Psalms 114

¹Toe Israel uit Egipte getrek het, toe die nageslag van Jakob getrek het, weg van die volk met die onverstaanbare taal af,

²het Juda sy gewyde besit geword en Israel sy magsgebied.

³Die see het dit gesien en op die vlug geslaan, die Jordaan het teruggedraai,

⁴die berge het rondgespring soos ramme, die rante soos lammers.

⁵Wat is dit met jou, see, dat jy op die vlug slaan, wat is dit, Jordaan, dat jy terugdraai,

⁶berge, dat julle soos ramme rondspring, en julle, rante, soos lammers?

⁷Bewe, aarde, as die Here verskyn, as die God van Jakob verskyn,

⁸Hy wat rots in waterkuile verander, harde klip in fonteine.