Samuele, Samuele.” Foo Samuele a re: “Bua; gonne motlhanka wa gago o a utlwa.”

¹¹Jehofa a raya Samuele a re: “Bona, ke tlaa dira sengwe mo Iseraele, se ditsebe tsoo pedi tsa mongwe le mongwe yo o utlwang di tlaa sumang ka sone.

¹²Ke tlaa re mo tsatsing leo ke direle Eli gotlhe mo ke go buileng ka ga ntlo ya gagwe, go tswa kwa tshimologong go ya fela kwa bokhutlong.

¹³Gonne ke mmoleletse fa ke tlaa sekisa ntlo ya gagwe ka bosakhutleng ka ga boikepo jo o bo itsileng, gonne bomorwawe ba iteretse phutso, mme ene a se ka a ba kganela.

¹⁴Ke gone ka moo ke ikanetseng ntlo ya ga Eli ka re: Boikepo jwa ntlo ya ga Eli ga bo ketla bo tlhapisiwa ka setlhabelo le fa e le ka tshupelo ka bosakhutleng.”

¹⁵Samuele a robala, jwa ba jwa sa; a bula ntlo ya ga Jehofa. Mme Samuele a boifa go kakanyetsa Eli ponatshegelo.

¹⁶Foo Eli a bitsa Samuele a re: “Samuele, morwaaka.” Mme a re: “Ke fano.”

¹⁷A re: “Ke eng se Jehofa o se buileng nao? Ke a go rapela, o se ka wa se ntobela; a Modimo o go direle jalo, o bo o fetise, fa o ka ntobela sengwe sa dilo tsotlhe tse o di buileng nao.”

¹⁸Samuele a mmolelela gotlhe fela, a se ka a mo lobela sepe. Mme Eli a re: “Ke Jehofa; a a dire se o se bonang se le molemo.”

¹⁹Samuele a gola, Jehofa a nna nae, a se ka a leseletsa mafoko ape a gagwe go wela fa fatshe.

²⁰Baiseraele botlhe, go tswa go Dane, go ya fela kwa Beerešeba ba itse fa Samuele a tlhomilwe go nna moperofeti wa ga Jehofa.

²¹Mme Jehofa a bonala gape mo Shilo; gonne Jehofa o ne a tle a itshenolele Samuele mo Shilo ka lefoko la ga Jehofa.