Psalms 145

¹'n Loflied van Dawid. Ek wil u lof verkondig, my God en Koning, ek wil u Naam altyd loof.

²Elke dag wil ek U loof, ek wil u Naam altyd prys.

³Die Here is groot, alle lof kom Hom toe, sy grootheid is ondeurgrondelik.

⁴Geslag na geslag prys wat U doen en vertel van u magtige dade,

⁵van die luister, die heerlikheid van u majesteit. Ek wil getuig van u magtige dade,

⁶sodat die mense oor u wonderdade sal praat. Ek wil van u grootheid vertel.

⁷Sonder ophou moet hulle u groot goedheid verkondig en oor u reddingsdade jubel.

⁸Genadig en barmhartig is die Here, lankmoedig en vol liefde.

⁹Die Here is vir almal goed en barmhartig oor alles wat Hy geskep het.

¹⁰Almal wat deur U geskep is, loof U, Here, en u troue dienaars prys U!

¹¹Hulle vertel van u koninklike mag en getuig van u groot krag.

¹²Die mense moet weet van sy krag, van sy koninklike mag en majesteit.

¹³U koningskap is 'n koningskap vir alle tye, u heerskappy strek oor die geslagte heen.

¹⁴Die Here help almal op wat geval het. Hy ondersteun dié wat bedruk is.

¹⁵Die oë van almal is op U gerig, en U gee hulle kos op hulle tyd.

¹⁶U maak u hand oop en skenk u guns in oorvloed aan al wat leef.

¹⁷Die Here is regverdig in al sy handelinge, getrou in alles wat Hy doen.

¹⁸Die Here is naby almal wat Hom aanroep, almal wat Hom in opregtheid aanroep.

¹⁹Aan dié wat Hom dien, gee Hy wat hulle vra, Hy hoor as hulle om hulp roep, en Hy red hulle.

²⁰Die Here beskerm almal wat Hom liefhet, maar al die goddeloses verdelg Hy.

²¹Ek sal die lof van die Here verkondig. Laat al wat leef, sy heilige Naam vir altyd prys.