Psalms 146

¹Prys die Here! Ek wil die Here prys.

²Ek wil die Here prys so lank ek lewe, ek wil die lof van my God besing so lank ek daar is.

³Moenie op magtiges vertrou nie, nie op 'n mens nie; hy kan jou nie red nie.

⁴Sy asem verlaat hom, hy word weer grond en sy planne is daarmee heen.

⁵Dit gaan goed met die mens wat sy hulp van die God van Jakob ontvang, die mens wie se hoop gevestig is op die Here, sy God.

⁶Die Here het die hemel en die aarde gemaak, die see en alles daarin. Hy bly vir altyd getrou,

⁷Hy laat reg geskied aan verdruktes en gee brood aan dié wat honger ly. Die Here bevry die gevangenes,

⁸die Here laat blindes sien, Hy ondersteun dié wat bedruk is. Die Here het die regverdiges lief.

⁹Hy beskerm vreemdelinge en help weeskinders en weduwees, maar Hy versper die pad vir die goddeloses.

¹⁰Die Here regeer vir altyd. Sion, jou God regeer van geslag tot geslag. Prys die Here!