Psalms 113

¹Prys die Here! Prys, dienaars van die Here, prys die Naam van die Here!

²Die Naam van die Here moet geloof word, nou en vir altyd.

³Van waar die son opkom tot waar dit ondergaan, moet die Naam van die Here geprys word!

⁴Hoog bo al die nasies heers die Here, sy mag strek selfs oor die hemele.

⁵ [5-6] Wie in die hemel of op die aarde is soos die Here ons God, wat hoog woon en hier onder alles sien?

⁶***

⁷Die geringe help Hy op uit die stof, die arme laat Hy van die ashoop af opstaan

⁸om hom by vernames te laat sit, by die vernames van sy volk.

⁹Aan die kinderlose skenk Hy 'n huisgesin, sy word 'n gelukkige moeder van kinders. Prys die Here!