1 Samuel 31

¹Bafilisitia ba tlhabana le Baiseraele; mme banna ba Iseraele ba tshaba fa pele ga Bafilisitia, ba wa mo thabeng ya Gileboa ba bolailwe.

²Bafilisitia ba konatelela Saule thata le bomorwawe; mme Bafilisitia ba bolaya Jonathane, le Abinatabe, le Melekišue, bomorwa Saule.

³Tlhabano ya pitlaganya Saule thata, bahudi ka mara ba mo atamela; mme a tlhabakwa thata ke bahudi ka mara.

⁴Foo Saule a raya motshola dibolao tsa gagwe a re: “Somola tšhaka ya gago, o mphololetse ka yone; batho ba ba sa rupang ba, ba ka tla ba mphololetsa, mme ba ntshotla.” Mme motshola dibolao tsa gagwe a gana; gonne o ne a boifa thata. Ke gone Saule a tshwara tšhaka ya gagwe, a wela mo go yone.

⁵E rile motshola dibolao tsa gagwe a bona fa Saule a sule, le ene a wela mo tšhakeng ya gagwe, a swa nae.

⁶Jalo Saule a swa le bomorwawe ba bararo, le motshola dibolao tsa gagwe, le banna botlhe ba gagwe mmogo, ka tsatsi leo fela.

⁷Banna ba Iseraele ba ba kwa moseja ga molapo le ba ba kwa moseja ga Joretane, ba rile ba bona fa banna ba Iseraele ba tshaba, le go re Saule le bomorwawe ba sule, ba tlogela metse ya bone, ba tshaba; mme Bafilisitia ba tla go aga mo go yone.

⁸Ga dirala ka moso, e rile Bafilisitia ba tla go apola ba ba bolailweng, ba fitlhela Saule le bomorwawe ba bararo ba ole mo thabeng ya Gileboa.

⁹Ba mo kgaola tlhogo, ba mo apola dibolao, ba roma mo lefatsheng la Bafilisitia mo tikologong, ba isa mafoko kwa ntlong ya medimo ya bone ya disetwa, le mo bathong.

¹⁰Ba tsenya dibolao tsa gagwe mo ntlong ya boAšetarothe; ba kokothela mmele wa gagwe mo lorakong lwa Bethešane.

¹¹Mme e rile banni ba Jabeše-gileate ba utlwa ka ga gagwe se Bafilisitia ba se diretseng Saule,

¹²banna ba ba pelokgale botlhe ba nanoga, ba lala ba tsamaya bosigo jotlhe, ba ya ba tlosa mmele wa ga Saule le mebele ya bomorwawe mo lorakong lwa Bethešane; ba tla mo Jabeše, ba e fisa gone.

¹³Ba tsaya marapo a bone, ba a fitlha fa tlase ga setlhare sa motamariseka mo Jabeše, mme ba ikitsa go ja ka malatsi a supa.