Psalms 123

¹'n Pelgrimslied. Ek sien na U op, U wat uit die hemel heers.

²Soos die oë van 'n slaaf gerig is op die hand van sy eienaar, soos die oë van 'n slavin gerig is op die hand van haar eienares, so is ons oë gerig op die Here ons God, totdat Hy Hom oor ons ontferm.

³Ontferm U oor ons, Here, ontferm U oor ons, want ons het meer as genoeg veragting gehad,

⁴meer as genoeg spot van oormoedige mense, veragting van hovaardiges.