Psalms 124

¹'n Pelgrimslied. Van Dawid. As die Here ons nie gehelp het nie, dit moet Israel bely,

²as die Here ons nie gehelp het toe mense ons aangeval het nie,

³dan het hulle ons lewendig verslind toe hulle woede teen ons ontvlam het;

⁴dan het die waters ons weggespoel en die vloed ons oorweldig;

⁵dan het die skuimende waters ons oorweldig.

⁶Aan die Here kom die lof toe: Hy het nie toegelaat dat ons hulle prooi word nie.

⁷Ons is bevry soos 'n voël uit die wip van 'n voëlvanger; die wip het gebreek en ons was vry!

⁸Ons hulp kom van die Here wat hemel en aarde gemaak het.