Psalms 104

¹Ek wil die Here loof! Here my God, U is baie groot, U is beklee met koninklike luister,

²U is met 'n kleed van lig omhul. Dit is U wat die hemelkoepel soos 'n tentdoek gespan

³en vir U 'n woonplek ingerig het oor die waters daarbo, U wat op die wolke ry, op die vleuels van die wind,

⁴U wat die winde u boodskappers maak, die weerligte u dienaars,

⁵U wat die aarde stewig gevestig het, sodat dit nooit sal wankel nie.

⁶Die groot waters het die aarde soos 'n kleed oordek, die waters het bo-oor die berge gestaan.

⁷Maar toe U die waters aanspreek, het hulle gevlug, voor die krag van u stem het hulle die wyk geneem.

⁸Hulle het oor die berge gespoel en in die laagtes weggevloei na die plek toe wat U vir hulle bestem het.

⁹U het 'n grens gestel waaroor hulle nie mag gaan nie: hulle mag die aarde nie weer oordek nie.

¹⁰U laat fonteine in die valleie ontspring en tussen die berge deur stroom.

¹¹Daar kom al die wilde diere drink en die wildedonkies hulle dors les.

¹²Die voëls maak hulle neste langs die water en kwetter tussen die takke.

¹³Uit die hemel laat U dit op die berge reën, die aarde word versadig deur die reën wat U gee.

¹⁴U laat gras uitspruit vir die diere, en groen plante vir die mens sodat hy sy kos uit die aarde kan kry:

¹⁵wyn om mense se harte bly te maak, olie om die gesig te versorg, kos om die mens nuwe krag te gee.

¹⁶Die bome van die Here kry volop reën, die seders op die Libanon, dié wat Hy geplant het,

¹⁷waar die voëls hulle neste maak, en die reier sy huis in die boomtoppe bou.

¹⁸Die hoë berge is 'n tuiste vir die klipbokke, die rotse is 'n skuilplek vir die dassies.

¹⁹U het die maan gemaak om die vaste tye mee aan te gee, die son weet wanneer om onder te gaan.

²⁰As U die donker bring en dit nag word, roer al die diere in die bos.

²¹Die leeus brul op soek na prooi: hulle vra hulle kos van God.

²²As die son opkom, sluip hulle weg en gaan lê in hulle skuilplekke.

²³Dan gaan die mens na sy werk toe, en hy werk tot die aand.

²⁴U het baie dinge geskep, Here, die aarde is vol van wat U gemaak het, en tog, U het alles in wysheid geskep.

²⁵Daar is die see, groot en wyd, wat wemel van diere, klein en groot.

²⁶Daar vaar die skepe, en daar is die Leviatan. U het hom gemaak om mee te speel.

²⁷Hulle is almal van U afhanklik, U gee hulle kos op hulle tyd.

²⁸U gee, en hulle eet, U maak u hand oop, en hulle kry meer as genoeg.

²⁹Maar as U U terugtrek, is dit klaar met hulle, as U hulle asem wegneem, is hulle dood en word hulle weer stof.

³⁰U gee die lewensasem en daar is lewe; ook uit die grond laat U nuwe lewe spruit.

³¹Mag daar aan die roem van die Here geen einde wees nie! Mag die werk van die Here Hom vreugde verskaf,

³²Hy wat na die aarde kyk, en dit bewe, wat die berge aanraak, en hulle brand.

³³Ek wil tot eer van die Here sing so lank ek lewe, ek wil die lof van my God besing so lank ek daar is.

³⁴Mag hierdie bepeinsinge van my vir Hom aanneemlik wees! Ek wil my in die Here verbly.

³⁵Mag die sondaars van die aarde af verdwyn, mag die goddeloses ophou om te bestaan! Ek wil die Here loof. Prys die Here!