Psalms 105

¹Loof die Here! Roep Hom aan! Maak aan die nasies bekend wat Hy gedoen het.

²Sing liedere, sing tot sy eer, vertel van al sy magtige dade.

³Roem sy heilige Naam, laat dié wat die teenwoordigheid van die Here soek, bly wees.

⁴Soek hulp en beskerming by die Here, soek gedurig sy teenwoordigheid.

⁵Julle moet dink aan die magtige dade wat Hy gedoen het, aan sy wonders, aan die reddingsdade op sy bevel,

⁶julle, nageslag van Abraham sy dienaar, nakomelinge van Jakob vir wie Hy uitverkies het.

⁷Hy, die Here, is ons God; sy reddingsdade strek oor die hele aarde.

⁸Hy hou sy verbond altyd in stand, die belofte wat Hy aan duisende geslagte toegesê het,

⁹die verbond wat Hy met Abraham gesluit het, sy eed aan Isak.

¹⁰Hy het dit vir Jakob bevestig as 'n vaste toesegging, vir Israel as verbond wat altyd sal bestaan.

¹¹Hy het gesê: “Ek gee Kanaän vir jou as grondgebied en eiendom.”

¹²Toe hulle nog maar min was, net 'n paar mense, en vreemdelinge in die land,

¹³toe hulle van volk na volk geswerf het, van die gebied van die een volk na dié van 'n ander,

¹⁴het Hy niemand toegelaat om hulle te verdruk nie, en het Hy selfs konings ter wille van hulle gewaarsku:

¹⁵“Moenie aan my gesalfdes raak nie, moenie my profete kwaad aandoen nie!”

¹⁶Toe Hy hongersnood oor die land gebring het en al hulle kos laat opraak het,

¹⁷het Hy iemand voor hulle uit gestuur: Josef is as slaaf verkoop.

¹⁸Hulle het sy voete geboei en hom in die gevangenis gehou

¹⁹totdat sy woorde bewaarheid is, nadat hy die toets deurstaan het met wat die Here aan hom bekend gemaak het.

²⁰Toe het die koning hom uit die gevangenis laat uitkom; die heerser oor baie volke het hom vrygelaat

²¹en hom aangestel as hoof van die koninklike huishouding, met gesag oor al sy besittings.

²²Josef kon die amptenare van die koning na goeddunke beveel en selfs aan hoë amptenare leiding gee.

²³Israel het na Egipte toe gekom, Jakob kon in die land van Gam gaan woon.

²⁴Die Here het sy volk baie vrugbaar gemaak, talryker as hulle onderdrukkers.

²⁵Hy het die gesindheid van die Egiptenaars verander, sodat hulle sy volk gehaat en vyandig opgetree het teenoor sy dienaars.

²⁶Die Here het Moses, sy dienaar, gestuur, en vir Aäron, die man wat Hy verkies het.

²⁷Onder die Egiptenaars het hulle die tekens van die Here gedoen, sy wonders het hulle gedoen in die land van Gam.

²⁸Hy het duisternis gestuur, dit donker gemaak, maar hulle het hulle teen sy opdrag bly verset.

²⁹Hy het hulle waters in bloed verander en hulle visse laat vrek.

³⁰Hulle land het gekrioel van die paddas, selfs tot in hulle koning se slaapkamer.

³¹Die Here het beveel en daar het insekte gekom, muggies oor hulle hele gebied.

³²Hy het hulle reëns in hael verander en swaarweer oor hulle land gestuur.

³³Hy het hulle wingerdstokke en vyebome vernietig en die bome in hulle gebied stukkend geslaan.

³⁴Hy het beveel en daar het sprinkane gekom, ontelbaar baie sprinkane.

³⁵Hulle het al wat groen was in die Egiptenaars se land verslind en al die gesaaides van hulle lande afgevreet.

³⁶Al hulle oudste seuns in die land het Hy laat sterwe, al hulle eersgeborenes.

³⁷Toe het Hy sy volk uitgelei, belaai met silwer en goud. In geeneen van die stamme het iemand uitgesak nie.

³⁸Die Egiptenaars was bly dat hulle vertrek het, want hulle was skrikbevange oor die Israeliete.

³⁹Die Here het 'n wolk uitgesprei as beskutting oor hulle en 'n vuur gegee om lig te maak in die nag.

⁴⁰Toe hulle kos vra, het Hy kwartels laat kom en sy volk met brood uit die hemel versadig.

⁴¹Hy het 'n rots oopgebreek en daar het water uitgestroom wat soos 'n rivier deur die dorre gebied gevloei het.

⁴²Ja, Hy het sy heilige belofte aan sy dienaar Abraham gestand gedoen

⁴³en sy volk juigend, sy uitverkorenes jubelend laat voorttrek.

⁴⁴Vir hulle het Hy die heidene se lande gegee; wat deur ander volke met moeite verkry is, het hulle in besit geneem.

⁴⁵Daarom moet hulle sy voorskrifte gehoorsaam en sy wil doen. Prys die Here!