Psalms 135

¹Prys die Here, prys die Naam van die Here, prys Hom, dienaars van die Here,

²julle wat in die tempel van die Here staan, in die voorhowe van die tempel van ons God!

³Prys die Here, want die Here is goed, sing tot eer van sy lieflike Naam.

⁴Die Here het Jakob vir Hom gekies, Israel as die volk wat Syne is.

⁵Ek weet, die Here is groot, ons Here is verhewe bo al die gode.

⁶Alles wat die Here wil, doen Hy, in die hemel en op aarde, in die see, in al die oseane.

⁷Hy laat die wolke opkom oor die horison, Hy maak die weerligstrale vir die reën en bring die wind te voorskyn.

⁸Hy het die eerstelinge in Egipte getref, mense sowel as diere;

⁹Hy het oor jou, Egipte, groot en skrikwekkende dinge gebring, oor die farao en al sy amptenare;

¹⁰Hy het baie nasies verslaan en magtige konings laat sneuwel:

¹¹koning Sihon van die Amoriete, koning Og van Basan, en al die konings in Kanaän.

¹²Hy het hulle land as geskenk aan Israel gegee, as geskenk aan sy volk.

¹³Here, U is altyd daar, U is daar van geslag tot geslag.

¹⁴Die Here behartig die regsaak van sy volk: Hy ontferm Hom oor sy dienaars.

¹⁵Wat die nasies het, is afgode, van silwer en goud, die werk van mensehande;

¹⁶'n mond het hulle, maar praat kan hulle nie, oë het hulle, maar sien kan hulle nie;

¹⁷ore het hulle, maar hoor kan hulle nie, hulle haal nie asem nie.

¹⁸Wie hulle maak en op hulle vertrou, sal net soos hulle word.

¹⁹Huis van Israel, loof die Here, huis van Aäron, loof die Here,

²⁰huis van Levi, loof die Here, julle wat die Here dien, loof die Here!

²¹Aan die Here kom die lof uit Sion toe, aan Hom wat in Jerusalem woon! Prys die Here!